سلام عليكم
انا عندي 25سنه حاسه اني مضغوطه ونفسيتي ومزاجي دايما مش احسن حاجه انا عاوزه الاقي شغل واصلا مش عارفه اشتغل ايه مضايقه اني ف سن ال25 ومش بعمل اي دخل ومعنديش اي اصدقاء
انا مش مضايقه من ده انا اصلا اللي مكنتش حابه بس احيانا بحس اني محتاجه ناس ف حياتي عندهم نفس الاهتمامات و ننفع بعض فعلا
انا اتخرجت من كليه مش بحبها ورحلتي ف التعليم كانت وحشه وطول الوقت حاسه بصعوبات وضغط حاسه معنديش اي مهارات مع اني شاطرة بس حاسه معنديش حاجه اقدمها و بدأت ارجع اطور مستواي ف الانجليزي لان نفسي اتعلم كذا لغه
حاليا انا عاوزه حد يساعدني الاقي شغل بمرتب ثابت الفتره دي جنب ما انا بطور نفسي علشان مش عارفه اعمل اي بس شغل بمرتب ثابت
انا خريجة شريعه اسلاميه هل اعمل دبلومه ولا اي المهارات مثلا اللي اتعلمها تخليني الاقي شغل كويس
بالمناسبه طول عمري نفسي اشتغل ف بنك او شركه كبيره بس حاسه اني زيرو
انا تايهة جدا عاوزه حد يفيدني
آسفه اني طولت عليكم
السلام عليكم، المشكلة إنك حاسة إنك في سباق مع الزمن وبتحاولي تنجزي حاجات كتيرة في وقت قصير أو في الحال وده مش منطقي وبيضع عليكِ عبء نفسي كبير وبسببه أنتِ مش قادرة تتحركي خطوة. بدل ما تنظري للجبل الكبير قُدامك ومنتظرك تطلعيه وتفضلي تتخيلي هطلع ده كله إزاي، بصي تحت رجلك للخطوة الصغيرة اللي هتبدئي بها والخطوة اللي بعدها وهكذا. الخطوات الصغيرة المستمرة هي اللي هتوصلك. *** وصلحي اعتقادك إن فيه سن معين للإنجاز والنجاح في الحياة ولو عديتِ السن ده من غير إنجازات فمعنى كده إنك فشلتِ. ده تفكير واعتقاد خاطئ. ناس كتير بدأوا في الأربعينات والخمسينات وحتى في السبعينات وحققوا نجاحات كبيرة، ومش بقول لك كده عشان أدفعك للتكاسل دلوقتي أو إن لسه الوقت بدري وطويل فعادي نريح. بقول لك عشان تشيلي الضغط وإحساس السباق الزمني اللي مدخلة نفسك فيه. *** شوفي الأول (نموذج عجلة الحياة المتوازنة) له شروحات كتيرة على يوتيوب، ده هيساعدك على تقييم جوانب حياتك المختلفة وتحددي أوجه القصور فيها عشان بعد كده تبدئي تصلحي القصور ده خطوة خطوة. *** بالنسبة للعمل فلو حابة أو بتفكري في العمل الحر أو عبر الإنترنت، ممكن تشوفي إجابتي على السؤال ده، فيها رابط لمبادرة العمل من المنزل للسيدات من أكاديمية ابن سينا ورابط لقناة هتفيدك جدا في مجال العمل الحر. https://www.fedni.net/q/52847274 ******* وشيلي من دماغك الأفكار اللي تكونت بسبب الإنترنت والسوشيال ميديا عن الإنجاز والإنتاجية وإن الإنسان لو محققش إنجازات معينة زي الباقيين فهو فاشل. جميل إن عندك أحلام وطموحات لكنك مش مجبرة تحققيها كلها في نفس الوقت. لو استمريتِ على التفكير بنفس الطريقة وإنك عاوزة تنجزي كل ده في وقت واحد هتمر السنين وأنتِ لسه واقفة مكانك، بقول لك ده عن تجربة. فوقفي تشتت وحددي أولوياتك وقسمي أهدافك وامشي خطوة بخطوة، أنتِ مش في سباق ومحدش بيجري وراك. استمتعي بالرحلة لحد آخر الطريق، وإن شاء الله ربنا يوفقك لكل ما فيه الخير. 💚💚
