السلام عليكم
انا بقالي سنة بعاني مع شيء انا مش عارفة هو وسواس قهري و لا ايه بالظبط.. الموضوع بدأ بشكل تافه إلى حدٍ ما و هو اني شوفت لقطة من مسلسل لأم قتلت اطفالها.. من ساعتها حتى الآن و لمدة سنة و انا دماغي مش سايباني فحالي.. دايمًا خايفة ان انا اعمل كده ف احد افراد عائلتي و دايمًا بتجيلي افكار صعبة جدًا بدون مبرر و كل ما بحاول اطردها بيكون بلا فائدة.. انا بقالي سنة بعاني مع الأفكار الوسواسية دي و مش هعرف اني اروح لطبيب نفسي.. بقيت بخاف مني و بخاف من أي تصرف بعمله و بفكر الف مرة قبل ما اعمل حاجة.. انا بطبعي شخصية متوترة و كثيرة التفكير و جه الموضوع ده زود الطين بلَّه.. بمعنى اني بقيت اتوتر جدًا من أي افكار وسواسية و بحاول اطردها من دماغي و مش عارفة اعمل ايه.. الموضوع بيجيلي على هيئة نوبات بمعنى ان ايام الافكار تكون زايدة جدًا و مش عارفة اطردها من دماغي و ايام تانية تكون اهدى شوية.. حاولت اني اجرب حل التجاهل و اني اتجاهل الأفكار دي بس مش عارفة و بتوتر و مش عارفة اعمل ايه.. ياريت اللي عنده حل يقولي فضلًا.
السلام عليكم، ده وسواس قهري وحله التجاهل مش المقاومة. تعاملي معه كشخص مزعج عمال يزن جنبك وافضلي متجاهلاه لحد ما يزهق ويمشي. ممكن يبقى صعب في الأول وزي ما قلتِ جربتِه وبتتوتري، لكن مع الوقت قدرتك على التجاهل هتزيد وهتقدري تطردي الأفكار دي من دماغك. أنتِ بتتجاهلي وأنتِ قلقانة أصلا من الأفكار وعاملة لها قيمة وحساب، لكن لو عاملتِها إنها ولا حاجة ولا خطورة منها وهي بس بتستغل مخاوفك وضعفك هتقدري تنفذي حل التجاهل. ***** المهم، استعيني بالله واستعيذي به كل ما خطرت ببالك الأفكار وابدئي اشغلي وقتك ويومك بأهداف تشتغلي عليها بجدية بحيث الأفكار تضيع مع تركيزك على اللي في إيدك. أنصحك كمان تحافظي على أذكار الصباح والمساء ومن النهاردة يا ريت تبدئي تسمعي رقية شرعية أو تقرأيها وتقرأي سورة البقرة يوميا، لو مش هتقدري تقرأيها كاملة في اليوم ممكن تقسميها على ٣ أيام، وإن شاء الله ربنا يعينك ويقويك وتقدري تتخلصي من كل الوساوس عن قريب.💚💚
تم النشر الأحد، ٦ سبتمبر ٢٠٢٦
وعليكم السلام ورحمه الله وبركاته... بصي اطمني خالص ومتقلقيش ده وسواس قهري معروف ا اسمه وسواس أذى وأهم حاجة تعرفيها إن الأفكار دي مش طبيعتك ولا حقيقتك بالعكس دي بتجيلك لأنك شخصية طيبة وحنونة وخايفة على أهلك وعقلك بيستغل الخوف ده عشان يضايقك ومستحيل تنفذي حرف منها والطريقة الصحيحة للتعامل معاه انك أول ما الفكرة تجيلك متقاوميهاش ومتخافيش منها ولا تحاولي تتناقشي معاها في دماغك سبيها تعدي زي السحابة وقولي لنفسك دي مجرد فكرة وسواسية ملهاش أي قيمة واشغلي نفسك على طول بأي حاجة ثانية ومتنعزليش ولو حسيتي إن الموضوع مأثر على حياتك ومخليكي متوترة طول الوقت متتردديش إنك تتابعي مع دكتور نفسي مش عيب خالص وهيريحك جدا وهيرجعلك هدوءك واستقرارك النفسي .. وجد والله ربنا يحفظك ويسعدك
