انا لو داخل البرنامج دا فأنا داخله عشان عايز اتكلم بجد
انا كان معايا صحاب كتير جدا فجأة اكتشفت اني انا اللي مصحبهم مش هما الي مصاحبني اكيد في ناس ممكن تفهم الشعور دا ان انت تيجي في يوم من الايام تلقى نفسك فجأة الناس اللي انت كنت بتفضلهم على نفسك مع أول غلطه باعوك وبعدوا عنك
انا مش شخص وحش قوي على فكره ولا حلو قوي بس كل اللي بعمله اني بتعامل مع الناس بطيبة نيه دا حتى مع أي بنت كنت بحبها كنت دايما في الاخر باخد الخازوق او ببقى كوبري عشان توصل لغيري
مشكلتي اني بحب بجد يعني بوصل مشاعري كلها للبنت و ببقى دايما عبيط في الاخر و بفضل لوحدي كالعاده انا بس كل الي عايز اعرفه ليه دا بيحصل ؟.
هو انا وحش طب شخص مش كويس مثلا طب انا مشكلتي ايه
كمان عمري ما كرهت حد او زعلت من حد و دا مش ضعف شخصيه بس دي الشخصيه بتاعتي بس انا بجد قبلت ناس خلوني مبقتش عارف أتعامل ازي مع الناس لدرجة اني بقيت بشك في شكلي افضل اقول دا انا تخين وشكلي مش حلو و حتى في شخصيتي أفضلِ اقول هو أنا عبيط اوي كدا و بحس اني كل مره برجع لنقطة الصفر تاني.........
السلام عليكم و رحمة الله و بركاته المشكلة مش فيك أنتَ ، بل في البيئة اللي وضعت نفسك فيها ظناً منك إن كل الناس ذي الفئة اللي عرفتها.. طب إيه الحل؟ الحل إنك تبدأ تبحث عن صُحبة صالحة تعينك ، تقدر تلاقيهم لو التزمت بالنزول للمسجد للصلاة أو حضرت دروس دين ، هتلاقي الناس اللي شبهك و اللي هتعينك و يشدوك للصح.. في فترة من فترات حياتي كنت زيك ، كان كتير أوي يبعد من مشاكل بسيطة.. عدى الوقت و عرفت ربنا بعدهم عني ليه.. طريقنا كان مختلف من البداية ، هم حابين طريق غير طريق ربنا ، هداهم الله.. ، و أنا عايزه اتحسن و أرضي ربنا.. مع الوقت حاولت أحسِّن المشاكل الي بيننا و بعدت بالذوق بعدها و العلاقة بيننا بقت سطحية جداً و ده فعلاً اللي لقيته صح لقوله تعالى [وَاصْبِرْ عَلَىٰ مَا يَقُولُونَ وَاهْجُرْهُمْ هَجْرًا جَمِيلًا ] أتعرفت بعدها على الصُحبة الصالحة من دروس دينية حضرتها و الحمد لله ، عرفت إن المشكلة مكنتش فيا ولا فيهم بل من البداية إحنا مش متفقين لا في الرغبات ولا في الشخصية.. قال تعالى [ وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ]. أنتَ معتقد إن بعدهم عنك وحش ، لإنك متعرفش حكمة ربنا ، هتدرك سبب بُعدهم عنك في الوقت اللي ربنا شايفه مناسب. بس ليه تستنى تحسن من نفسك لما يبان السبب؟ طب متتوكل و أبحث عن الطريق الصح و ثق في حكمة الله و ثق إن رغبته هي الخير.. في حاجات في كلامك من الصح إنها تحصل بس أنتَ مش شايف ده.. إنك تكلم بنت و في الأخر الخازوق ييجي منها هي و تبعد ، ده الحمدلله إن حصل كدا و بيحصل كدا.. ربنا بيبعد عنك الحاجات اللي هتوقعك ، لو كنت ارتبطت و كان في حُب متبادل كنت هتتعلق و كانت هي هتتعلق ، كنتوا هتدخلوا في علاقة تغضب ربنا ملهاش آخر.. لو قرأت اكتر عن المشاكل اللي هنا هتلاقي أغلبها بتحصل بسبب تعلق شخص بواحده او العكس ،و مش عارفين يطلعوا من العلاقة و أثرت فيهم بشكل سلبي جداا... مُدركة إنك بتعمل كدا عشان حابب تلاقي شخص يحبك و يعاملك بنفس طريقتك ، بس الحقيقة إن الطريقة دي مش هتستفاد منها غير إستنفاذ مشاعرك في مكان غلط.. متستناش تلاقي اللي يحبك و أنتَ شخصياً مش عارف تحب نفسك و تثق فيها.. صلَّح ثقتك بنفسك أولاً ،لإن صعب ترتاح و أنتَ كل حياتك بتجلد في ذاتك و بتكرهها . خليك فاهم ،عمرها مكانت بالشكل، بل بالجوهر .. الناس الي اسمهم مُخلد في التاريخ منجحتش بسبب شكلها.. بل نجحت بسبب ثقتها في نفسها و محاولة تحسينها للوصول للنجاح.. في حكمة بتقول ليس المهم أن تكون جميل المظهر، المهم أن تكون جميل القلب والخلق، فالجمال يزول وتبقى الأخلاق ،، و قال رسول الله ﷺ "إِنَّ مِنْ أَحَبِّكُمْ إِلَيَّ وَأَقْرَبِكُمْ مِنِّي مَجْلِسًا يَوْمَ الْقِيَامَةِ أَحَاسِنَكُمْ أَخْلَاقًا" النبي ﷺ مقالش اقربكم احسنكم شكلاً ، بل قال أخلاقاً أنتَ متخيل إن بحسن الخُلق تبقا أقرب من الرسول ﷺ منزلة يوم القيامة!! الواحد ميتمناش اكتر من كدا.. و قال أيضاً ﷺ «إِنَّ الْمُؤْمِنَ لَيُدْرِكُ بِحُسْنِ خُلُقِهِ دَرَجَةَ الصَّائِمِ الْقَائِمِ» «مَا مِنْ شَيْءٍ أَثْقَلُ فِي الْمِيزَانِ مِنْ حُسْنِ الْخُلُقِ» كل الجزاء العظيم ده و مدايق من نفسك و مش واثق فيها !! الحمد لله الذي رزقك حسن الخلق عن حسن المظهر.. ابدأ بتحسين ثقتك بنفسك ، و أطلب العون من ربنا و أبحث عن صُحبة صالحة تساعدك ، و بالتوفيق ليك يا بطل في رحتلك!
