هحكيلك قصتي هي طويلة شوية بس انا كنت في مكانك قبل كدا وحاسة مشاعرك أوي بجد أنا كنت ثانوية عامة دفعة ٢٠٢٤ كنت شاطرة جدا بشهادة مدرسيني كلهم الامتحانات اخر السنة حليت حلو جداا وكنت طالعة من أغلب الامتحانات مبسوطة وراجعت مع المدرسين ومن نماذج كتير جدا اجابات مدرسين وكنت حسبت مع الاختلافات انه هجيب فوق ال ٩٠ ولو اتظلمت اوي مش هقل عن ٨٠ خالص وانا اساسا كنت عاوزة كلية علوم مش طامعة في حاجة كبيرة وكانت الحياة وردي ومستنية النتيجة لحد ما اتصدمت ب ٦٤% واتسربت نماذج الوزارة وراجعت منها لقيتني كنت اجيب اصلا ٩١ طبعا عرفت اللي فيها " تبديل ورق اجابات " وحل التبديل دا قضية سنتين ويا تكسب يا تفشل فإستعوضت ربنا وسكتت وقولت همشي زي ما تيجي بقى وكنت شايفة الحياة بنظرة انه خلاص يعني هدخل ايه يعني بالمجموع دا اساسا اتقال لي يوم النتيجة على كلية تربية طفولة مبكرة وانه فيها اقسام حلوة وفي اقسام ذوي احتياجات خاصة فمش عاوزة تدريس فقولت خلاص هدخل تربية خاصة لما بدأت الصدمة تروح شوية ولقيت طريق أدرس بيها حاجة بحبها بس كلها كانت متقفلة كنت هدخل علوم خاص والموضوع باظ واتقفل عرفت انه ينفع ادخل تربية كمستري ك قسم كرديت او ادخل بايو كيمستري في زراعة كرديت وصحيت تاني يوم لقيت التحويل اتقفل خلاص مش هعرف احول فهمت وقتها إنه خلاص الطرقة متقفلة ف نصيبي المكان دا ودخلت فعلا ونزلت من سنة أولى مركز صاحبة والدتي دخلت تخاطب ومكنتش حباه خاالص بس كنت بنزل ومكمله ع اساس مفيش غيره لحد ما دخلت جلسة تكامل حسي وحبيته جداا بس معرفتش ادخل تاني وقعدت ادور ع كورسات تكامل حسي اخدها مكنتش لاقيه غير في القاهرة وصعب عليا اروح القاهرة علشان بعيدة لحد ما صاحبة المركز اللي بتدرب فيه كلمت ماما انه في كورس تكامل حسي ولو انا عاوزة اخده وفي اسكندرية مسألتش انا مين اللي بيديه ولا أي تفاصيل واتبسطت اني لقيت اصلا وروحت الانترفيو وطلعت اللي بتدي الكورس واحدة من أشهر المتخصصين في التكامل الحسي في مصر وأخدت الكورس وإتدربت بيه بقالي سنة وكان اي حد يكلمني ع هشتغل امتى اقول مش هينفع اشتغل وانا طالبة لسه ومحدش هيشغل طالبة واتيسرت لي فرصة شغل في مركز علاج طبيعي واقفت عليها وانا عارفة ان صاحب المكان مش هيوافق علشان طالبة ومستنية الرفض بقى بس هو وافق اني انزل عندهم وكرم ربنا وتيسيره مكنش بس هنا كان في كل حاجة بجد وانا في مكان مش عارفة اتصرف فيه كان يوقفلي ناس تساعدني لما وفقني في كليتي لما أخد حاجات وعوضني بحاجات تانية الحياة موقفتش ع ثانوية عامة وأنا مكدبش عليكي لو كنت جبت ١% زيادة كنت هدخل من غير ما أفكر زراعة مثلا وسبحان الله النتيجة جاية بالضبط علشان توصلني للكلية اللي دخلتها وتدخلي المجال اللي انا دخلته ويمكن ربنا يجعلني سبب من اسباب علاج ومساعدة اطفال كتير إنهم يعيشوا بشكل طبيعي أو شبه طبيعي ودا كان حلمي بردو كنت طول السنة بدعي بمجموع معين والكلية اللي