السلام عليكم
اتمني تقرأو للاخر و حد يساعدني
انا عندي و في مشكله مضايقاني جدا و هيا مظهرلتيش الا مؤخرا او كانت موجودة من الاول بس بدرجه اخف من كدا و هي..
اني تقريبا كدا عندي وسواس نظافه او مش عارفه وسواس قهري بس انا مبحثتش في اعراضو.. ما علينا بس دا بيخليني اني حرفيا بقيت بكره الصيف و بخاف جدا من الحشرات لدرجه اني بقيت ببقي قاعده بفجأه احس دماغي بيقولي بصي هنا و اول م ابص ع المكان الاقي نمل بجد حرفيا ف البيت كله محدش بيشوف الحشرات قد م انا بشوفها
و كمان انا بشوف كل حاجه قدامي كأنها بكتريا خصوصا ف البيت يعني لما ابقي بره البالبيت الحاجه بتفضل بس انا ببقي مكبره دماغي فمش بركز اوي اما ف البيت مش بقدر و دا مش معناها انو الناس مقرفه و انا اللي نضيفه ما شاء الله يعني مع احترامي بس الموضوع وصل اني بقرف حد يكون قاعد على كرسي او حاجه و بعدها اقعد بعد م يبقي لسه قايم
و كمان بقرف اكل او اشرب من ورا حد مهما كان مين حرفيا انا زهقتهم ف البيت لدرجه انهم بيعملو حاجات تبان عاديه يعني مثلا يقعدو ع السرير انا بقرف جدا و بقولهم يقوموا و كمان يعني لو حد ايده فيها ميه و لمسني بقرف جدا و مش ببقى قادرة اتنفس و لدرجه اني بتحسبن فيه مهما كان قريب
و المشكله الناس محدش راضي يفهمني و دا بيأذيني كتير لانهم بيعملوا الحاجات اللي بتستفزني و لدرجه اني ف مره ركبت مواصلات ف المواصلات كانت بعيده شويه اخدت حاجه احطها ع الكرسي عشان اتجنب اقعد ورا الناس و اني دايما بتمنى لو اقدر اغطي كل حاجه بستعملها بكياس حتى بس المهم انو محدش يلمسها و انا ف البيت مش بشرب من الكبايات عادي لا بشتري ازازة ميه و بشرب فيها و الاكل اغلبه بعمله لنفسي في حله معينه و تقريبا عازله نفسي عنهم و بقرف كمان انام ورا حد او المخده اللي حد لمسها او نام عليها و لما حد يكون جمبي و احس بنفسه كدا او الهوا بقرف و بشمئز اويي.
و انا بقول الامثله دي بس عشان يبان حجم الموضوع وصل لفين و طبعا في كتير امثله من كدا بس انا مش عايزه اطول
و اخيرا انا شايفه انو الموضوع دا صح بنسبة ٧٠% ف هوا عادي بس بياذيني ساعات و عدم تفهم الناس و تقديرهم بيضايقني اكتر و دا المفروض يبقي صح و الناس متعملش كدا انا بجد بستغرب لما الاقي ناس عادي بتشرب من ورا بعض و هكذا ازاااي و ليه انا لو بموت من العطش مستحيل اعملها ف لي الناس متبطلش العادات السيئه دي هوا اه انا مزوداها بس ع الاقل دا صح لي بقا اطلع انا اللي غلط ف الاخر و موسوسه و حساسه بزياده لييه 😓😓
محتاجة تروحي علاج نفسي قبل ما الموضوع يقلب مرضي ويبقى مش نضافة بس لكن وسواس قهري
تم النشر الاثنين، ٦ أبريل ٢٠٢٦
اول حل ممكن تحتاجي علاج نفسي فترة بس نتكلم مع دكتور تاني حل ده بيكون شكل من أشكال القلق مع مبالغة في النضافة و القرفة تالت حل انشغلي خااالص عن الفكرة و اشغلي وقتك بالتدريج هتروح رابع حل و ده مقرف شوية بس جربته مش كل حاجة عشان تضمني النضافة تعمليها . سيبي نفسك تقرفي شوية عادي و اعنلي حاجات ما ترضيكيش في موضوع النضافة و الحذر شوية علي شوية هتهدي و تتقبلي . خامسا علاج سلوكي معرفي . و ادعي الله قبل أي شيء
تم النشر الأحد، ٥ أبريل ٢٠٢٦
وعليكم السلام ورحمة الله وبركاته يا حبيبتي 😊 أول حاجة، أنا فاهمة تمامًا إحساسك بالإحباط والضيق ده، ومش غلطتك خالص. اللي بتصفيه ده يشبه "الوسواس القهري" (OCD) اللي بيخلي الدماغ يركز على النظافة بشكل مفرط، وده شائع جدًا عند البنات في سنك، ومش معناه إنك "موسوسة" أو حساسة زيادة، ده اضطراب نفسي بيحتاج تدخل صح. حلول عملية خطوة بخطوة عشان تبدئي تتحكمي فيه: اعترفي إنه وسواس : قولي لنفسك "ده دماغي بيضخم الخطر، مش حقيقة 100%". كل يوم اكتبي 3 أمثلة إيجابية عن يومك بدون مشاكل (زي "شربت ميه عادي وما حصلش حاجة"). تحدي تدريجي صغير : ابدئي بـ"تعرض" بسيط، زي اجلسي على كرسي بعد أخوكي بـ5 دقايق بس، ولاحظي إن مفيش خطر حقيقي. زدي الوقت يوميًا. ده بيقلل قوة الوسواس مع الوقت. روتين نظافة ذكي : حددي أوقات غسل يديكِ ومسح الأسطح مرة واحدة يوميًا، مش كل شوية. استخدمي منظفات آمنة وارتدي قفازات لو عايزة في البداية. دعم روحي إسلامي : صلي النوافل، اقرئي سورة الإخلاص والفلق والناس 3 مرات يوميًا، وادعي الله يريح قلبك. تذكري قوله تعالى: "أَلاَ بِذِكْرِ اللّهِ تَطْمَئِنُّ الْقُلُوبُ". ابحثي في Fedni عن أسئلة مشابهة عن "وسواس نظافة" هتلاقي إجابات كتير تساعدك، أو روحي صفحة الخبراء https://www.fedni.net/experts وابحثي عن متخصص نفسي أو معالج وسواس – هما هيقدموا استشارة خاصة بيكِ. أنتِ قوية وقادرة تتغلبي عليه، خطوة صغيرة كل يوم هتفرق. لو عايزة تحكي أكتر، أنا هنا 💕. الله يفرج همكِ يا رب.
تم النشر السبت، ٤ أبريل ٢٠٢٦
بصى هو فكرتك اه صحيحة وممكن اه توصل ل نسبة ٧٠ % فى المايه بس انتى انتى اللى عندك دا واللى بتعمليه مش صح غلط جدا أنا ل وهلة كدا افتكرتك مجال طبى بس افتكرت انك ١٦ سنة لأن احنا ساعات بيجيلنا الوساوس ديه من طبيعة ان احنا دارسين الجراثيم والبكتريا بس معظمنا بيتعامل عادى خلينا فيكى انتى دلوقتى اللى انتى فيه دا غلط جدا ومجهد أووى ليكى ولازم يتم التعامل مع دا بدرى علشان متتعبيش بعدين لأنك كدا دايما فى حالة خوف أو اشمئزاز أو توتر كلها حالات مجهدة ليكى ف حرام يعنى اللى انتى فيه دا ف لازم تغيرى من نفسك شوية ازاى بقى ؟ ..... أول حاجة هتحاربى عقلك وتحاولى متستجيبيش ليه لما تتعرضى لحاجه من الوساوس ديه احنا هنا هنحاول نغير فى رد فعلك انتى مش ل تعرضك للشئ بل هنحاول نغير استجابتك للى بيجى فى عقلك وبعدين هنلعب على التدرج فى رد الفعل يعنى مثلا لو انتى بتغسلى ايدك بمجرد ما تمسكى أى حاجة حرفيا هنحاول نخليها مرا اه ومرا لا ومش لازم رد فعلك يكون على طول قاومى وحاولى تتأخرى شويه وبعدين حضرتك متقنعيش نفسك انى لو سلمت على كذا الجراثيم ديه هتموتنى ولو كلت معاهم البكتريا هتقتلنى البكتيريا والجراثيم موجودة في كل حتة حوالينا حرفيا حتى فى الهواء اللى بتتنفسيه وجسمك يمتلك جهاز مناعة قويا صمم خصيصا للتعامل معها. النظافة الزائدة أحياناً تضعف المناعة ولا تقويها أصلا
