السلام عليكم
انا طالبه في الصف الثالث الثانوي وكلنا عارفين صعوبه المنهج وبنحاول نبذل أكبر طاقه بحاول واتمني حد يساعدي او يرشح ليا ابدأ ازاي في الفيزياء وامشي في المنهج ازاي عشان حاسه ان مش عارفه احل ولا عارفه اي حاجه من اللي درستها قبل كدا أتمنى حد يساعدني
وشكرا
السلام عليكم، أنصحك تسمعي الأول لشرح أكثر من مدرس على يوتيوب عشان تحددي بتفهمي من مين أكتر، ساعات كتير المواد بتكون سهلة لكن شرحها هو المشكلة، إما المدرس معندوش إمكانية إيصال المعلومات أو طريقته تناسب طالب وطالب تاني لأ. حددتِ خلاص المدرس، رتبي جدولك وقسمي الوقت والدروس. اقرأي الدرس بنفسك أول مرة وشوفي استيعابك له وفهمتِ قد إيه، ده هيخلي عندك فكرة قبل الشرح وكمان هتنتبهي للنقط الصعبة أو المهمة أثناء شرح المدرس. سجلي ملاحظات، ممكن تسمعي الفيديو أول مرة من غير ما تسجلي وتاني مرة تكون بتركيز أكبر وبتسجيل ملاحظات. بعد كده اقفلي وابعدي شوية عن المكتب وارجعي فرغي المعلومات اللي فهمتِها. فيه طبعا قوانين لازم تتحفظ، سجليها في ورقة منفصلة وعلقيها قُدامك ويُفضل تراجعيها يوميًا أو يوم ويوم... المراجعة بتثبت المعلومات وبتنقلها من الذاكرة قصيرة المدى إلى الذاكرة طويلة المدى. مهم جدًا جدًا، حل الأسئلة بعد كل درس، الفيزياء والرياضيات محتاجين حل أسئلة ومسائل كتير. راجعي باستمرار، ابعدي عن التوتر، متفكريش في الفيزياء إنها بعبع وأصعب مادة عشان ده هيشكل عندك حاجز نفسي... ممكن المادة والمعلومات تكون سهلة جدًا لكن الحاجز النفسي هيخليكِ تحسي إنها أصعب حاجة في الكون. أرجو أكون أفدتك، وبالتوفيق إن شاء الله.
تم النشر الأربعاء، ٢٤ سبتمبر ٢٠٢٥
و عليكم السلام و رحمه الله و بركاته انا طالبه زيك في تالته ثانوي ، بصي أنتِ محتاجه الأول تحددي بتفهمي من انهي شرح و أنهي طريقه ، بمعنى إنك لو بتحبي تنزلي سنتر فجربي مدرسين كتير سنتر احنا لسه ف اول السنه و لو بتفهمي اونلاين ف جربي كذا مستر اونلاين لو حابه ارشحلك اونلاين أعرف كذا مستر بعدها الطريقه الي تحفه في مذاكره الفيزيا هي إنك بعد متشوفي المحاضره تكتبي كل الِ فهمتيه منغير متشوفي الكتاب ، هتعرفي ساعتها ايه الجزء الي واقع منك و ترجعي تشوفيه تاني في الفيديو ، لحد متتأكدي إنك قدرتي تكتبي كل الي فهمتيه ف الدرس مفيش حاجه بتثبت المعلومه غير الحل حلي كتير مخك هيتعود على أفكار المسائل و مع الوقت هتلاقيها سهله ، و مش أنتِ بس الي مستصعبه منهج الفيزيا كلنا كدا لإن السنادي منهج الفيزيا مبيعتمدش على أي حاجه من السنين الي فاتت و مش تراكمي ، ف لذلك كلنا مستغربين المنهج بس المدرسين كلهم أجمعوا على إن ده شيئ طبيعي في أول السنه و إن مع الوقت هنتعود و نقدر نحل كويس، أدعي ربنا إن يرزقك الفهم و إن شاء الله الفيزيا هتبقا سهله معاكي، و بالتوفيق
تم النشر الخميس، ٢٥ سبتمبر ٢٠٢٥
وعليكُم السَّلام ورحمةُ اللَّهِ وبركاتُه انتِي هتسمعي الشرح ممكن ارشح ليكِي مثلا قناة المهندس فِي الفزيا تدخلي القناة بتاعته وتجيبي اول درس فِزيا لـ دُفعة السنة دي وتسمعيه هو شرحه كويس وان شاء الله هتفهمي الفزيا كويس،بعد ما تسمعي الشرح وتتحفظي القوانين طبقي هاتي كتاب الإمتحان التدريبات وحِلّي على اللي أخدتيه وقفت معاكي أسئلة عادي جدا افتحي علىٰ اليوتيوب حل كتاب الفزيا الدرس كذه وتخشي الفديو تجيبي السؤال اللي اتلغبطي فيه ليه وهكذا وكل غلطه عادي متزعليش انتي لسه فِ البداية،افهمي الفكرة فِ إيه وهتلاقي نفسك تمام إن شاء الله وبالتوفيق .
