السلام عليكم، بالنسبة للمجموعة والكتاب فأنا للأسف مجربتهمش فمقدرش أحكم عليهم... بس أنا عامة لما بحب أتعلم لغة ببحث عن مصادر لمتحدثي اللغة نفسها، علشان بعتمد أكتر على السماع في تعلمي فببقى عاوزة مصدر ألقط منه مخارج الحروف والصوت مضبوط. مش ببقى ضامنة لو المعلم، دي مش لغته الأم إن يكون نطقه صح فبدايتي مع اللغة تكون غلط. فلو هتدوري على مصادر، شوفي مصادر إنجليزية أفضل. **** لو عاوزة ترشيحات مصادر ونصائح خاصة بتعلم الإنلجيزي ممكن تتابعي قناة ياسمين خالد لو مش عارفاها... هي بترشح مصادر إنجليزية فممكن تفيدك. ده أحد فيديوهاتها. https://www.youtube.com/watch?v=GMJlKB1aoxo *** بالنسبة لتعلم اللغات أو تعلم أي حاجة عامة بيحتاج استمرارية، فأنتِ مشكلتك مع الاستمرارية والالتزام بالاهداف. ده اللي محتاجة تشتغلي عليه. لازم الأول تحطي هدف واقعي (استخدمي طريقة SMART) وخطة مرنة عشان متقعيش بعد كم يوم من البدء. الملل والفتور أمر طبيعي وبيحصل مع الكل فلازم مرونة وتدريب على الانضباط الذاتي. ** مينفعش تضعي هدف عائم، زي مثلا هخلص المستوى الأول من اللغة السنة دي. لأ، المفروض الهدف الكبير يتقسم لأهداف صغيرة ولها مواعيد وكل إنجاز صغير تكافئ نفسك عليه. ** جربي تكتبي أسباب تعلم اللغة وأهدافك منها وتعلقيها فوق مكتبك عشان تفكرك كل يوم، واكتفي بنصف ساعة. مش لازم تبدئي بجهد كبير، ده هيخليكِ أصلا معندكيش إرادة للبدء وعقلك تلقائيا هيميل للتسويف وهيخترع أسباب عشان يمنعك من البدء. *** مش عارفة مستواكِ في الإنجليزي إيه حاليا، يعني هل إلى حد ما ممكن تقرأي به على الانترنت وتبحثي؟ ده كافي لو حابة تتعلمي لغة تانية وتاخدي الإنجليزي على مهلك... عادي جدا لو حابة تتعلمي لغة تانية مش شرط تنتظري تتقني الإنجليزي عشان تبدئي تعلم لغة تانية. ** بالنسبة لمشكلتك مع الاستمرارية وإنك مش بتكملي هدفك في التعلم، ممكن تسمعي البودكاست دي، كانت بتتكلم عن نفس المشكلة https://www.youtube.com/watch?v=oRiM3xBq-4s&list=PLrNsV6fh5oPOy8ex8qmKRnn1QtocAwczg&index=14&pp=iAQB ودي كمان هتفيدك إن شاء الله.. https://www.youtube.com/watch?v=ddYcQY9TaYE&list=PLrNsV6fh5oPOy8ex8qmKRnn1QtocAwczg&index=12&pp=iAQB **** كمان فيه على التطبيق أسئلة كتير عن تعلم اللغات وعليها إجابات ونصائح إن شاء الله تفيدك https://www.fedni.net/all-results?query=تعلم%20اللغة https://www.fedni.net/all-results?query=اللغة%20الإنجليزية لو حاسة ترشيحات ياسمين هتشتتك ممكن تشوفي الترشيحات في المقال ده، https://www.ajnet.me/midan/2018/3/6/أبرز-5-قنوات-لتعلم-اللغة-الإنجليزية-عبر واعتمدي مصدر واحد بس منها التزمي بالمتابعة معه ولا تشتتي نفسك مع أكثر من مصدر. وأنصحك تبحثي عن تقنية الـ shadowing وابدئي بها من المستوى صفر عادي عشان تدربي لسانك على الكلام من أول يوم. ** أرجو أكون أفدتك شوية. بالتوفيق إن شاء الله.
وجزاكِ بالمثل، بالتوفيق دايما. 💚💚
تم النشر الثلاثاء، ٣ فبراير ٢٠٢٦
أفدتيني أوي، جزاكِ الله خيرًا.
تم النشر الثلاثاء، ٣ فبراير ٢٠٢٦
العفو، أرجو أكون أفدتك شوية.💚💚 بصي هو في أي لغة بلاش تتبعي الأسلوب التقليدي، يعني مشكلتنا مع الإنجليزي إننا تعلمناه غلط في المدارس فمعرفناش نستخدم اللغة وبقينا كأننا متعلمناش. اللغة بنكتسبها بالسماع والانغماس، زي ما تعلمنا لغتنا واحنا أطفال، احنا لقطنا اللغة بالسماع ومبدأناش نتعلم قواعد غير لما دخلنا المدرسة، فمتركزيش على تعلم القواعد وإنك تفضلي تحفظي في مفردات.. ركزي على الانغماس في اللغة وسماعها كتير من متحدثين أصليين، ممكن في الأول تحسي إنك مش بتلقطي كل حاجة ومش بتفهمي كلامهم مع الوقت هتلاقي مهارة السماع تحسنت وبقيتِ تفهمي أكتر، وركزي على حفظ الجمل مش المفردات وترديدها بصوت عالي. القواعد كده كده مع الوقت هتبنيها... فمتذكريهاش بالورقة والقلم وأسلوب الحفظ التقليدي. الأطفال كمان مش بيخافوا يغلطوا وهم بيتكلموا فتعاملي مع أي لغة هتتعلميها كأنك طفلة، اسمعي كتير ومتخافيش تغلطي.
تم النشر الثلاثاء، ٣ فبراير ٢٠٢٦
هشوفهم، مستوايا مبتدئة معنديش أساسيات قواعد حتى😅 شكرًا جزيلًا لحضرتك.
تم النشر الاثنين، ٢ فبراير ٢٠٢٦
لعرض الإجابة في فدني اضغط هنا