هل أنا صح أم أمي وكيف أتصرف في مشكلتي معها؟

Question

السلام عليكم، دايما انا و ماما يحصل بينا زعل ومنكلمش بعض بسبب المذاكرة وان نومي تقيل وبطول اوي انا بقولها ان بسبب تعبي وغصب عني تقولى اى حد شايل مسؤوليه المفروض ميعرفش ينام اصلا انا ثانويه عامه بس عشان تفهموا ويا جماعه انا متشخصه بالقلق والتوتر يعني نومي رده فعل لجسمي لتخفيف ده بس هى يعني مش متفهمه ده وكل مره نزعل انا اللى ارجع اصالحها مع اني فى اوقات هى اللى بتبقي غلطانه حاليا مش بنكلم بعض بسبب نفس الموضوع بس اختلاف اني امبارح للاسف اعصابي كانت تعبانه كده وكنت حرفيا منهاره تماما وهى مكنتش فى البيت وقتها انا بطبعي كتومه باى حاجه تحصلي وبخبي لو كنت بموت حتى وامبارح ظهر عليا تعبي اوي والحاله الصعبه اللى كنت فيها جات وقالتلى مالك بعصبيه ما انا قبل ما امشي كنتي كويسه وبقالك يومين كويسه كل شويه على القرف ده ( انا بيحصلي كده بقالى كذا شهر وبنهار تماما ونفسيتي وحشه جدا وكمان مش بستحمل كلمه من حد اما بتعصب او بعيط بشكل مش طبيعي ) عايزه اقول اني ببعد عنها ومش بتكلم معاها غير لما اتحسن عشان مأذيهاش بردات فعلى اللى مش بحس بيها والله ببعد عشان خايفه عليها مني هى شايفه ده قساوه قلب مني وانا بتعمد عدم الكلام معاها كل مره آجي افهمها كده بعد ما اصالحها لساني بيتشل ومش بقدر أصارحها دلوقتي انا صعبان عليا نفسي اوي انا تعبانه اوي نفسيا المفروض هى اللى تيجي تصالحني وتكلمني ليه مش مقدره ظروف مرضي انا صح ولا غلط واتصرف ازاى

Accepted Answer

وعليكم السلام ورحمة الله وبركاته قرأت تعليقات من أجادوا بالنصح والمعاونة، وإجاباتك التي تخبر عن بنت طيبة القلب ودودة حساسة مجتهدة وعقلانية تحب الخير لنفسها والحماية لأمها، فجزاك الله خير الجزاء لحرصك على برها، لكن يا بنيتي اعلمي أنه برغم حسن نيتك فإن فعلك يحزن أمك، ربما لأنها تظن أنك بهذا يسهل استغناؤك عنها أو أنها للا قدر لها بقلبك وهذا مما يلقيه الشيطان في الأنفس في مثل تلك المواقف فلا تكوني عونا له عليها، قد عرفتي عن نفسك أنك كتومة وهذا الكتمان يزيد من الآلام ولا يحل مشكلة، لذا حاولي أن تتعلمي كيف تعبرين عن مشاعرك وآلامك لأجل التفريغ أولاً حبذا عن طريق الكتابة، ثم شرحه وتوضيحه لأمك بصيغة مناسبة تعينها على تفهم ما تمرين به واحتواءك وهذا تدريب لك ينفعك مستقبلا في التعامل مع الناس عموما، ومع أهلك وزوجك خصوصا، فليس كل الناس يتقبل الانعزال ويفسر بشكل صحيح ومنطق سديد أسباب الكتمان، ولا يعني هذا أن لا تأخذي وقتك في استعادة ذاتك أو تحجيم غضبك، لكن لا تفعلي ذلك كل الوقت ولا تطيلي مدة السكوت والعزوف فإن لهذا أيضا أثر غير محمود على صحتك النفسية، وهو فرصة يغتنمها الشيطان ليحزن بني آدم حين ينفرد بهم في مثل تلك الأوقات. لو أمكن أن تسألي الطبيب عن تغيير مواعيد العلاج بحيث تنامين بالليل وقت كافي وتستيقظي قبيل الفجر للمذاكرة فهذا وقت سكون والتركيز يكون أفضل وفيه تنزل الرحمات من رب الأرض والسماوات وإنه لفرصة عظيمة لتنعمي بصلاة ركعتين قيام ودعاء بالتوفيق وبعده صلاة الفجر وهذا وقت مبارك حث النبي صلى الله عليه وسلم على اغتنامه بدعوته قائلا: " اللهم بارك لأمتي في بكورها"، كما أن تنظيم مواعيد نومك بهذا الشكل ستعينك بمشيئة الله على تقليل التوتر، وهذا سيصب في علاقتك بوالدتك لو اغتنمتي الفرصة في إعداد فطور لكما تقدميه مع قبلة حانية على جبينها ويدها وتسعدي بدعوتها في أول يومك تعينك على صعاب الحياة، وتبدأي مذاكرتك بنفس راضية. أود تذكيرك أيضا بالتسبيح فهو جلاء للصدر من أي كلمة محزنة، وهو وصية ربنا لنبينا صلى الله عليه وسلم، وسبب لحب الرحمن ويثقل به الميزان وتغرس لك به أشجار ونخيل في الجنان.. ووصيتي الآخرة اجعلي مذاكرتك طريقك للجنة فأخلصي النية لله، لتكوني خير فتاة مسلمة تفخر بها أمتها فلا تقدميها على فرض ولا تخافي من الدرجات أكثر من خشيتك من الله فإن ما ستسألين عنه لا علاقة له بمجموعك، لكن هل هذا العلم قربك من الله وعرفك عليه وأعانك على عبادته أم استعملتيه في التفاخر على الناس والتشكيك في الثوابت من الدين أو الضلال والإضلال، لذا ضعي السؤال أمامك ( ماذا عملت فيما علمت؟) وقولي دوما اللهم يا معلم داوود علمني ويا مفهم سليمان فهمني واستودعي الله ما فهمتيه وحفظتيه من معلومات فعند الله لا تضيع الودائع وعند الامتحان قولي الدعاء النبوي " اللهم لا سهل إلا ما جعلته سهلا وأنت تجعل الحزن إذا شئت سهلا" وفقك الله لمرضاته، وشفاك وعافاك، ورزقك بر والدتك.

