السلام عليكم، هل كنتِ بتمشي فترة على الطرق دي ولا بتتركيها بسرعة لما تلاقي مش فيه نتيجة؟ ممكن تكون المشكلة مش في طريقة التفريغ نفسها بل في عدم فهم المشاعر والرجوع لجذورها. *** حاولي ترجعي لأكثر طريقة من دول كانت بتخفف شوية، وجربي كمان رقص الزومبا أو نزول الجيم، أو الرياضات اللي فيها قفز وحركة. وفي نفس الوقت، بما إنك قلتِ بتحصل عشوائي، بعد كل مرة اقعدي مع نفسك وحللي اللي حصل. إيه اللي حصل قبل شوية وتسبب في خروجها؟ إيه الأفكار اللي جت في دماغك قبلها؟ وصف الشعور اللي حسيتِ به، كان خوف ولا غضب ولا إحباط ولا إيه بالضبط؟ *** فيه طرق بتستخدم للتحليل والرجوع لجذر مشكلتك والتراكمات النفسية، زي أسئلة "لماذا" الخمسة 5whys، ممكن تبحثي على اليوتيوب عشان شرحها، اختصارا لها، هي بتعتمد إنك بتسألي نفسك سؤالك وتجاوبيه وبعدين تسألي سؤال عن سبب الإجابة وهكذا خمس مرات. برضه انتظري حد من الخبراء يجاوب وينصحك بطرق تانية عملية. *** وعامة لا تنتظري حدوث انفجار الكبت أو خروج المشاعر العشوائي اللي ذكرتِه. خصصي ١٠ دقائق يوميا تقعدي فيها مع نفسك بدون موبايل أو تشتيت، تأملي أو فكري في اللي بيدور جواك، لما تعطي المشاعر مساحتها هيقل تدريجيا الظهور العشوائي. ** مش عارفة هل قصدك بمساعدة شخص هو الفضفضة لصديق أو حد من الأهل ولا تقصدي حتى طلب المساعدة من مختص؟ لو مش عندك مانع في المتابعة مع مختصة فلا تترددي في الخطوة دي إذا مقدرتيش تساعدي نفسك، لأن ممكن يكون الموضوع أكبر من مجرد حاجة للتنفيس عن مشاعرك بقدر ما هو الوصول لجذور المشكلة وعلاجها عشان تتخلصي من الكبت والتراكم المستمر من سنوات. ** المهم استعيني بالله وابدئي وربنا يصلح لك الحال. بالتوفيق.💚
لعرض الإجابة في فدني اضغط هنا