تم النشر الأحد، ٦ سبتمبر ٢٠٢٦
وعليكم السلام ورحمة الله. أولاً، أقدر شجاعتك في وصف ما تمرين به بهذا الوضوح، وأعرف إن السنة دي كانت ثقيلة عليكِ جدًا. اللي بتحكيه يشبه كثيرًا "الأفكار الاقتحامية" اللي بتيجي بدون دعوة وبتخلي الشخص يخاف من نفسه، وده أمر شائع جدًا عند الناس اللي طبيعتهم متوترة وكثيرة التفكير. الأفكار دي مش دليل على إنكِ هتعملي حاجة، لكنها بتستغل خوفك وبتكبره. بدل ما تحاولي تطردي الأفكار بالقوة (لأن المحاولة دي بتزودها)، جربي تغيير طريقة التعامل معاها. لما تجيلك الفكرة، قولي لنفسك بهدوء: "ده مجرد فكرة، مش خطة ومش نية". بعدين حوّلي انتباهك فورًا لفعل ملموس في اللحظة دي، زي ترتيب غرفة، أو الرد على رسالة، أو حتى قراءة آية أو ذكر بصوت عالٍ. الفكرة مش هتختفي في ثانية، لكنكِ بتدرّبي دماغك إنها مش مسيطرة عليكِ. كمان، لأن الأفكار بتيجي على شكل نوبات، حاولي في الأيام الهادية تسجلي ملاحظات بسيطة: إيه اللي بيسبق النوبة؟ هل في تعب أو ضغط أو نقص نوم؟ معرفة النمط بيساعدكِ تقللي شدة النوبات حتى لو مش قادرة تمنعيها تمامًا. وتذكري إن الأفكار اللي بتيجي بدون رغبة أو قبول مش ذنب، والله لا يحاسب على ما لا يملكه الإنسان. لو قدرتِ في أي وقت تتواصلي مع متخصص نفسي حتى لو أونلاين، هيبقى أفضل حل جذري، لأن الوسواس ده بيحتاج أحيانًا تقنيات محددة. وفي الوقت الحالي، ابحثي على فدني عن أسئلة مشابهة عشان تشوفي تجارب ناس تانيين وتاخدي أفكار إضافية. أنتِ مش لوحدكِ في ده، وكل خطوة صغيرة بتعمليها دلوقتي بتقربكِ من السيطرة على الأمر.
تم النشر الأحد، ٦ سبتمبر ٢٠٢٦
استعيني بالله والرقيه الشرعيه وربنا يطرد الافكار دي من دماغك ثم اطلبي مساعده من متخصص ف ناس هنا تقدر تفيدك وهما لا يعرفوكي ولا تعرفيهم ف متقليش وخدي خطوه التعافي ان شاء الله خير ممكن انتي بس عقلك الباطن كان لسه مش واعي بما فيها الكفايه انه يفسر ان ده مجرد تمثيل كلنا شفنا حاجات أثرت ع تفكيرنا واحنا اصغر ف متقلقيش مش وسواس ولا حاجة وكتر التفكير ده عادي حاولي تشغلي نفسك لو بتدرس او بتشتغلي او حتى بتتعلمي شغل البيت استغلي حياتك وحاولي متسمحيش للوهم يتمكن منك
تم النشر الثلاثاء، ٨ سبتمبر ٢٠٢٦
هتجربي تاخدي علاج هيصفهولك طبيب نفسي ومؤقتًا خدي دواء بوسبيرون.
تم النشر الاثنين، ٧ سبتمبر ٢٠٢٦
تكلمي مع متخصص نفسي
تم النشر الاثنين، ٧ سبتمبر ٢٠٢٦
اي الا وصلك لكده
تم النشر الأحد، ٦ سبتمبر ٢٠٢٦
لعرض السؤال في فدني اضغط هنا