نفسي فيها لحد يوم عرفة مدعتش الدعوة اللي اتعودت عليها ودعيت يارب المكان اللي ليا فيه خير وهتستخدمني فيه لمساعدة الناس يسر لي الأسباب اللي توديني عنده وربنا استجاب الدعوة دي والنتيجة كانت سبب اه ابتلاء صعب اوي اوي ومكدبش لحد دلوقتي مش قادرة اتخطاها واتخطى اني اتظلمت بس ربنا كريم أوي بجد وهتفهميني قدام بس اهم نصيحة متقفيش تعيطي جمب اللي راح عيطي اه بس متقفيش 😂 حاولي واسعي المكان الجديد أيا كان انك تقفي فيه وتحاولي وتسعي انك تتعلمي وتتقي ربنا فيه وإننا بناخد أجر السعي حتى لو النتيجة مش ع هوانا وان اي مجال هو مجال مهم ومفيد واهم حاجة فيه اننا نسعى وبس
الناس اللي بتحبك هتبقى فخورة بيكي لما تلاقيكي بتلاقي فرص وبتتعبي في المجال اللي ليكي نصيب فيه، اللي فات فات حتى لو قصرتي الوقت عدا خلاص ومعانا فرصة جديدة وبداية جديدة نفضل نبكي ع اللبن المسكوب ونوقف حياتنا؟ اصل الحياة مبتقفش فلو قررتي تقفي تجلدي ذاتك على الماضي هتضيعي اللي تقدري تعمليه في الحاضر بالتالي هتلاقي نفسك عند نفس النقطة في المستقبل سامحي نفسك وصدقيني النظرة الطبقية بتاعة كليات القمة والقاع حتى لو بنقول مش مقتنعين بيها هتكتشفي انك مقتنعة بيها من جواكي ولما تدخل كليتك ايا كانت وتقرري تسعي فيها هتكتشفي قد إيه هي مكان مهم ومحتاج ناس شاطرة فيه علشان تنفع بيه الناس قرري تعوضي اللي راح لان دا اللي في ايديك واللي تقدري تعمليه واهلك والناس اللي بتحبك بجد هيفرحوا لما يلاقوكي عايشة مبسوطة ومرتاحة واللي شمتان يولع بقى كدا كدا هيدور ع حد جديد يحطه ف دماغه وربنا يسهل له ويعينه ع نفسه وشيليهم من بالك وحسباتك علشان لو انتي بجناحات قدامهم هيدوروا ع عيب بردو ف بجد فكك واسعي وركزي ع نفسك وبس انتي عاوزة ايه
تم النشر الثلاثاء، ١٥ سبتمبر ٢٠٢٦
بس انا لسه مش عارفه أتخطى انا اه معيتش زي ما الناس عملت بس جوايا بهرب من اي شعور لكن بردوا مش عارفه اتخطي كانت سنة طويلة اوي و صعبه و حصل فيها حجات كتير و عارفه قصرت فيها بس شعور صعب السنة اللي كنت متحمسة ليها و بحاول اصلا اوصل لها رغم أنه كله تقريبا قال مش هتفلحي فيها و صعبه عليكي و بلاش و انا قلت لا بس عدت السنة و اثبت كلامهم و محققتش اي حاجه ولا حتى ذكريات ما علينا من اي حاجه ف السنة بس كسرة الناس اللي بيحبوني و شماتة الغير دي حاجه وحشه اوي
تم النشر الثلاثاء، ١٥ سبتمبر ٢٠٢٦
يارب ♥️
تم النشر الأحد، ١٣ سبتمبر ٢٠٢٦
تسلميلي جدا والله ربنا يرزقنا التوفيق والرضا كلنا ياارب ❤️❤️
تم النشر الأحد، ١٣ سبتمبر ٢٠٢٦
قصتك مُلهمه جدا بصراحه مبسوطة ليكي جدا على الرغم من الظلم اللى حصلك بس ربنا اختارلك الخير ليكي دايما بقولها لو محققتش اللى بتمناه يبقي ربنا اختارلي الأحسن فى مكان تانى حتي لو مكنتش راضيه فى الاول بس عارفه اني هفهم حكمته فى وقتٍ ما .ربنا يوفقك ويكرمك .
تم النشر السبت، ١٢ سبتمبر ٢٠٢٦
لعرض الإجابة في فدني اضغط هنا