انا بحب خطيبي جداً جداً ومتعلقه بيه جداً وهو كمان بيحبني... بس هو شخص غير عميق.. عملي وسطحي.. مش بيهتم بالتفاصيل ولا بيعمل مجهود.. مش بيعمل مجهود يفرحني خالص.. وانا هنا مش بتكلم على الماديات مع العلم هو ماديا كويس جداً... بس بقالنا سنتين مع بعض ولا مره جابلي ورده حتى... جابلي هديه مره واحده في عيد ميلادي طول السنتين وبس... على عكسي انا بجيبله كل شويه حاجة واعبر له عن حبي دايما.. بس هو لا...ودايما لما احكي عن مشاعري يقولي انتي اوفر ولما اطلب اهتمام زياده لان اهتمامه غير مشبع ليا يقولي انا مش فاضي ولا ليا دماغ لده... انا زهقت من الموضوع دا جدا وخايفه اوي بس انا مش قادره اسيبه لاني متعلقه بيه جداً... وهو فعلاً بيحبني جداً مش مراية الحب عاميه ولا حاجة... اعمل ايه؟
السلام عليكم، هو أولا المفروض الخطوبة لها ضوابط ومش صح إن المشاعر تبقى متحكمة وغالبة لأنها هتؤثر على حكم عقلك وممكن تخليك تقبلي وضع تندمي عليه بعدين، وكمان بتخلي فيه تعلق ناحية الشخص اللي مرتبطة به (زي ما حاصل معك) وخاصة لو المدة طالت وفي الآخر محدش عارف إذا الطرفين بيكملوا ولا لأ والنصيب هيكون فين. *** بس عموما أنتِ دلوقتي في أمر واقع، بتحبيه ومتعلقة به، لكن شخصيتكم مختلفة وطريقة التعبير عن الاهتمام والحب مختلفة.. والمشكلة مش في نقطة مش بيجيب هدية أوولأ المشكلة في رد الفعل.. جايز هو فعلا مش فاضي وشايف فيه أولويات لازم يخلصها عشان زواجكم أو حابب يلتزم ببعض قيود الخطوبة، أو هو فعلا من النوع العملي جدا والمشاعر بالنسبة له تفاهة وتضييع وقت، لكن أيا كان السبب، رد فعل الشخص المهتم مش هيكون جاف أو فيه تسفيه من مشاعر الطرف التاني. *** خليني أقول لك الحب مش كل حاجة ومينفعش تقيمي زواج على الحب فقط، ومش معنى إنك بتحبي حد تكملي في وضع غير مناسب لأن الحب مع الظروف السيئة بيختفي وممكن يقلب للعكس. اقعدي مع نفسك واسأليها، هل هتقدري تتحملي الحياة دي بعد الزواج؟ اللي بتشوفيه في فترة الخطوبة عينة صغيرة من بعد الزواج، فلو أنتِ عاطفية جدا وهو شخص عملي شايف العواطف تفاهة فده هيكون نظام حياتكم بعد الزواج ومتتوقعيش إنه يتغير لأن الإنسان في الغالب مش بيتغير ولو أراد يتغير فعشان نفسه. شوفي هتقدري تعيشي بنفس الوضع الحالي ولا لأ؟ هتقدري تتأقلمي لو رفض يغير طبيعته ويتنازل شوية عشان العلاقة تتوازن؟ ولو متغيرش هتقدري عادي تتحملي الحياة بنفس الطريقة اللي بتشتكي منها حاليا؟ ** عامة، صلي استخارة وفكري كويس واتكلمي معه مرة تانية واعرفي رأيه في كل ده وهل هتكملوا على كده بعد الزواج وهل يقبل تتابعوا مع مختصة أسرية تساعدكم وترشدكم إزاي تكونوا في علاقة ناجحة؟ اعطيه فرصة وشوفي فيه نتيجة ولا لأ وقرري بعد كده الأصلح لك. بالتوفيق.
تم النشر الأحد، ١٢ يوليو ٢٠٢٦
لعرض السؤال في فدني اضغط هنا