انتي عندك استعداد تكملي مع شخص انتي مش طايقاه ولا طايقة عيوبه لمجرد إنك خايفة من كلام الناس وشماتة اللي كنتِ مخطوبة لهم قبل كده؟! هل انتي فاهمة معنى الزواج والمسؤوليات المطلوبة منك لما تتزوجي؟ مدركة إنه شراكة بين طرفين لازم يكون بينهم قبول واحترام متبادل وهيبقى فيه مودة ورحمة والطرفين مسؤولين عن بعض وعن أطفال لازم يتربوا في جو أسري سليم يطلعهم أشخاص متربيين صح من غير عقد نفسية واجتماعية؟ هل الزواج بالنسبة لك مجرد مهرب من الوحدة والخوف من المستقبل؟ وهروب من كلام الناس؟ الناس مالهم بأي حاجة في حياتك؟ الناس مش هينفعوكِ ولا اللي كنتِ مخطوبة لهم هينفعوكِ لما تعيشي تجربة فاشلة وترتبطي بشخص انتي رافضاه للدرجة دي... الناس مش هينفعوكِ لو فاض بكِ بعد كده وقررتِ تنفصلي بعد كده والله أعلم وقتها هيكون فيه أطفال ولا لأ؟ فكرك وقتها مش هيتكلموا ويشمتوا بعد ما تبقي مطلقة في نظرهم؟ انتي محتاجة تحبي نفسكِ أكتر وتفهمي رسالتك في الحياة وهدفك الصحيح من الزواج والمواصفات اللي انتي مش هتتنازلي عنها في شريك حياتك مهما ده خلاكِ تتأخري ومهما كان عدد اللي هتقابليهم وترفضيهم. ونقطة أخيرة... مفيش حاجة اسمها ربنا بيعاقبكِ عشان رفضتِ شخص... الخطبة معمولة عشان نشوف هل فيه قبول وهينفع نكمل ونرتبط في زواج نحترم فيه بعض ونؤسس أسرة صح ولا لأ؟ من حقكِ ترفضي... من حق الشخص التاني يرفض... مفيش ذنب على حد، كل شيء قسمة ونصيب. ربنا يكتب لك الخير ويرضيك به. تحياتي.
لعرض الإجابة في فدني اضغط هنا