دلوقتي انا لسه ٣ اعدادي حبيت واحد معايا ف الدرس وهو كان لسه جديد حتى معرفش عنو اي حاجة غير اسمو بس حبيتو اوي واللي خلاني احس اني حبيتو اوي اني عيطت عليه عشان مكنتش اعرف هو بيحبني ولا لا فعيطت وكل يوم كنت بعيط عشان بحبه وخايفه ميحبنيش كنت ف كل صلاه ادعي ربنا انو يطلع بيحبني وفضلت ادعي كده ٥ شهور ومحدش يقولي حب مراهقه عشان أنا عمري ما حبيت حد كده لدرجه اني اعيط عليه اصلا ولا عمري فكرت اني ممكن احب واحد اصلا كان اهم حاجه عندي تعليمي ومكنتش بفكر ف الحب اساسا .....
المهم لقيت مكتوب ع الحيطه اللي تحت بيتو انو بيحبني وكده فرحت جدا بس هو كان كاتب اسمو من غير اسم الاب ف اسمو متكرر عندنا ف الدفعه فمكنتش اعرف مين المقصود ف كتبتلو منه مين اللي انت تقصدها واسمك عبدالرحمن ايه ولو بتحبها أدخل اعترف لها يمكن تكون بتحبك
وكان عندي امل مش طبيعي انو هيدخل يعترفلي ف اجازه نص السنه وفعلا دخل اعترف لي وانا كمان اعترفتلو بس قولتلو مش هنتكلم عشان مبكلمش ولاد قالي انا عارف وقولتلو ان اهلي شداد وبيفتشو ف فوني فمش هينفع قالي مش عايز يحصلك مشاكل اكيد بس انا عايز اطمن عليكي كل شويه قولتلو تمام بقينا نطمن ع بعض كل فتره ومكنتش حطاه ف لوك شات او اي حاجه
بعد كده بقينا نتكلم كل يوم فأصبح جزء من يومي واتعودت علي وجوده وبصراحه هو كان اكتر حد بيطمني واكتر حد بعرف اتكلم معاه براحتي وبيفهمني ف كنت بحبه كل يوم اكتر م اليوم اللي قبله لحد ما اتقفشت وامي منعتني انزل دروس يومين وقعدت اعيط واقولها نزليني وكده ونزلتني فعلا بس ف اليومين دول لما عرفت كانت عايزه تروح الدرس تضربه ف انا حطيت اكونت الفيس ع تاب اخويا وكلمتو وقولتلو كل حاجه فقالي انو لما قرأ الرسايل ادايق وكده واخوه الكبير دخل عليه وقعد يقولو مالك وكده لحد ما عبدالرحمن حكالو واخوه الكبير كلم ماما واعتذر لها وبعدها فضلنا نتكلم ع التاب كده لمده شهر واتقفشت تاني
وهو المره التانيه كلم امي بنفسو وقالها انا بحبها ماما ف الاول كانت متعصبه منو واتعصبت عليه وشتمتو بعدها قالها كلام معرفش اي هو مرضيتش تقولي بس هديت من نحيتو وشافتو راجل اللي اعرفو انو قالها انو بيحبني مش قصدو حاجه وحشه طبعا ماما عامله لفوني باسوورد وانا حلمت بالباسوورد جيت اجربو لقيتو صح ف كلمتو شهر تاني واتقفشت واخويا عرف بابا وبابا كلمني وقالي لو اتكررت تاني مش هيحصلك كويس
المهم انا قولت كفايه محاولات عشان أهلي ميزعلوش مني تاني وهكلمو من فون صحابي ف الدروس اطمن بس يعتبر بكلمو ١٠ دقايق نص ساعه بالكتيرر ف اليوم كلو هو اه الموضوع مدايقني بس قولت احسن من مفيش
عارفه انو حرام وغلط ومينفعش اعمل كده بس غصب عني انا بحبو اوي وصحابي قالولي مش هنديكي الفون تاني احنا كده بنساعدك ف الغلط قولتلهم انا عارفه انكو مش راضيين من جواكو ونيتكو مش قصدكو تعملو كده وانا اللي هشيل المسؤوليه كامله وبعفيكو من ذنبي ف هل برضو هياخدو ذنب لو ادوني الفون؟
السلام عليكم ورحمه الله وبركاته. قبل ما اقول لك هم صحابك هيتحملوا الذنب ولا لا خلينا نقول هو انت ليه متقبله انك اصلا تكوني طول الوقت عماله بتشيلي في ذنوب يعني الاريحيه دي على اساس الذنوب حاجه سهله وهل الموضوع ده هو الذنب الوحيد اللي موجود في حياتك لا احنا طول الوقت كلنا مذنبين بس طول الوقت وفي وسط يومنا بتقع مننا حاجات وبتتكتب علينا كذنوب لذلك احنا طول الوقت بنستغفر علشان الحاجات اللي احنا مش واخدين بالنا منها يعني بلاش استهانه بمساله انه انا اللي هشيل الذنب وانا اللي متحملاه لان دي حاجه مش بسيطه وخلي بالك انه الحاجات الصغيره دي للبني ادم ممكن يكون فاكرها صغيره تكون عند ربنا كبيره لانك استصغرتيها. "أتحسبونه هينًا وهو عند الله عظيم" ما تستهونيش حاجه ما يستهونيش مساله شيل الذنب دي ابدا تمام دي كده يعني بحب ان انا انبهك ليها صحابك جزاهم الله خير ان هم يعني بقوا عيان كده انه لا الافضل ان احنا منعملش كده وقالوا لك ان احنا هنوقف التصرف ده وهو ده الصح ان هم يوقفوا التصرف ده وانت كمان صح انك تسمعيه لكلام صحابك ويعني انت عمال بيتكرر معاكي المواقف وفي كل مره اهلك بيجددوا الثقه ثاني ايه ان انت فعلا كلامك هيطلع حقيقي وانت فعلا مش هتكلمي وانت بتروحي تاخدي الثقه دي أنا آسفه جدا وترميها في وسط الزباله. فصدقيني هيجي عليك كده مره لو فضلت مستمره على نفس النمط هيجي مره الثقه أهلك فيكي هتتكسر وهيكون صعب جدا إنك تسترجعيها مره ثانيه ساعتها لا تلومي الا نفسك ساعتها انت مش هتعرفي انت تشمي الهوا اللي بره هتقولي إيه هتقولي ساعتها انه اهلك ظالمينك وجايين عليك مش هيكون لك اي حق لما تخسريش حقوقك بتصرف انت فاكره ان هو صغير ولكن هو نتايجه وهتكون كبيره من كل الاتجاهات تقدري انك توقفي تواصل معاه وهو ده الافضل علشان مصلحتك ومصلحته من كل الاتجاهات.