Answer

بصي يا بنت الحلال الموقف رخم بس انتي محتاجة تشغلي دماغك عشان متبوظيش اعصابك زيادة و مامتك مش هتفهم يعني ايه قلق وتوتر وتفسير علمي للنوم الكتير هي شيفاه كسل فبلاش تبرري وانتي منهارة عشان كلامك بيبان حجج في نظرها و لما تبعدي عشان متغلطيش فيها ده صح بس لازم تعرفيها انك بتبعدي عشان مش عايزة تزعليها مش قسوة قلب قولي لها يا ماما انا مش قادرة اتكلم دلوقتي عشان مخسرش رضاكي وسيبيني اهدي واجيلك و متستنيش منها هي اللي تصالحك ولا تقدر تعبك النفسي لان الجيل ده مبيعترفش بالكلام ده غالبا صالحيها انتي عشان تشتري دماغك والبيت يهدى وتعرفي تركزي في مذاكرتك ومستقبلك الخلاصة كبري دماغك وقولي حاضر وطيب عشان المركب تسير واعتبري سكوتك ده حماية ليكي وليها لحد ما السنة دي تعدي على خير وربنا يقويكي ويعينك على اللي انتي فيه وجد والله ربنا يحفظك وتحقيي اللي تتمنيه ومتنسيش الثانويه العامه مش نهاية العام متكبيش الموضوع اهم حاجه صحتك البدنيه والنفسيه 🌷

Answer

هو كدا كدا فى كلا الحالتين انك المفروض تصالحيها دايمًا مش هى خالص مش تحطى نفسك قدام مفهوم انك مريضه علشان عقلك ميعتمدش الفكره دى ولو اعتمدها انت مش هتعرفى تعملى حاجه وهيكون مبررك لنفسك انا مريضه! لا متعمليش كدا وحاولى تفهمى نفسك ان دا مجرد توتر علشان الثانويه والوقت واوشكنا على النهايه خلاص وممكن فعلا انك بسبب خوفك وتوترك من ثانوى بتنامى واحتمال كبير يكون النوم دا مش نوم صحى يعنى مش نوم بتعمق اللى اى شخص ممكن ينامه بالعكس انت ممكن تنامى بس دماغك شغاله باللى حواليك انا كنت زيك فى الاول بس عرفت ان ماما زعلانه منى علشان النوم اللى مش متظبط ودا بسبب التوتر مش اكتر لكن انا عارفه لو مظبطتش نومي هفضل مع ماما خناقات صبح وليل وبالاخص انى كنت بنام بالنهار و بذاكر بليل ودا هى مش بتحبه علشان مش بتكون متطمنه عليا وانا سهرانه الليل كدا وانا السنه اللى فاتت اغمي عليا بسبب النوم دا والمشكله كنت فى امتحانات وقلقت كل البيت بسبب الشي دا ولو معتقده مامتك تتغير مش هتتغير انت اللى لازم تغيرى تصرفاتك علشان ماما تكون فاهماك ومش تتخانقوا مع بعض حتى لو جيتى على نفسك معلش استحملى علشان دى ماما وهى بتعمل كدا علشان خايفه عليك والله انا اكتشفت دا بعدين اما فهمت ماما كانت بتتعامل بجديه شويه علشان بس مش اذى نفسي بس دلوقتى فهمت كل حاجه وهى بخوفها و خناقاتها معايا عرفتنى اتعامل صح مش تزعلى دا اول طريق انك تتعلمى الصح من مامتك ظبطى نومك وحسنى مذاكرتك و ارجعيلها بأعلى الدرجات علشان تشوفك فى اتجاه تانى وخلي بالك مش تقنعى نفسك انك مريضه علشان هتقتنع بسهوله

هل أنا صح أم أمي وكيف أتصرف في مشكلتي معها؟

نفسية

اجتماعية

أهل

سؤال من احد أعضاء فدني

تم النشر الاثنين، ٦ أبريل ٢٠٢٦

4 إجابة

5 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك