السلام عليكم
مشكلتي هي ادماني للسوشيال ميديا وخاصة التيك توك جربت طرق كتير اوي قربت اقلل بالتدريج لعند ما اقطع خالص شفت فيديوز كتير اوي وحاولت اطبقها باني اشوف ايه السبب اللي بيخليني امسك الموبايل كتير واعالجه بس مفيش فايده خالص وبرجع كل مره تاني ولازم افتحه يوميا ولو مسحته هيبقي يوم بالكتير اوي وتركيزي بقى مبيعديش الدقيقه وعندي تعفن دماغ وقلقانه جدا لاني كمان شهرين هدخل ف سنه مصيريه
لو حد عنده حل لو مر بتحربه زي كدا ياريت يشارك
بصي يا بنت الحلال ربنا مبيضعش أجر حد بيحاول والوقت ده أمانة في رقبتك هتتحاسبي عليها فاستعيني بالله كده وادعي دايما اللهم أرني الحق حقا وارزقني اتباعه وأهم حاجة اشغلي نفسك بالذكر وبالصلاة عشان الشيطان ميلاقيش مدخل ليكي وطالما داخلة على سنة تقيلة فخلي نيتك إن تعبك ده لله وعشان تفرحي أهلك وصدقيني اللي يسيب حاجة لله ربنا بيعوضه بأحسن منها مية مرة فجمدي قلبك وامسحي القرف ده واستعيني بالله وهو هيقويكي متخافيش .. أما الطريقه اللي مشيت معايا اني مسحت تطبيقات اللي مش يستفيد منها بحاجه والتطبيقات زي الفيس مثلا خليتها في التطبيقات المخفيه عشان اصعب الوصول ليها... ونزلت تطبيق فيدني ده وبقيت اقدم النصيحه عليه وده كان بيديني دفعه حلوه من الدوبامين اي نعم مكنتشي كفايه ولكن كانت جميله بالنسبالي اني أكمل يومي لما تلاقي حد بيشكرك أو استفاد من النصيحه ... ودلوقتي منزل التطبيقات اللي مسحتها ومش بستخدمها ... وتاني حاجه اني بدات اتابع بودكاست عشان اعالج التعفن بقيت اسمع فديوهات طويله وأتابع سلاسل في الحاجه اللي بحبها ..بس ده اللي حصل معي🤍
تم النشر الخميس، ٢٣ أبريل ٢٠٢٦
يبقي حلك الوحيد انك تدركي حجم المشكله انها كبيره اوى وخوّفي نفسك ان الوقت دا انا هتحاسب عليه يعنى ممكن يكون سبب جنه ونار ارعبي نفسك حرفيا واتحدى نفسك وقولى انا همسحه وفوضي امرك لربنا وانوى نيه حسنه انك مش عايزه تضيعى وقت وتظلمى نفسك فى الاشي والتفاهات واتحدي عقلك وقوليله انك هتمسحي الابليكيشن وانا قدها وهعرف اعمل كدا واستبدليه بأى ابليكيشن كويس ياخد وقتك مثلا ابليكيشن نختم تحفه بجد ممكن تختمى القران عليه بسرعه او ابليكيشن يفكرك انك ماترجعيش التيك توك تانى علشان ربنا يرضي عنك وانت بتضيعي وقت كتير وبعدين مافيش حاجه اسمها مافيش فايده انت بتحاولى تقنعي نفسك انك مش هتعرفي بس لو قولتي بنيه واراده انا اعرف هتعرفي اعرفي ان دا مصدر تعاسه وليس سعاده واجبري نفسك انك تمسحيه ومش ترجعي تانى حطي ربنا فى قرارك هتختارى مين يعنى شيخ قال مره "اترك ما لا يعنيك واملأ فراغ ما لا يعنيك بما يعنيك" فاهمه يعنى امسحي كل الابليكيشنز الموجوده عندك واللى بتاخد وقتك مش بس التيك توك هو السبب بردو اى تطبيق ريلز كل دا بيسحب من دماغك وغالبا يسبب نسيان شديد غير الطبيعي والرسول قال "المؤمن القوي خير وأحب إلى الله من المؤمن الضعيف" يبقى لازم يكون عندك إراده يتبعها نية وثقه فى ربنا وفى نفسك انك قدها( يَا يَحْيَىٰ خُذِ الْكِتَابَ بِقُوَّةٍ ۖ وَآتَيْنَاهُ الْحُكْمَ صَبِيًّا) خدي الموضوع جد واستعيني بربنا مش هتحتاجي الاب دا تاني انا كنت بفكر نفسي بحاجه كويسه كنت بكتب الحاجات اللى مش هينفع اعملها واحطها بروفايل للموبايل من جوا علشان مثلا ماعملهاش واغلبها بسيب المذاكره واروح افتح ريلز وكنت بخوف نفسي ان فيها ميوزك وحرام هشيل ذنوب وبالفعل اتجنبها فكرة البروفايل كانت حاجه كويسه بتفكرني انى اتجنب تضيع لوقتي وبس اسفه على الاطاله !