تم النشر الأربعاء، ٢٣ سبتمبر ٢٠٢٦
وعليكم السلام ورحمة الله، أولاً أحب أقولك إن شعورك بالضغط والتيه في هذا العمر طبيعي جدًا، وكتير بنات في سنك بيمرّوا بنفس الرحلة، خاصة بعد تخرج من كلية مش بتحبيها. أنتِ مش "زيرو" زي ما بتحسي، أنتِ شاطرة وبتحاولي تطوري نفسك فعلاً، وده أكبر دليل على قوتك. خلينا نركز على خطوات عملية تساعدك تلاقي شغل بمرتب ثابت جنب تطوير مهاراتك. بما إنك خريجة شريعة إسلامية، فكري في مجالات زي التمويل الإسلامي أو الإدارة في البنوك الإسلامية، لأنها بتستفيد من خلفيتك الدراسية وبتناسب قيمك. ابدئي بتعلم مهارات عملية سريعة زي الإكسل المتقدم، إدارة المكاتب، أو خدمة العملاء، لأنها بتفتح أبواب للوظائف الإدارية أو في الشركات الكبيرة. أما بالنسبة للدبلومة، فلو عايزة تدخلي بنك أو شركة كبيرة، دبلوم في إدارة الأعمال أو المحاسبة الأساسية ممكن يكون مفيد أكتر من مجرد شهادة إضافية في الشريعة، لأنه بيضيف قيمة عملية. استمري في تطوير الإنجليزي، وأضيفي عليه مهارة زي الكتابة المهنية أو الترجمة البسيطة، عشان تقدري تقدمي على وظائف أونلاين أو في الشركات. ابدئي بخطوات صغيرة: حدثي سيرتك الذاتية بتركيز على نقاط قوتك زي القدرة على التعلم السريع، وابحثي عن وظائف إدارية أو خدمة عملاء في البنوك أو الشركات الكبيرة من خلال المنصات المحلية. لو عايزة نصايح إضافية، ابحثي عن أسئلة مشابهة على فدني عشان تشوفي تجارب بنات تانيين. أنتِ قادرة تتقدمي خطوة بخطوة، وأنا هنا لو عايزة تفاصيل أكتر عن أي جزء.
تم النشر الأربعاء، ٢٣ سبتمبر ٢٠٢٦
وعليكم السلام، مش عارفـة ليه ذكرتي السن ولكن واضح السبب من ذكرك لـ سنك هو حزنك على السنين الـ فاتت وأعتقد دة مزعلك أكتر حاسة إنك معملتش حاجة!! ولكن أنتِ ممكن في سنة تعوضي الـ فات، بس تفهمي فيها نفسك وتشتغلي على نفسك من كل الجوانب! حلو جدًا خطوة اللغة أستمري وكملي فيها، في كورسات على منصات مختلفة هتساعدك برضو ومجانية! فكرة الصُحاب الدنيا متغيرة أشتغلي على نفسك نمي مهاراتك وحاولي تلاقي شغل أونلاين! ممكن مثلًا تحفظي قرآن معين جدًا في الرحلة القراءة رائعة جدًا أعملي روتين لنفسك زي النوم بدري والصحيان بدري قللي أستخدام الفون عشان متابعة الناس هتقلل من عزيمتك حاولي تستمري في مكتب كويس كرسي كويس لاب توب حلو وتبدأي رحلة جديدة واشتري كتب! الإنترنت مليان كورسات ومهارات بس أنتِ محتاجة تفهمي نفسك أكتر وتشوفي أنتِ شاطرة في أي وكملي فيه بالتوفيق 💛.
تم النشر الأربعاء، ٢٣ سبتمبر ٢٠٢٦
ظبطى اللغة واعطى دروس شرعية اونلاين او تحفيظ قرآن وتعليم تجويد وغيره لغير العرب
تم النشر الأربعاء، ٢٣ سبتمبر ٢٠٢٦
لعرض السؤال في فدني اضغط هنا