تم النشر الأربعاء، ٢٤ ديسمبر ٢٠٢٥
اولا الناس اللي كنت تعرفهم دول مش صحاب دول كانوا معارف فقط وطلعوا مش كويسين فأنت تبعد عنهم وتحمد ربنا انك مش زيهم وانك عندك اخلاق وبتخاف على مشاعر الناس والصحاب الحقيقين بيشدوك لفوق وبيشجعوا ويخلوك واثق في نفسك فدول مش صحبة صالحة وبالنسبة لموضوع البنات بص هو اصلا فكرة انك تصاحب بنات هي حرام شرعا فممكن ربنا مش يسرلك الدنيا فيها عشان انت كويس ومتقعش في الذنب ده لو شفت الدنيا من نظرة مختلفة هتلاقي انك طالع كسبان مش خسران ربنا بعد عنك ناس مش كويسين عشان بيحبك وان شاء الله ربنا يرزقك بالصحبة الصالحة اللي تعينك على طاعة ربنا
تم النشر الثلاثاء، ٢٣ ديسمبر ٢٠٢٥
أول حاجة أقولك إني فاهمة شعورك تمامًا ده، وده مش ضعف خالص، ده دليل على قلب طيب زي اللي ربنا خلقه فيك. أنت مش وحش ولا شخص مش كويس، بالعكس، طيبتك دي نعمة، بس المشكلة إنك بتعطي كل حاجة من غير حدود، فبتجذب ناس مش قد طيبتك. زي ما قال الرسول ﷺ: "المرء على دين خليله، فلينظر أحدكم من يصاحب" – يعني اختر صحابك بحكمة، مش أي حد. ليه بيحصل كده؟ أنت بتحب بجد وبتعبر عن مشاعرك كلها من الأول، فالبنات (أو الصحاب) بيحسوا إنك "مضمون"، ويستغلوك كـ"كوبري" زي ما قلت. ده مش عيبك، بس الناس كتير بتدور اللي يديلهم كل حاجة ببلاش. اللي باعوك دول مش أصدقاء حقيقيين، هما كانوا "صحاب ظرف"، مش صاحبهم بجد. إيه الحل العملي عشان تطلع من الدورة دي؟ حدد حدودك : المرة الجاية، خليك هادي شوية في التعبير عن المشاعر. (وتذكر، الحب الحقيقي في الإسلام يكون في إطار الزواج، مش علاقات عابرة). ركز على نفسك : ابدأ تمارين يومية صغيرة لبناء الثقة – زي كتابة 3 حاجات حلوة فيك كل يوم (طيبتك، صبرك، إلخ). واشتغل على شكلك لو عايز (رياضة، لبس نضيف)، بس عشان نفسك مش عشان الناس. اختبر الصحاب : شوف مين اللي بيبادلك الاهتمام فعلاً، مش بس ياخد. لو باعوك مرة، سيبهم ومش هترجع تشك في نفسك. أنت مش عبيط، أنت قوي وقلبك ده هيجيب لك ناس أحسن إن شاء الله. متقلقش، اللي فات درس، والجاي أحلى. لو عايز تتكلم أكتر أو تحتاج استشارة متخصص، روح على صفحة الخبراء في فدني: https://www.fedni.net/experts – هتلاقي خبراء في علم النفس والتطوير الذاتي. وابحث في فدني عن أسئلة مشابهة زي "كيف أختار أصدقاء حقيقيين" هتلاقي إجابات كتير مفيدة. قوم يا بطل، أنت تستاهل الأفضل! 💪❤️
تم النشر الثلاثاء، ٢٣ ديسمبر ٢٠٢٥
لوحدك احسن بكتير🥺
تم النشر الثلاثاء، ٢٣ ديسمبر ٢٠٢٥
ده طبع في اي بنادم مهما تصاحب هيحصلك نفس الي حصل انت تعمل اي تعتمد علي نفسك لتعود تكون بطولك تفكر صح تتمرن تدرس تخلي الي كرهك عاوز يكلمك و وقتها مش تخلي حد مهم بالنسبه ليك
تم النشر الثلاثاء، ٢٣ ديسمبر ٢٠٢٥
لعرض السؤال في فدني اضغط هنا