دلوقت انا واحدة عندي 19 سنة كنت في ثانوية عامة ودخلت كلية ألسن من علمي رياضة من وانا في تالتة اعدادي جالي صدمة من اصحابي وكنت وقتها ممتازة جدا في الدراسة وكنت بذاكر بدح بدح يعني ماشاء الله من اول ما هم بعدوا عني وانا شخصيتي اتغيرت جدا اه اتحسنت في حاجات كتير الحمد لله ومبسوطة اني بعدت عنهم بس في نفس الوقت مابقتش شاطرة خالص في دراستي انا اه الحمد لله قدراتي كويسة واساسياتي حلوة بس معدش عندي شغف ومعتش بذاكر كويس ولا بدي المذاكرة حقها وبأجل لآخر لحظة وساعات مابذاكرش خالص مع اني ماكنتش كده ابدا بتحسر على نفسي والله بشوف ناس قدي حاليا نفس شغفي اللي كان زمان بتقهر على نفسي جدا وكل يوم اقول هبقى انسانة تانية وهرجع احسن من الاول كمان وبنظم وقتي وبردو مفيش فايدة حتى في عز امتحاناتي في الثانوية العامة اللي هي اصعب فترة كنت بضيع وقت وكنت بسلي نفسي بأي حاجة وكنت بذاكر قليل مع ان كان يمكن اكون مراكمة فصل كامل مفتحتوش خالص ارجوكوا حد يشوفلي حل انا حقيقي عايزة اتغير ومش عارفة انا مش بتحجج ابدا باصحابي لكن انا ده اللي لاحظته
السلام عليكم، بصي مش شرط يكون اللي حصل مع صحابك هو سبب تراجع مستواك الدراسي، ممكن آه يكون غير حاجة في شخصيتك أو خلاكِ مبقتيش حاسة بأمان أو ثقة بنفسك وتقديرك لذاتك، بس متجزميش إنه السبب الوحيد عشان كده ممكن تكون فيه أسباب تانية زي فقدان الدافع أو إن المذاكرة بقت مصدر ضغط بالنسبة لك والاسباب دي لازم تتعالج عشان تحلي المشكلة من أساسها، فراجعي كده نفسك وأفكارك وشوفي إيه تاني غير تجربتك مع أصحابك غيّر تفكيرك ناحية المذاكرة وخلى شغفك يروح. *** وهل الشغف المفقود ده خاص بالمذاكرة بس ولا امتد لكل جوانب حياتك وهواياتك والحاجات اللي كنتِ بتحبيها؟ *** متجبريش نفسك ترجعي نفس النسخة القديمة بأسرع وقت ولا تأجلي المذاكرة لحد ما ترجع النسخة الدحيحة منك. ابدئي حتى لو بخطوات صغيرة وإنجازات قليلة في اليوم ده أفضل من إنك تفضلي واقفة ومش بتتقدمي أي خطوة. ** أنتِ مركزة جدا على شغفك القديم، (بتحسر على نفسي والله بشوف ناس قدي حاليا نفس شغفي اللي كان زمان بتقهر على نفسي جدا) رغم إننا كبشر مش ثابتين على حال وبنتغير مع كل يوم وتجربة بتمر فتقبلي التغير اللي حصل ومتركزيش على الماضي، وابدئي اعملي نسخة جديدة وشغف جديد، مش شرط يكون بقوة الشغف القديم لكنه بداية ومع الوقت ممكن حتى يكون عندك شغف أقوى من القديم، خاصة إن الدارسة بالكلية أصلا بتفرق عن الإعدادي والثانوي. *** محاولة إجبارك لنفسك ترجع زي ما كانت وتذاكر بنفس القوة، هو أصلا ممكن يكون سبب في التسويف وكره المذاكرة اللي عندك. ** متجبريش نفسك تتغيري بين يوم وليلة، زي ما قلتِ إنك بتصحي تقولي هبقى إنسانة تانية... وده مش هدف واقعي. التغيير بياخد وقت، فاعملي حسابك في خطة مرنة واقعية وبمراحل زمنية وتوقعي إن عادي يحصل مطبات وعادي أمر بفترات كسل وملل بس هفضل مكملة في الطريق لحد ما أوصل للنسخة اللي عاوزاها أو أفضل. مش من أول يوم أو يومين لقيت إني مش عارفة أتابع يبقى أنا كده فاشلة ومش هتغير. ثقي في نفسك أكتر من كده واصبري وثابري لحد ما توصلي. *** بالنسبة للمذاكرة، اقعدي مع نفسك وراجعي نظرتك للكلية اللي بتدرسي فيها وابدئي فكري إزاي تستغليها في تحقيق مستقبل واسم لكِ والدوافع اللي تحركك للإنجاز في الكلية وجددي نيتك من المذاكرة، ومتربطيش بين قيمتك الذاتية ومستواكِ الدراسي أو درجاتك في الامتحانات. ومتقارنيش نفسك بحد، ركزي إنك تفهمي نفسك ونقاط قوتك وضعفك وتحلي العقبات اللي واقفة في طريق تفوقك. *** الأهم من كل اللي فات، استعيني بالله وابدئي حتى لو ببطء السلحفاة ومتنتظريش رجوع الشغف عشان تبدئي، هو هيرجع لما تبدئي. بالتوفيق إن شاء الله.💚💚
تم النشر الأربعاء، ٤ نوفمبر ٢٠٢٦
يا بنتي، أول حاجة أحب أقولها لك إن اللي مريتي بيه صعب جدًا، وصدمة الأصحاب في سن صغيرة زي كده بتأثر على الثقة والشغف بشكل عميق، مش بس في الدراسة. إنك قدرتي تتحسني في جوانب كتير وتبعدي عنهم ده إنجاز كبير، والحمد لله على ده. الشغف مش بيروح للأبد، هو بيخفت بسبب الصدمة والخوف اللي اتكون جواكِ، وده طبيعي جدًا في سن 19 سنة. كتير من الناس بيمرّوا بنفس الإحساس ده بعد صدمات، والرجوع ممكن لما نبدأ بخطوات صغيرة وواقعية بدل الوعود الكبيرة اللي بتضغط علينا. ابدئي بخطوات عملية بسيطة: حددي هدف يومي صغير جدًا، زي مذاكرة 25 دقيقة بس في مادة تحبيها أو حتى مراجعة أساسياتك اللي قلتِ إنها كويسة. استخدمي تقنية "ابدئي بـ5 دقايق" عشان تكسري حاجز التأجيل، وبعد كده هتكملي لوحدها غالبًا. ركزي على "ليه" بتذاكري – اربطي المذاكرة بحلمك في المستقبل، سواء وظيفة أو مهارة، وكل يوم اكتبي 3 أشياء صغيرة حققتيها عشان تبني الثقة تاني. لو لقيتِ نفسك بتسلّي نفسك في أوقات الضغط، حاولي تحولي النشاط ده لمكافأة بعد المذاكرة مش بديل عنها. وتذكري إن التحسن مش خط مستقيم، هتكوني فيه أيام كويسة وأيام صعبة، والصبر على نفسك جزء من الطريق. أنتِ قادرة ترجعي أقوى من الأول، لأنك بالفعل واعية بالمشكلة وبتدوري على حل. جربي تطبقي ده لأسبوعين وشوفي الفرق، ولو عايزة تتكلمي أكتر عن تجارب مشابهة ابحثي عن أسئلة مشابهة على فدني عشان تلاقي وجهات نظر إضافية. أنا هنا معاكِ، وأدعي لكِ بالتوفيق والشغف اللي يرجع أقوى إن شاء الله.
تم النشر الأربعاء، ٤ نوفمبر ٢٠٢٦
لعرض السؤال في فدني اضغط هنا