مش عارفة الصراحة ابدأ ازاي بس انا حالياً في تالتة ثانوي و و بابايا عايش الحمدلله بيشتغل سواق لشركة ما بس المصاريف زيادة اوي عليه ف لو حد عنده اقتراح مهارة اتعلمها تكون بسيطة اقدر اعملها بجانب الدراسة تدخلي دخل كويس ياريت يفيدني أو شغل ينفع يكون جزئي بردو عشان حقيقي الوضع صعب و انا مش عايزة اني أفقد فرصتي في اني اتعلم و اخليه فخور بيا
و شكراً مقدماً
المشكله إنك لو اشتغلتي حتى لو شغل بسيط هياخد من وقتك ومن جهدك فأنا بقترح عليكي إنك بدل ما تشتغلي تقللي حمل على باباكي عن طريق إنك تشوفي بدائل أسهل عندك الشرح كامل لكل المواد بكذا طريقه ومن مدرسين كتير ممكن تاخدي خطوة إنك هتتابعي نفسك تعملي جدول زي ما تحبي والنظام اللي يتوافق معاكي وتسمعي الشرح يوتيوب ويكون معاكي كتب الأسئله وكتب الشرح وتذاكري وتحلي وتتابعي نفسك
تم النشر الثلاثاء، ٩ ديسمبر ٢٠٢٥
ما شاء الله يارب يبارك في حضرتك ويجعلك موفقه دايمآ ويراضي اهلك ويسعدهم بنجاحك ودا شعور جميل نابع عن البر والاصالة تجاة اسرتك واتمنى افيدك وادعمك بما يناسب مجالي ولو عندك وقت فراغ وتعرفي تسوقي على وسائل التواصل فممكن أضمك مع فريق الاعلانات وتاخدي نسبة عن كل حالة او حجز يأتي من خلالك بس بشرط ان دا ميكنش له تأثير سلبي على المذاكرة واطمني على بابا لان ربنا بيعين وانا بكلمك كأب إن شعورك دا أثمن عند والدك من مساعدة ماديآ ويارب يوفقك بالنجاح والتقدم
تم النشر الجمعة، ١٢ ديسمبر ٢٠٢٥
في شغل كتير أونلاين زي الكول سنتر و أدارة الصفحات دي بتكون حاجة سهلة يعني حاولي تشوفيها و بالنسبة للمذاكرة ف انا ممكن اساعدك ف مادة الاحياء لو محتاجة شرح و مش عاوزة تكلفي نفسك دروس و مصاريف
تم النشر الجمعة، ١٢ ديسمبر ٢٠٢٥
اتعلمي تصميم وخاصة تصميم السوشيال ميديا أو مونتاج بس الاحسن ركزي في دراستك عشان تنجحي
تم النشر الثلاثاء، ٩ ديسمبر ٢٠٢٥
انت شخص محترم علشان بتفكر في اهلك كدا -بس اظن ان والدك دلوقتي عايزك ترفع راسه في تعليمك ف من وجهة نظري دوس علي نفسك في دراستك وجيب اخر ما عندك واحنا خلاص دخلنا في نص السنه -حاول تقلل طلبات الا للضرورة القسوة ومجرد متخلص اخر يوم في امتحاناتك انزل شغل واصرف علي نفسك وعلي جامعتك بس دلوقتي حاول ترفع راسه بشهادتك -وربنا يديك ما تتمني انت واهلك يا رب
تم النشر الثلاثاء، ٩ ديسمبر ٢٠٢٥
حرفيا انا كنت السنه الي فاتت مكانك بص متشتريش مذكرات خليك فالكتب الخارجية وحاول تطبعها عند حد رخيص ومتروحش دروس خلي كل دروسك اونلاين في مدرسين كتير رخاص وحلوين مش شرط يكون مشهور وفي بعض المواد هتلاقي ناس شرحها يتيوب حلو جدا وكمان ناس بتحل كتب خارجيه كتير كله ببلاش وغير كده كمان الموضوع ده هيخليك تجيب مجموع مرتاح ركز انت بس السنه دي وحط كل تركيزك فالدراسه
تم النشر السبت، ١٣ ديسمبر ٢٠٢٥
ممكن تتعلمي حاجات كتير وتبقي من البيت زي تابلوهات الصور زي منديل هند ميد ممكن لو بتعرفي تعملي اكل يبقي من البيت برضو زي سندوتشات مثلا ممكن تعملي لبي اون لاين ممكن تتعلمي ازاي تعملي تورته عجينه السكر و دونتس الحاجات دي بتكسب كويس اووي
تم النشر السبت، ١٣ ديسمبر ٢٠٢٥
متتعلميش حاجه دلوقتي ولا تركزي في اي حاجه غير انك بس تركزي في مذاكرتك دي الحاجة الوحيدة اللي هتهون عليه والله لم تخلصي تالته ثانوي نشوف بقا قبل كدا لا لا لا نركز في المذاكره ونستغفره كتتيييير اوي الاستغفار بيوسع الرزق جامد فاستغفري كتير وربنا يصلح حالك يارب ويوفقك ويوسع رزقك ورزق والدك
تم النشر السبت، ١٣ ديسمبر ٢٠٢٥
ربنا يوفقك بإذن الله
تم النشر الأربعاء، ١٠ ديسمبر ٢٠٢٥
لعرض السؤال في فدني اضغط هنا