تم النشر السبت، ٤ أبريل ٢٠٢٦
العفو 🤍
تم النشر الأحد، ٥ أبريل ٢٠٢٦
تمام..شكرا جدا لحضراتكم
تم النشر الأحد، ٥ أبريل ٢٠٢٦
اه انتى شايفه ان اللى بتعمليه صح تمام والله بس المشكلة اللى أنا قولتهالك فوق وانتى أكدتى عليها هى الإجهاد اللى انتى فيه بسبب الأفكار ديه والوساوس ديه أيا كان انتى صح أو غلط مش موضوعنا دلوقتى بس الإجهاد دا مع الوقت هيكبر وهيسببلك مشاكل مستقبلا فاهمانى لأنك هتضطرى تروحى جامعة مثلا وهتتعاملى أكتر مع العالم الخارجى فلازم تتغلبى على دا دلوقتى وتتعاملى معاه علشان متتعبيش بعدين + زعلك على إن الناس مش بتحترم خصوصيتك ليه ويقدروا دا ف الكلام دا مش هيحصل لأنك للأسف فى مصر ودية عادة مجتمعنا للأسف
تم النشر الأحد، ٥ أبريل ٢٠٢٦
بالنسبة لكلام الناس اللي حواليكي اللي مآثر عليكي دا فدا عادي جدا طبيعي الناس لما تشوف شخص بيبان عليه أعراض وساوس بينكرو عليه و يضايقو بدل ما يساندو فانتي حاولي مش تبيني لهم الأعراض دا بقدر الإمكان تظاهري كانك عادي خالص عشان زاي ما بتقولي هيعملو اللي بيستفزك اكتر و يزودو عليكي الله يعافيكي و يهون عليكي
تم النشر السبت، ٤ أبريل ٢٠٢٦
اللي بتعمليه دا مش غلط فعلا بس هل انتي بتنظفي كل الحاجات اللي تخصك عشان بتحبي النظافة فعلا احب اقولك لا انت بتنظفي عشان تتجنبي مخاطر التلوث عشان عقلك بصي اقولك كام نقطة و حاولي تطبقيهم بأمر الله اولى حاجه التعرض و منع الاستجابة قاعدة العشر دقائق يعني حاولي تاخري الاستجابة عشر دقائق مثلا شايفه أن الكوباية عايزه تتغسل اهدي شوية و مش تقومي تغسليها علطول بحيث تدي اشارة للتفكير دا أن الشعور هيقل تلقيء و مش هيحصل حاجه لو اتاخرت شوية عادي تاني حاجه الاحتمالات قولي لنفسك هو اي اصعب حاجه ممكن تحصلي لو مغسلتش الكوباية هتلاقيه حاجه مش خطر اووي يعني حتى لو عقلك طلعلك أن النتيجة خطر لو فكرتي كويس هتلاقيها مش هتحصل اصلا في الواقع تالت حاجه الجيد يكفي يعني نظفي بنسبة 80٪ و متزوديش عن كدا و خديها تدريجي يعني النسبة تقل كل شهر
تم النشر السبت، ٤ أبريل ٢٠٢٦
بس مش بقدر و جربت كتير و انا شايفه انو اللي انا بعمله اغلبه صح و المفروض يبقي طبيعي عند اغلب الناس ف انا شايفه اني عادي شويه بس المشكله ف الناس حتي مش بتحترم خصوصيه الواحد او انو كل حد ليه حاجه خاصه ف ليه ميحترموش دا و انا بجد بحب النظافه جدااا بمعني الكلمه ف مش شايفه انو اللي بعمله غلط اويي و لكن مشكلتي ف الاجهاد اللي بيسببه ليا 😣
تم النشر السبت، ٤ أبريل ٢٠٢٦
بصي . انا كنت زيك بالظبببببط و خفيت تماما اللهم لك الحمد .
تم النشر الأحد، ٥ أبريل ٢٠٢٦
لعرض السؤال في فدني اضغط هنا