تم النشر الجمعة، ٢٤ أبريل ٢٠٢٦
وعليكم السلام ورحمة الله وبركاته، حياكِ الله، هقولك كلمة قالتها ليَّ معلمة القرآن، قالتلي يا فاطم طول ما أنتِ ماسكة الفون معناها إن هو أهم حياتك وأهدافك وأحلامك خلاص خليكِ عليه وضيعي نفسك وأحلامك ومستقبلك عشان حتة جهاز كل الـ فيه هيفضل ملايين السنين وأنتِ في النهاية عمرك هيخلص من غير أي عمل تقابلي بيه ربنا طبعًا الرسالة قاسية بس صدقيني هتفرق معاكِ جدًا جدًا ملايين الفديوهات على اليوتيوب عن التخلص من إدمان وسائل التواصل الإجتماعي ولكن بلا فائدة عارفة ليه؟؟ عشان لأزم تكون نفسك هي الواعظ مش الناس وعامةً لو فضلنا نتكلم لبكرة مفيش كلام هيأثر غير لو أنتِ أخدتي قرار وأقولك حاجة أصعب توقعي الأسوأ يعني مثلًا داخلة على تالتة ثانوي تخيلي نفسك كل وقتك على وسائل التواصل إذن توقعي رسوبك لما تفكري كدا هيكون عندك إدارك بخطورة الأمر وهترمي الفون وتقومي تشوفي وراكِ إيه، بجد والله مش هيفيدك في حاجة هيسرق عمرك وخلاص وحاولي تستبدلي كل ما هو ضار بكل ما هو نافع يعني ضيعي وقتك على ناس نافعة تفيدك وتنفعك والتيك توك دا بجد لا يليق بأي بنت مسلمة أبدًا تطبيق مضر جدًا ومليان ذنوب ودمر ناس كتير جدًا ابعدي عنه وصدقيني ولا أي حاجة هتفيدك طول ما أنتِ قاعدة في مستنقع التفاهات فوقي بالله.
تم النشر الخميس، ٢٣ أبريل ٢٠٢٦
ممكن تجربي تعملي الموضوع بطريقة مختلفة شوية بدل فكرة إنك تمسحي التطبيق أو تقللي استخدامه تدريجيًا لأن غالبًا الطرق دي بتكون صعبه في الالتزام وبتفشل مع الوقت. أنا شفت في فيديو كان بيشرح إزاي التطبيقات دي بتشتغل، وإزاي هي مصممة إنها تجذبك وتقعدك أطول وقت ممكن من غير ما تحسي. فبدأت أفهم إن الموضوع مش “قلة إرادة” قد ما هو طريقة شغل التطبيق نفسه. مثلاً ممكن تبدأي إنك تشيلي المتابعة عن الحسابات اللي انتي أصلًا بتحبي محتواها على تيك توك، حتى لو كان محتوى حلو زي الطبخ أو أي حاجة ممتعة بالنسبة لك. لأن النوع ده من المحتوى هو اللي بيخلي الفيديوهات تمشي ورا بعض واحدة ورا التانية من غير ما تحسي، فتلاقي نفسك فتحتِ فيديو واحد وبعدين اتسحبتي في سلسلة طويلة من الفيديوهات ومرّ الوقت من غير ما تحسي بيه. وكمان ممكن تعملي تسجيل خروج من التطبيق بدل ما تفتحيه على طول، بحيث كل مرة تحتاجي تدخلي تعملي دخول من الأول. الخطوة دي بتخلي فيه وقفة قبل ما تدخلي، وبتكسر فكرة الفتح التلقائي اللي بيحصل من غير تفكير. بعد ما تعملي كده، أول ما تدخلي التطبيق وتتفرجي شوية، هتلاحظي إن الفيديوهات اللي كانت بتشدك جامد وبتخليكي تقعدي وقت طويل بدأت تقل أو ميبقاش ليها نفس التأثير، لأنك قللتي التفاعل معاها (لا متابعة، لا لايك، ولا مشاهدة متكررة لنفس النوع). فحتى لو قعدتي تتفرجي شوية، مش هتحسي بنفس الإحساس القوي بالمتعة اللي كان بيخليكي تكملي ساعات. وساعتها غالبًا هتلاقي نفسك بعد وقت مش طويل بتزهقي وتقفلي التطبيق، لأنك أصلًا كنتِ داخلة بهدف إنك تتخلصي من الملل أو تحسي بمتعة، ولما ده ما يتحققش بنفس الشكل، بتلقائيًا بتروحي تعملي حاجة تانية غيره. وارد جدًا الموضوع يبقى صعب في الأول، وممكن تقعي أو ترجعي في نص الطريق أكتر من مرة، بس المهم إنك تكملي. لأن موضوع السوشيال ميديا مش مجرد مشكلة عادية، دي حاجة لو عرفتي تنظمي استخدامك ليها، فده يعتبر بداية إنك تنظمي وقتك وحياتك نفسها بشكل عام. آسفة على الإطالة، بس حبيت أقولك الفكرة بالتفصيل عشان تبقى واضحة ومش مجرد كلام سريع.