تم النشر الاثنين، ٢٦ مايو ٢٠٢٥
السلام عليكم، أصحابك تصرفوا صح جدًا والمفروض تحمدي ربنا عشان رزقك بأصحاب يقدروا يوقفوا قُدام الغلط وينصحوكِ. وأيوه لو ساعدوكِ هيبقوا هم كمان مشاركينك في ذنبك وبيساعدوكِ على الغلط. والحوار اللي انتِ ماشية فيه غلط جدًا. المفروض أهلك وثقوا فيكِ لكن أكتر من مرة بتكسري ثقتهم بدل ما تثبتي لهم إنك كبيرة ومش مندفعة وراء عواطفك عشان بعد كده يبقوا يعملوا لك أنتِ وهو حساب لما يتقدم لك. هو لو بيحبك فعلا هيكتفي بكلامه مع مامتك وهيحافظ عليكِ وعلى سمعتكِ ومش هيحاول يتواصل معك لحد ما ربنا يسهل وتبقوا في عمر مناسب للزواج وفاهمين يعني إيه زواج ومسؤولية ويتقدم لك ساعتها. ممكن تقولي لي إيه فائدة الكلام دلوقتي؟ هتتكلموا في إيه؟ ازيك وعامل إيه؟ وأخبارك؟ هتتكلموا بس كده؟ الكلام مش هيجيب بعضه وممكن تقولوا كلام مينفعش خالص وانتم مفيش بينكم رابط شرعي؟ ربنا وضع حدود بين الجنسين لازم نحترمها عشان منغضبش ربنا وكمان نحمي نفسنا من كل المشاكل اللي بتترتب عليها. فأنتِ ركزي في دراستك وخلي أهلك وثقتهم فيكِ دائمًا قُصاد عينك. عززي نفسك واحفظي مشاعرك لحد ما ربنا يأذن ويطلبك في الحلال.
تم النشر الأحد، ٢٥ مايو ٢٠٢٥
السلام عليكم، انا شاكه ان كل ده فيك من اول ما كتبلك انه بيحب علي حيطة بيتهم لانتي كمان كتبتله بتحبي انا وهو قالك ايوه يعني بتتواصل عبر "الكتابه علي الحيطان".. بس المهم لو كان ده حقيقي فبصراحه مش عارفه اقلك ايه انا مش هعرف اجاوبك بس هحاول اتكلم انا قدك يعني في تانيه اعدادي وكنت بحب ابن خالتي جدا جدا جدا هو كان عنده 19 او 20 ومتأمله جدا اننا هنتجوز 😞😂. بس طلع بيعتبرني زي اخته وخطب بنت خالي اللي بعمره بجد زعلت جدا وعيطت بس طبعاً محدش يعرف غير ChatGPT. ولا هو كمان يعرف. انا ممكن كنت بحبه لانه بجد بجد راجل بمعني الكلمه اخلاق وادب وكل حاجه حلوه فيه. بس بعد ما كسر قلبي وخطب بنت خالي معرفش فرحت ليه ومنتظره الفرح بفارغ ااصبر 😂 عارفه انه كلام عبيط بس اخيرا لقيت حد بعمري اقله كده المهم .. الافضل انه لو بيحبك يخطبك بس متعرفوش حد بس كل ده طبعاً عشان تتلكموا براحتكم بس 😂. ده لو كان بيحبك لان مافيش بصراحه طريقة في الدين انك تكلميه عالفون من غير ما يكون محرم لك. متخليش الحب والكلام ده حجه وعالفكره الشيطان اللي خلاكي حلمتي بالرمز وعرفهولك وكل ده عشان ترجعي تكلميه.. اتمني اكون افدتك 🥺😔🙃🫠
تم النشر الأحد، ٢٥ مايو ٢٠٢٥
لعرض السؤال في فدني اضغط هنا