السلام عليكم -تجربة اخوك خاصة بيه ممكن يكون اختياره مكنش صح او هو مكنش الزوج المناسب لطليقته واكيد عارف ان صوابعك مش زي بعضها - السن مش مقياس لان في ناس كتير بيبقى سنهم صغير بس كعقل واخلاق وتصرفات وتدين اكبر بكتير من سنهم - فالمقياس في البنت اللي هتقدر تفهمك البنت اللي هترتاح معاها البنت اللي هتعينك على الدين وتاخدوا بايد بعضكم للطريق الصح فلما تدور دور على الاخلاق والسمعة الكويسة والتدين واخطب وخد وقتك كويس في فترة الخطوبة علشان تعرفوا بعض كويس (واكيد الالتزام بالضوابط الشرعية )وصلي استخارة - لكن لو بردو عايز رقم يبقى من اول 18 وطالع لان حضرتك كمان صغير 27 مش كبير خالص ولا اتاخرت على الجواز- ربنا يرزقك بالزوجة الصالحة اللهم امين
ركزت علي التفاهم لانه ركن اساسي من اركان الزواج يعني عادي اتنين يتزوجوا بدون حب لكن لو مفيش تفاهم الزواج مش هيستمر وعلشان كدا الله عز وجل قال في كتابه العزيز (وجعل بينكم مودة ورحمة )لان الحب هيتولد لما يبقي في تفاهم ومودة بين الزوجين -وبالنسبة للعصبية ف العصبية بتدمر حاجات كتيرة حلوة سواء في الزواج او اي موضوع تاني -ايه اكتر علامة انها تطمن ؟ مش علامات علي قد ما هي مواقف بردو من وجهة نظرنا ك بنات التدين بيطمنا جدا من حيث اننا بنشوفوا بيصلي -بيغض بصرة ودا لما نشوف بعنينا -الاحترام المتبادل يعني لما يتخانقوا ما يشتمهاش (لان للاسف سمعت انه الراجل بيشتم البنت باهلها كمان ) الحنية -الامان -السند -وكمان طريقة معاملة الراجل لاخته وامه بنشوف اذا حنين معاهم ومصاحبهم دا بيطمن بردو -بص من الاخر كدا يبقي عامل زي ابطال الروايات -وفي الاخر يبقي الزواج كالبطيخة المقفولة - معرفش بقي وجهة نظر الجالة ايه
تم النشر السبت، ١٠ يناير ٢٠٢٦
شكرًا بجد على شرحك وتفصيلك، وبالعكس وجهة نظر حضرتك مهمه جدًا بالنسبة لي ووضحتلي نقط كتير كنت محتاج أفهمها بالشكل ده. عجبني تركيزك على التفاهم والتحكم في العصبية واختلاف الطباع واحترام الأهل لأن دي فعلًا حاجات بتفرق في أي علاقة وبتمنع مشاكل كبيرة قدّام. حابب أسمع منك أكتر: إيه أكتر علامة تحسي إنها تطمّن في فترة الخطوبة إن الشخص اللي قدامك مناسب فعلًا؟
تم النشر السبت، ١٠ يناير ٢٠٢٦
من وجهة نظري كبنت التفاهم والتقدير اهم حاجة بالذات وقت المشاكل -التحكم في العصبية والطرفين يسمعوا بعض وبلاش فرض الراي لان اولاالبنت بتبقي لسه في بيت ابوها يعني كلمته هو اللي تمشي وثانيا بتدايق من فرض الراي بالنسبالنا لو الراجل يقعد ويتكلم ويطلب بهدوء والله هنفذ لكن بعصبية وفرض ومقارنة يا انا يا الحاجة دي هتلاقي الموضوع باظ خالص وهتحصل مشاكل كبيرة -اما بالنسبة لاختلاف الطباع : ف هو طبيعي هيبقي في اختلاف بس في طباع هتقدر تستحملها وفي لاء بس نصيحة الطبع اللي انت شايف انك مش هتقدر تتحمله يبقي بلاش ترتبط بصاحبه الطبع لان تغيير الطباع صعب دا لو اتغير اصلا -تتاكد ازاي؟ من فترة الخطوبة من كلامها معاك ومع اهلك وهتعرف من الظروف اللي هتتعرضوا ليها في فترة الخطوبة -من غير تجاوز ضوابط الخطوبة : لما تزورها يبقي في حد قاعد معاكم اختك او اختها مثلا واكيد طبعا من غير تلامس واتكلموا براحتكم -وفي الموبايل ابقي اعمل مكالمة جماعية مع اختك او اختها (مع اني اشك ان حد بيعمل كدا )بس حتي لو بتتكلموا لوحدكوا يبقي في انضباط واحترام يعني بلاش كلام رومانسي ولا حبيبتي ولا حبيبي ولا الكلام المبتذل دا -اسفة علي الاطالة دا الموضوع من وجهة نظري التي ليس لها اي قيمة (بس دا تفكيرنا كبنات )
تم النشر السبت، ١٠ يناير ٢٠٢٦
كلامك محترم جدا ومنطقي👌 فعلًا السن لوحده مش مقياس، والأهم العقل والتفاهم والدين زي ما قولتي.. حابب أعرف أكتر رأيك في نقطة التفاهم واختلاف الطباع، إزاي ممكن الواحد يتأكد منها من غير ما يتجاوز ضوابط الخطوبه
تم النشر السبت، ١٠ يناير ٢٠٢٦
لعرض الإجابة في فدني اضغط هنا