السلام عليكم، أولا مبارك افتتاح البراند، وإن شاء الله ربنا يوفقك ويرزقك من حلاله. الافتتاح هو بداية الشغل الحقيقي. و٣ أسابيع لسه بالأول وطبيعي يبقى لسه مفيش متابعين ومبيعات لأن البراند لسه موصلش للناس ولو وصل لنسبة قليلة فهم لسه مبقوش عملاءك ولا عندهم سبب للشراء من براند جديد ميعرفهوش في وجود براندات تانية هم اتعودوا عليها. *** فالحل إنك أولا لا تيأس. وابدأ خطوات عملية للتسويق. إذا مش عندك أي علم بالتسويق فأنصحك تشوف على اليوتيوب أي كورس لمبادئ التسويق، على الأقل اعرف الأساسيات لأن تسويق المنتجات والتسويق عموما مش مجرد افتتاح وعمل صفحة وتنزيل بوستات. فيه قواعد المفروض تمشي عليها عشان تنجح في التسويق لنفسك ومنتجك وتكسب ولاء العملاء. ** أهم خطوة بالبداية، هي تحديد جمهورك المستهدف وأماكن الوصول إليه، متفتحش صفحة وخلاص من غير ما تبقى محدد مين جمهورك بالضبط لأنك مش بتستهدف كل الناس، وتحديد جمهورك هيسهل عليك الوصول لهم ومخاطبتهم بالطريقة اللي تجذبهم وتحولهم من جمهور مستهدف لعملاء محتملين ثم عملاء لديهم ولاء للبراند بتاعك. *** كمان مهم جدا تدرس السوق وتدرس منافسيك. اختر ٣ أو ٥ من المنافسين الناجحين وتابع صفحاتهم وشوفهم بيشتغلوا إزاي، طريقة التصوير والبوستات وكتابة البوست التسويقي وبينشروا كل قد إيه وتفاعلهم مع الجمهور في التعليقات عامل إزاي. أنت مش بتعمل كده عشان تقلدهم، أنت بتتعلم منهم وتدرس نقاط القوة والضعف. **** إذا مش عندك حد يساعدك في كتابة البوستات التسويقية فجرب تشوف لو معك ميزانية أو تعلم من المنافسين (مش تقلدهم) أو استثمر وقتك في تعلم كورس مجاني لكتابة المحتوى التسويقي على السوشيا ميديا. ممكن أرشح لك ده، إن شاء الله يفيدك. https://youtu.be/KJOw1sWeNtc?si=9EhzazZJ5GzSrOSK وأرشح لك أيضا د. إيهاب مسلم، هيفيدك جدا في التسويق، وخاصة (عيادة الشركات) ده رابط قناته https://www.youtube.com/@ehabmes/playlists **** النشر على الصفحة ميكونش صور للمنتجات وفقط، اعرض تفاصيل، الخامة، الألوان، المقاسات وهكذا واستغل الفيديوهات كمان. *** وأخيرا إذا عندك ميزانية ولو صغيرة، خصص جزء لإعلانات مدفوعة بس شوف فيديوهات الأول على يوتيوب عن إزاي تعمل إعلان يجيب نتيجة وإيه الأخطاء اللي لازم تتجنبها في عمل الإعلان. ده ضروري عشان متدفعش فلوس وتلاقي مفيش نتيجة وتكون المشكلة في طريقة عملك للإعلان نفسه. ** أرجو إني أكون أفدتك. وربنا يوفقك إن شاء الله.
بخصوص المتجر الإلكتروني أو الويب سايت، برضه طبيعي ميكونش فيه زيارات لأن المواقع عامة لازم تتعرف من محركات البحث وتتصدر أو أنت تنشر الرابط لجمهورك فيبدأوا يوصلوا للموقع وبالتالي محركات البحث تاخد بالها منه... فيه برضه في التسويق (سهل مهدي) ممكن تتابعه وتستفيد من فيديوهاته. ده فيديو له عن نجاح المتجر الإلكتروني وممكن تبحث عن فيديوهات تانية على يوتيوب أو مقالات عن كيفية إنجاح متجرك الإلكتروني. https://www.youtube.com/watch?v=tvnkrKyylXo
تم النشر السبت، ١ أغسطس ٢٠٢٦
لعرض الإجابة في فدني اضغط هنا