السلام عليكم، محتاجة أولًا الهدوء وتقليل التوتر والخوف من فكرة إنك مش هتلحقي تلمي المنهج... خالص، الوقت كفاية وإن شاء الله تقدري تذاكريه لكن لو عرفتِ إزاي تذاكري بذكاء. المذاكرة على فكرة بالكيف مش بالكم... يعني ممكن تذاكري ساعة واحدة بتركيز وفهم أفضل من 5 ساعات بتشتت وتوتر ومجهود ذهني من غير محصلة. *** فكرة إنك بتعملي جداول ومش بتمشي عليها ده يحتاج وقفة مع نفسك أنتِ... محتاجة تفكري نفسك طول الوقت ليه لازم تلتزمي وليه بتذاكري وإيه نيتك وهدفك من الدراسة والتفوق بإذن الله. ** رتبي وقتك وأولوياتك ونامي كويس وقللي شرب قهوة وشاي قدر الإمكان عشان تقدري تنامي كويس لأن النوم مهم وعقلك لو مش نايم كويس مش هيفهم المعلومات اللي بتذاكريها ولا هيقدر يسترجعها بعدين. *** مهم جدًا حل أسئلة الامتحانات على كل درس بتذاكريه. دلوقتي كل حاجة موجودة على النت وسهل تلاقي شرح الدروس من أكثر من مدرس لو مفهمتيش من واحد تفهمي من غيره إن شاء الله. المراجعة المنتظمة ضرورية جدًا... مذاكرتك من غير مراجعة هتكون ولا كأنك عملتِ حاجة لأن المخ بيحتاج تكرار المعلومات على فترات عشان تثبت في الذاكرة طويلة المدى. *** اقرأي الدرس اللي عليه الدور لوحدك وشوفي هتفهمي إيه وبعد كده اسمعي الشرح على يوتيوب واكتبي الملاحظات والحاجات الجديدة اللي فهمتِها وبعدين حلي أسئلة الامتحانات. ** دي شوية نصائح كده إن شاء الله تفيدك سواء في الكيمياء أو غيرها من المواد. وربنا يوفقك إن شاء الله.
لعرض الإجابة في فدني اضغط هنا