كنت بحب بنت جدا وهي من محافظة تانيه وعيله محترمه وهي بنت محافظه جدا وحافظه جدا واتعرفنا علي بعض وحبينا بعض وكنت مفهمها ظروفي وكل حاجه
انا لسه مخلص جيش من كم شهر ووعدتها اول ما الاقي وظيفه هتقدملها فورا واخطبها وهي كمان معايا و دايما بتسندني الصراحه كمان لكن كل اسبوع كانت بتطلب انه نترك بعض لأنه شايفه انه حرام حوار الأرتباط ده بدون علاقه رسميه وكنت بحترمها جدا وزاد حبي ليها بسبب خوفها من ربنا وفعلا كنت بوافقها وكمان عشان ربنا يباركلنا ف علاقتنا فيما بعد مع العلم هي كانت تقرر القرار ده اصلا لوحدها يعني نكون مبسوطين وبنتكلم عادي وفجأه تاني مترضاش تردي عليا ولا تبعت رسايل ولا تطمن ولا حاجه بس اول ما تحصل معاها مشكله او احتاجتني ف حاجه بتبعتلي وتقولي بعدها انها كانت متكلمنيش تانى ابدا عشان حرام وكده لكن مقدرتش ونرجع تانى نتكلم تاني وتتكرر نفس القصة من تاني وهكذا لحد ما جيت بعد العيد بكم يوم لقيتها مبتردش ابدا ورجعنا تاني انه رافضه نتكلم ولكن المرادي زودتها اوي بقت مبتردش سواء واتس او ماسنجر او فون وبعد كده بعتتلي قالتلي ابعد عني خالص ومش عاوزه اعرفك تانى وعملتلي بلوك وبعد محاولات كتيره ف اني احاول اعرف ليه قالت وعملت كده
ردت اخيرا على الماسنجر وقالتلي مش عاوزه اعرفك وابعد عني خالص ومتحاولش ترن عليا تاني ولما حاولت اعرف ليه كل ده قالتلي ف النهاية انه مامتها شافت الشات اللي ما بينا وحصلت مشكله كبيره وابعد عني ولما حاولت اعرف ايه اللي حصل بالضبط رفضت وكل كلامها كان ابعد عني ومش عاوزة اعرفك وبعد كده عملتلي بلوك وحاولت اكلمها لحد ما بعتلها من رقم ليا جديد وكلمتها وبعده كده رنت عليا وكلمتها وقولتلها انه انا محمد وكده وقالتلي ابعد عني لو سمحت ومش عاوزه اعرفك ومتبعتليش من ارقام غريبه ولا تحاول ترن عليا من اي مصيبه تانيه
و حاولت افهمها انه مش ب ايدي اللي حصل ومش ذتبي انه مامتك شافت الشات وحصلت المشكله وانتي عارفه الظروف وكل حاجه لكن هي كانت رافضه كل كلامي ومصممه بس تقولي ابعد عني و مش عاوزه اعرفك تاني
وقفلت بعدها ومن وقتها بدأت أفكر اتجنب التفكير فيه وبقنع نفسى انها متستاهلش اصلا المحاوله لأنها لو بتحبنى كانت عالأقل تبعتلي رسالة توضّح اللى حصل مثلا وتقولي مثلا انا عاوزاك وده رقم والدي و عنوان بيتنا وتنور ف اي وقت لكن كلام شات او واتس او مكالمات لا مفيش تاني ابدا وانا كنت هحترمها اكتر واحبها اكتر لكن هي اول شخص ضحت بيه وقت المشكله كان انا
انا قولت حقها تعملي بلوك وتتبع اهلها وتطيعهم لكن برضو متظلمنيش كده وتفهمني عالاقل زي ما قولت
