السلام عليكم ورحمة الله وبركاته
من حوالي ٥ شهور قررت إني أحفظ البنات قرآن في المسجد لإن الحمدلله ربنا أنعم عليا بحفظ كتابه في البدايه الموضوع كان سهل والعقبات كانت بسيطه
بس في يوم ترفيهي في المقرأه بنت قالتلي ربنا يرزقك بعريس شيخ فأنا رديت عليها بحماس شويه قولتلها آمين ويكون ملتحي كمان بهزار وماكنتش متخيله عواقب الكلمه اللي أنا قولتها
الكلام ده كان أجازة تانيه ثانوي البنت دي في سته ابتدائي والمفروض إن أنا اللي بحفظها
بعدها لقيت البنت كل مرة تذكر اسم لأخ ليها قدامي باستمرار وتذكره بمميزات وتقعد تقولي ده أخويا ده شيخ وحوارات كتيره كده يعني كنت في غنى عنها
دماغي تلقائي بقت بتفكر في الشخص كتير من كتر التكرار
لمت بدأت ٣ث استغليت الفرصه إني أقلل تعامل وبالفعل قطعت خالص وخليت معلمه تانيه هي اللي تحفظ
بس للأسف من وقت قليل اكتشفت إن المعلمه مش متقنه ومتساهله في أمور أنا مش متساهله فيها يعني بقت بتحفظ ولاد مع بنات عادي وبتخلي واحده تانيه مش كفء خالص تحفظ
يعني الدنيا تدهورت
قررت أرجع تاني يوم في الأسبوع واحد بس ومش هيأثر على دراستي بس هيظبط المقرأه والبنت الصغيره اللي حكيت عنها في البدايه كانت بطلت تروح بعد ما أنا ماروحتش فلما روحت ماكانتش موجوده بعدها بشويه لقيتها جت وقالتلي صحابي قالولي إنك رجعتي فأنا كمان رجعت
وفضلت تذكر اسم أخوها كتير وأنا قابلت ده بالتجاهل التام على عكس الأول كنت بتفاعل معاها بردود أفعال
المشكله إن البنت دي هتكون سبب في فتنه كبيره وأنا شاكه إنها بتحكي كل حاجه عني في بيتها قدام أخوها ومتضايقه
فأنا دلوقتي أمام حاجتين ١-أنقذ المقرأه من الضياع ،، ٢- أفتن الشاب
بس أنا بكون حريصه جداا إني أقلل كلام عن نفسي قدام البنت بس هي بتحكي كل حاجه كل حاجه حتى لو أنا مااتكلمتش ممكن تروح تقولهم المعلمه كانت حاطه ميكب النهارده شوفناه لما نزلت النقاب و مثلا المعلمه كلمت مامتها في الموبايل المعلمه... 😑😑 وحاجات كتيره بقا حرفيًا بقيت حاسه إني متراقبه في كل تصرفاتي
حقيقي في البدايه حسيت بانجذاب لأخوها لإنها بتتكلم عن مميزات بس
بس أنا عارفه إن ده باب من أبواب الشيطان بس مش عارفه أعمل إيه في البنت دي 🙄
السلام عليكم ورحمة الله وبركاته.. وبعد، اول حاجة انتي مش بين خيارين .. وعليكي انك تكملي في التحفيظ ولو اتكلمت عن اخوها تقولي لها لو سمحتي متتكلميش في مواضيع ملهاش داعي ... لو ردت عليكي اتجاهليها وكملي تحفيظ / ممكن بعدها تضرك زي انها تغتابك فميهمكيش الكلام ده // غالبا الشاب هو اللي ارسلها عشان يحببك فيه ويظهر لك شخصية الشيخ عشان يستميلك ثم يدخل هو عالخط عن طريق انه ياخد رقمك أو يتقدم لك // ولا انصح بأنك توافقي عليه للزواج في المستقبل أولا لأن لو فعلا هو اللي ارسل اخته عشان تمدحه فدي طريقة فيها لف ودوران وده مؤشر سلبي .. ثانيا أن اخته عندها التسلط زي انها بتتكلم في تفاصيل عنك وعندها إلحاح مزعج زي انها كثيرة الكلام عن أخوها واصلا هي مش جاية للقرآن هي جاية عشانك بدليل انها قطعت عن التحفيظ لما انتي قطعتي فكل الصفات السلبية دي لا تؤكد ولكن فقط تعطي مؤشرات إلى أن التربية في البيت عندهم فيها مشاكل فده يدي مؤشر سلبي بالنسبة للشاب .... فباختصار خليها تبطل الكلام بطريقة حازمة + وبالله التوفيق
تم النشر الثلاثاء، ٢٧ يناير ٢٠٢٦
طالما إنتي شاكة إنها راديو وبتروح تنقل لأخوها، يبقى بلاش تحكي أي حاجة عن نفسك، ولا يومك و إنتي عملتي صح لما بدأتي تتجاهلي سيرة أخوها. استمري في ده ومهما حاولت تجر رجلك في الكلام، اقلبي الموضوع في ثانية واسأليها في التسميع أو في أي حاجة تخص المقرأة بس. المكان ده خط أحمر إنتي رايحة المقرأة عشان تحفظي وتتعلمي، مش عشان تفتني حد ولا تتفتني بحد. أول ما تلاقي فكرة الشاب ده بدأت تزن في دماغك، استعيذي بالله وركزي في المصحف اللي في إيدك، لأن دي فعلاً أبواب شيطان زي ما قلتي. بطلي تحسي إنك تحت المراقبه هي بتراقبك؟ براحتها. المهم إنتي متخليش مراقبتها دي تسيطر على أعصابك وتخليكي متوترة. عيشي طبيعي، والتزمي بأدبك وهدوئك، واللي عايز يحكي يحكي، طول ما إنتي مديتيش حد فرصة يمسك عليكي غلطة. ولو الشاب ده فعلاً من نصيبك، هيعرف يوصلك من الباب الصح. لكن الكلام من ورا لورا ده بينقص من قدرك وبيضيع وقار المكان اللي إنتي فيه. خلي علاقتك بالبنت دي رسمية جداً وبلاش تسيبي نفسك لخيالاتك، وركزي في حفظك عشان المقرأة متضيعش منك بنت صغيره تعمل كل ده في حضرتك 😅 لكن جد ربنا يحفظك ويوفقك 😊
تم النشر الاثنين، ٢٦ يناير ٢٠٢٦
وعليكم السلام ورحمة الله وبركاته يا حبيبتي 🌸 أولاً، برافو عليكِ! قرارك بحفظ القرآن للبنات خطوة عظيمة، وربنا يثبتكِ ويبارك في جهدكِ. الموقف ده فعلاً محرج ومُربك، ومش غريب إن الشيطان يحاول يفتح أبواب فتنة من أصغر الكلام، خاصة مع تكرار البنت. بس أنتِ عارفة الطريق الصح، وده يدل على قوة إيمانكِ 💪. كيف تتصرفي عملياً (خطوة بخطوة): التجاهل الكامل + التركيز على الدرس فقط : استمري زي ما بدأتِ – لو ذكرت أخوها، ابتسمي ابتسامة خفيفة وغيري الموضوع فوراً للحفظ، زي "يلا يا بنتي، نراجع السورة دي دلوقتي". متتفاعليش ولا تسألي أي سؤال، حتى لو كانت صغيرة. ده هيملها تدريجياً. حافظي على خصوصيتكِ 100% : خليكِ زي الشجرة الثابتة – ميكب، نقاب، مكالمات، كل حاجة شخصية متشاركيهاش. لو لاحظتِ إنها بتراقب، قولي بلطف "الدرس هنا للقرآن بس، خلينا نركز فيه يا قمر". ولو استمرت في الحكي الزيادة، حددي قاعدة واضحة: "لو عايزة تحفظي، نركز في القرآن، مش غيره". نظمي المقرأة بدون تعرض للفتنة : روحي يوم واحد زي ما قلتِ، بس اجعليه جماعي أكتر (مع بنات تانيين كتير) عشان ميكونش تفاعل فردي. لو المعلمة التانية مش كفؤة، ابحثي عن معلمة ثالثة موثوقة (من المسجد نفسه أو أهل الخير)، أو اقترحي على إدارة المسجد تقسيم الطلاب حسب الكفاءة. هدفكِ إنقاذ المقرأة، مش تحملي كل حاجة لوحدكِ. حماية نفسكِ روحياً : كل يوم بعد الصلاة، قولي: "أعوذ بك من الفتن ما ظهر منها وما بطن"، واقرئي آية الكرسي 3 مرات. ده سيف ضد الوساوس. استغفري ربنا كتير، وادعي: "اللهم ارزقني زوجاً صالحاً يقربني إليكِ" بدون تفكير في شخص معين. اللي مكتوب هيجي بإذن الله، مش بالفتن. لو حسيتِ الضغط زاد، خففي أو غيري المكان مؤقتاً لحد ما تهدأ الأمور. ربنا يحفظكِ من كل سوء يا رب 🌟. لو عايزة نصائح أكتر ابحثي عن أسئلة مشابهة في فدني هتلاقي إجابات كتير مفيدة. أنتِ قوية ومُلهمة، استمري! 💕
تم النشر الاثنين، ٢٦ يناير ٢٠٢٦
طيب ممكن اعرف هى اية المشكلة أنه يأتي الباب من بابه وليك
تم النشر الخميس، ٢٩ يناير ٢٠٢٦
وعليكم السلام ورحمة الله وبركاته...اول ما تتكلم سكيتها اللي تنقل كلام مره بعد كده هتخترع كلام وحش ف سكتيها وخوفيها منك بطريقه محترمه
تم النشر الخميس، ٢٩ يناير ٢٠٢٦
سكتيها اول ما تلقيها هتتبدا تتكلم في موضوع اخوها كلميها بحزم انك مش عايزة تسمعي حاجة خارج التسميع او القراءة ومتديهاش اهتمام
تم النشر الأربعاء، ٢٨ يناير ٢٠٢٦
عليكم السلام ورحمة الله وبركاته ـ اذا كانت تحكي في البيت واخيها شيخ او تدعي ذلك كان منعها هو لعلمه بعواقب هذا او كان تقدم لخطبتك لكن يبدو ان الامر غير ذلك ونحسن به الظن ونقول انه لم يعلم عن الامر اصلا ـ على اي حال الحل الوحيد هو المنع والتوقف عن هذا العبث قولي لها بشكل صريح مع اللطف ان ما تفعله خطأ وانصحيها هي صغيرة ويمكن لا تعلم المهم ان توقفي هذا لأن عواقبه وخيمة جدا لو تعلق بقلبك شيء. الله المستعان.
تم النشر الاثنين، ٢٦ يناير ٢٠٢٦
والمشكله إني أوقات بكون غبيه وبتلطف قدام البنت دي وأحيانا بتكلم عن نفسي لإني عارفه إنها هتقول
تم النشر الاثنين، ٢٦ يناير ٢٠٢٦
لعرض السؤال في فدني اضغط هنا