تم النشر الجمعة، ٢٤ أبريل ٢٠٢٦
انا كنت زيك وممكن أسوأ بس حاليا بقالي تلت سنين الا كام شهر معنديش سوشيال بفضل الله .بصي اول حاجه كنت كل ما امسحه احمله قعدت يجي أسبوعين علي الحال دا ، بعد كدا شوفت انا بفتح سوشيال امتى كانو اربع اسباب .اول ما اصحي وقبل ما انام وعلى الاكل و وقت فراغ. بقيت قبل ما انام اسيب تلفوني برا ونا باكل ببعده عني ولما بكون فاضي عملت حاجه حلوه جربيها استبدلتها بفيديوهات طويله مش ريلز مفيده هو لو الريلز مفيد ومحتوى حلو ففي الاخر مضر . من الي شوفتهم في الفيديوهات الطويله احمد ابو زيد ،علي محمد علي، قناة جيل يقرأ، بودكاست وعي، السيره النبويه لاحمد عامر، قنوات عن الحروب والغزوات عشان بحبها وشوفي انتي بتحبي ايه وتابعي فيديوهات طويله في وقت فراغك دي كنت بشوفها ونا فاضي مره مع مره اتعودت خلاص . ونقطه اخيره لو كل دا منفعش حملي تطبيقات الحظر احسن حد استخدمته ديجيتال ديتوكس بعد ما تحمليه ضيفي كل تطبيقاتك وحاجاتك المفيده جوا، وجوا التطبيق في خيار اسمه منع وسائل الغش فعليهم كلهم دا عباره انك هتحددي مده مثلا ساعه خلال الساعه دي مش هتسخدمي غير التطبيقات الي حطاها في القايمه البيضه ولو حبيتي تطلعي وتكسري الحظر لازم تدفعي فلوس. وكان في حاجه حلوه عملها كنت كاتب كل اضرار السوشيال وكل بعد ما اصحى اقرا الي كتبه ووقت ما نفسي تقولي حمل كنت بدخل اقرأ برضو دي شجعتني شويه
تم النشر الجمعة، ٢٤ أبريل ٢٠٢٦
وعليكم السلام ورحمة الله وبركاته يا عزيزتي 💕 أولاً، برافو عليكِ إنكِ جربتِ كتير ووصلتِ لمرحلة الوعي بالمشكلة – ده خطوة كبيرة! إدمان تيك توك شائع جداً بسبب الـ"دوبامين" اللي بيجي من الفيديوهات السريعة، وهو بيدمر التركيز ويسبب الـ"تعفن دماغ" ده، خاصة قبل سنة مصيرية زي اللي قدامك. متقلقيش، هنحلها خطوة بخطوة بطريقة عملية، عشان الوقت أمانة من ربنا. خطة بسيطة وقابلة للتطبيق (ابدئي النهارده): اقفلي التطبيق تماماً لأسبوع واحد فقط : مش هتقدري تقطعي خالص مرة واحدة، بس حددي هدف صغير: "أسبوع بدون تيك توك". امسحيه دلوقتي، ولو رجعتِ، قولي لنفسك "ده اختبار قوتي". استخدمي ميزة Screen Time في الآيفون أو Digital Wellbeing في الأندرويد عشان تحظريه تلقائياً (حددي 0 دقيقة يومياً). اكتشفي الـTriggers واستبدليها : لاحظي إيه اللي بيخليكِ تمسكي الموبايل؟ الملل؟ الانتظار؟ ضعي الموبايل في أوضة تانية تماماً أثناء الدراسة. استبدلي الوقت بـ: 10 دقايق قراءة قرآن أو أذكار (بتنظف الدماغ وترجع التركيز). جدول دراسي يومي: ابدئي بـ25 دقيقة تركيز (تقنية Pomodoro بدون تطبيقات، بس ساعة مطبخ)، ثم 5 دقايق استراحة مش مباشرة موبايل. ابني عادة جديدة : كل يوم قبل النوم، اكتبي 3 إنجازات صغيرة (حتى لو "قرأت صفحة واحدة"). ده هيبني ثقتكِ ويقلل القلق. وتذكري قول ربنا: "وَالْعَصْرِ * إِنَّ الْإِنسَانَ لَفِي خُسْرٍ" – الوقت ده استثمار لآخرتكِ ولنجاحكِ. تابعي تقدمكِ : استخدمي دفتر صغير أو تطبيق Habitica (مش سوشيال) عشان تشوفي اليوميات. لو رجعتِ، متلوميش نفسك، بس زدي التحدي تاني. هتقدري، يا قمر! تخيلي نفسك بعد السنة دي ناجحة وفخورة. لو عايزة دعم أكتر، ابحثي في فدني عن "إدمان السوشيال ميديا" هتلاقي تجارب كتير، أو شوفي الخبراء هنا: https://www.fedni.net/experts (فيه متخصصين في الصحة النفسية والتطوير الذاتي). قوليلي إيه رأيكِ في الخطة دي، وهتطبقي إيه أول حاجة؟ أنا معاكِ خطوة بخطوة 😊
تم النشر الخميس، ٢٣ أبريل ٢٠٢٦
لعرض السؤال في فدني اضغط هنا