اخر حاجه لقيتها مش عاملالي بلوك علي التيليجرام وهي اصلا مش بتفتحه غير قليل وقت الدراسه بس كمان وبعتلها رساله طويلة مضمونها انه مستحقش اللي حصل منها ده ومش ذنبي اللي حصل والمشكله اللي حصلت دي وقولتلها مش مستاهله تفضل حاطاني ف البلاك ليست وتعملي بلوك من كل ناحية لأنه خلاص مبقتش عايزها ف داهيه وانها شخصيه ندله اصلا وشتمتها وعاتبتها طبعا مش بقله ادب او حاجه وبعدها عملتلها بلوك ع التيليجرام وبلوك ب ارقامها ع الواتس والماسنجر
بس خايف بعد كل ده اكون غلطان و ظلمتها و جرحتها لأنه معرفش ايه اللي حصل معاها بالضبط ولا الظروف
فلو حد يقدر يساعدني ويعرفني اذا كنت غلطان ولا لأ لأنه حاسس بالخنقه والزعل جدا وشكرا
اولا موقفك كان ناتج عن انفعال كبير وهى مغلطتش فيك فى انفعالها عموما . فده تصرف طبعا مش حلو منك لانك زى ما قولت متعرفش حاجة اصلا عن اللى حاصل عندها. انت قاعد تحلل وتقول المفروض وكانت تعمل وتسوى وهى ممكن تكون خايفه تقول اى كلام يتشاف تانى وتقع فى مشكلة اكبر. اولا التمس لها العذر لانك متعرفش ايه اللى حاصل معاها لو انت يا ابن الحلال شاريها فعلا هتدور على مكانها وتتقدملها وتستحمل ان اهلها واخدين عنك فكرة وحشة انك اتكلمت معاها من وراهم وانك كده شخص بتلعب بيها وبس. الواحد شاف كتير ناس اترفضت اكتر من مره بس تمسكهم بالبنت بيخلى الاهل يتأكدوا انه شخص يستحقها وهيحافظ عليها .
تم النشر الجمعة، ٧ يوليو ٢٠٢٣
أيوة أنت غلطان .. وغلطت مرتين مش مرة واحدة! غلطت لما فضلت تتكلم معاها في الشات وشايفها بتحاول تبعد خوفا من ربنا وبرضه بتتكلم معاها ومش قادر تصبر لحد ما تتقدم مرة واحدة .. غلطت أنك ماساعدتهاش تتوب من هذه العلاقة غير الرسمية علشان ربنا يبارك لكم لما تتقدم رسمي وغلطك دة سبب لها مشكلة كبيرة في بيتها لما أهلها اكتشفوا - وأكيد هي عيلة محافظة زي بنتهم - والله أعلم عملوا إيه فيها. غلطك دة كسر أو هز ثقة أهلها فيها للأسف وأكيد جرحها. من كل المشاكل اللي بنشوفها في فدني عرفنا يقينا أن الحرام أول ما بيدخل أي علاقة بيبوظ الدنيا والموضع بيتعقد! طبعا هتقول كلامكم في الشات كان محترم وكدة .. بس حاول تفكر لو اكتشفت أن أختك بتكلم واحد كلام محترم زي كدة أنت هيبقى موقفك إيه! وغلطت مرة تانية انك ماحترمتش رغبتها بأنها تقطع العلاقة دي - بعد الكلام اللي سمعته من أهلها - كان المفروض أول حاجة تقولها لها بعد ما صلت لها يا بنت الناس عايز اتقدم لك في البيت موافقة ولا لا .. ولو قالت لا خلاص كل شيء قسمة ونصيب ولكنك بدل كدة قعدت تطاردها في كل حتة كأنك عايز تثأر لكرامتك .. مش بس كدة ولكن قلت لها ندلة وفي داهية وكلام بايخ ملوش لازمة لا تحاول التواصل مرة تانية معها ولما تلاقي واحدة عجبتك خليك راجل وادخل البيت من بابه على طول ولو الظروف مش متيسرة يبقى تصبر. والله أعلم
تم النشر الجمعة، ٧ يوليو ٢٠٢٣
كان نفسي افيدك بس انا عايز اللى يفدني لاني واقع في نفس الحفره
تم النشر السبت، ٨ يوليو ٢٠٢٣
لعرض السؤال في فدني اضغط هنا