السلام عليكم، أولا إنك شايلة مادة مش معناها فشلك خلاص ولا إنك مستقبلك ضاع، عادي كلنا بنمر بكبوات في حياتنا بس المهم تقومي وتكملي، مشكلة التوهان والتعب اللي حاساه بسبب إنك مشتتة نفسك بين حاجات كتير عاوزة تعمليها كلها مع بعض وبسرعة، عاوزة تنجحي في الكية وتاخدي كورسات وتعملي سي في وتفتحي شركة، تفكيرك في كل ده في لازم يعمل ضغط وتوهان وأنتِ مش عارفة تبدئي منين وبإيه. ** اقعدي مع نفسك وفرغي أفكارك وكل الدوشة اللي بدماغك على الورق عشان تعرفي تفكري بهدوء ذهن صاف. هتقعدي بعدها وتحددي الأولويات. أولويتك دلوقتي هي الكلية وإنك تنجحي في المادة اللي شايلاها... شوفي بعدها إيه أهم تاني هدف محتاجة تشتغلي عليه. ** افتتاح الشركة ده اكتبيه في ورقة عشان تشيلي الفكرة من دماغك، عقلك يخزنها كهدف بعد كم سنة فمتاخدش حيز من تفكيرك. إثباتك لنفسك كده كده هيتحقق مع كل هدف صغير بتنجزيه. امشي خطوات صغيرة أحسن ما أنتِ واقفة مشتتة ومشغولة تعملي إيه ولا إيه. ابدئي بحاجة واحدة وكمليها للنهاية بدل ما تشتتي نفسك في كذا حاجة ومتكمليش. ** اختاري طريق واحد تركزي عليه من ثلاثة لست شهور. مهارة واحدة من المهارات اللي محتاجاها في مجالك، تشتغلي عليها ومتخليش همك تخلصي كم كورس أو تجمعي كم شهادة لأن في الآخر العميل بيهمه أنتِ تقدري تعملي إيه مش معك كم شهادة وواخدة كم كورس. ** لو حاسة مخك فاضي فأنتِ مش محتاجة تملأيه بمحتوى كورسات. نمي عادة القراءة لو مش عندك، خصصي ولو عشر دقائق كل يوم تقرأي فيها في مجالات مختلفة.. اسمعي بودكاستات مفيدة تثري أفكارك. خصصي لده جزء من يومك كهدف صغير أو فاصل بين الهدف الرئيسي. ** ممكن تبحثي عن نموذج عجلة الحياة المتوازنة إذا عاوزة حاجة تساعدك تقيمي جوانب حياتك المختلفة وتبدئي تشتغلي عليها واحدة واحدة لحد ما توصلي للتوازن. ومتستعجليش، التغيير بياخد وقت وصبر، أنتِ لسه في أولى جامعة والوقت قدامك لسه إن شاء الله. بالتوفيق.
لعرض الإجابة في فدني اضغط هنا