تم النشر الأربعاء، ٢٤ سبتمبر ٢٠٢٥
وعليكم السلام ورحمة الله يا غالية، أولاً أقول لكِ: أنتِ مش لوحدك، كثير من طالبات الصف الثالث الثانوي بيحسوا بنفس الإحساس تجاه الفيزياء، خصوصاً بسبب كثرة التفاصيل والصيغ. لكن بوجود خطة واضحة وتركيز، بإذن الله تقدرِ تحققي نتيجة ممتازة. إليكِ خطوات عملية تساعدك تبدأي مذاكرة مادة الفيزياء بثقة وتنظيم: ابدئي بخطة واضحة: حددي كمية المادة اللي تقدري تذاكريها يومياً، مش لازم تجهدِ نفسكِ بكم هائل مرة واحدة. خلي عندك جدول بسيط تزمني نفسك عليه، مثلاً تذاكري 2-3 دروس في الأسبوع مع تركيز على كل درس. افهمي المفاهيم قبل الحفظ: الفيزياء تعتمد على الفهم أكثر من الحفظ. لما تقري الدرس، حاولِ ترجعي للشرح سواء في الكتب أو فيديوهات شرح مبسطة، وركزي على الفكرة الأساسية لكل موضوع. داومي على توضيح أي نقطة مش واضحة لكِ، سواء بالقراءة أو بمشاهدة الشرح. استخدمي التمارين العملية: بعد فهم الدرس، حاولي تحلي عدد من الأسئلة والتمارين على نفس الموضوع. ابدأي بالأسئلة السهلة وتدرجِي في الصعوبة. التمارين مهمة جداً لأنها تخليك تفهمي طريقة تطبيق النظريات. راجعي النقاط المهمة: اجمعي لكِ ملخص صغير أو خرائط ذهنية لأهم القوانين والنظريات. شوفي إذا في نماذج امتحانات سابقة واشتغلي عليها، علشان تعودي نفسكِ على شكل الأسئلة وكيفية الحل. لا تترددي في طلب المساعدة: لو موضوع معين معقد، ممكن تستعيني بمعلم خصوصي أو تتابعي دروس أونلاين. وممكن زيارة صفحة الخبراء على فدني تلاقي من يقدم لكِ استشارات في تعليم الفيزياء. حافظي على هدوئكِ وإنضباطك: حاولي تقسمي وقتكِ بين دراسة المادة والراحة. اتذكري أن التفوق هو رحلة قصيرة متطلبة جهد يومي وليس ضغط مستمر. وأخيراً، ذكري نفسك دائماً أن الله سبحانه وتعالى مع الصابرين والمجتهدين، فكوني على ثقة أن الله سيسهل دربكِ إن شاء الله. إذا تحبي، ممكن أساعدك أعمل لك خطة مذاكرة مفصلة أكثر أو أرشح لكِ مصادر تعليمية مناسبة، فقط أخبريني. ولا تنسي، يمكنكِ دائماً تصفح قسم الفيزياء في فدني لأسئلة وأجوبة الطلاب الآخرين، والاستفادة من تجاربهم. أنا هنا لأي سؤال إضافي، وموفقة جداً إن شاء الله يا ذكية! 😊🌷
تم النشر الخميس، ١٨ سبتمبر ٢٠٢٥
لعرض السؤال في فدني اضغط هنا