السلام عليكم ورحمة اللّه .
سؤالي قد يكون غريب بس حابه افهم نفسي ،فاغلب الأوقات بحس اني عايزه اصعب على الناس اللي هو مرات افكر هو انا لو جالي مرض خطير كانسر مثلا هل حد هيزعل يعني هيعطوا لو مت .
وخاصة لما بكون مريضة بحس اني محتاجة دا جدا بل وبرتاح شوية لما الاقي حد زعلان عليا وبيحاول يساعدني .
بدايق من نفسي وبحسني حد تافه اني بفكر بالشكل دا ، احيانا بضخم الامور اللي هو لو جالي دور برد بحس اني اكتر حد تعبان في العالم وافضل استشعر اد ايه انا تعبانه وسخنه ومصدعة وعندي هبوط وبفضل اصف بدقة غريبه .
او لما بكون زعلانه بحس اني بنتقي العبارات اللي تخلي اللي بيسمعني مشفق عليا جدا ونفسه يساعدني بأي شكل .
كمان في تصرف تاني وغريب بجد اللي هو بكون بعيط وحرفيا منهارة وعلى اخري فبلاقي نفسي افتح الكاميرا او اروح عند المرايه واللي هو يالا نشوف شكلي ازاى وانا بعيط🥲عبث وربنا .
او مثلا شئ حصل فبضحك عادي جدا اقوم عامله نفس الحركة بغرض اشوف شكلي وانا بضحك🤦
يعني هل دا له تفسير بجد ؟
علشان بدايق من نفسي جدا واللي هو اي التفاهه والهبل اللي انا فيه دا .
بصراحة أنا شبهك في حتة الاهتمام دي شوية . ولحد دلوقتي فاكرة إني كنت ساعات في الشتا أتعمد أنام من غير غطا عشان والدتي تيجي تغطيني وتزعل إني نايمة كده 😂. أما موضوع المراية والكاميرا فبصراحة ده منتشر أكتر مما الناس متخيلة. أنا شفت بالصدفه كذا شخص بيعمل كده ، وكذا حد من صحابي قال إنه بيعملها برضو وكانوا بيحكوا الموضوع وهما بيتريقوا على نفسهم، فطلعنا كلنا في الهوا سوا 😂.و هوا الموضوع دا فعلا تافه و بيضايق بصراحه بس انا بقولك عشان اعرفك انك مش لوحدك 🥲. ربنا يهدينا. بس أنا مختلفة عنك في حتة إني لما بتعب فعلًا مبحبش أحكي ولا أقعد أوصف تعبي للناس، بتكسف من الشكوى أصلًا. ومع الوقت بدأت أقتنع إن الإنسان كل ما استنى من الناس إنها تلاحظ وتفهم وتديه الاهتمام اللي محتاجه بيتعب أكتر، لأن محدش هيبقى مركز معانا طول الوقت زي ما إحنا متخيلين. فبقيت أحاول أدي لنفسي الاهتمام ده بنفسي، ولقيت إن الإحساس ده خف عندي شوية.
تم النشر الجمعة، ١٩ يونيو ٢٠٢٦
وعليكم السلام ورحمة الله، شكرًا إنك شاركتِ هذا الجانب من نفسك بصراحة، ده شيء شجاع جدًا. اللي بتصفيه مش تفاهة أو هبل، ده سلوك بشري طبيعي يظهر عند كتير من الناس، وغالباً بيكون تعبير عن حاجة أعمق زي الحاجة للشعور بالاهتمام أو الطمأنينة أو حتى التحقق من وجودك في عيون الآخرين. كتير من النساء بيمررن بمراحل زي كده، خاصة لو في فترات من الحياة كان فيها نقص في الدعم العاطفي أو الشعور بالأمان، فالعقل بيبحث عن طرق يجذب بيها الرعاية، حتى لو بطريقة غير واعية. الجزء اللي بتتكلمي عنه زي النظر في المراية أثناء البكاء أو الضحك، أو تضخيم الأعراض، ده غالبًا بيكون محاولة لـ"مشاهدة" المشاعر من بره، كأنك بتحاولي تفهمي نفسك أو تتحكمي في الصورة اللي بتظهريها. ده مش عيب، لكنه إشارة إن فيه جزء منك بيحتاج يحس إنه "مرئي" ومهم. في الإسلام، ربنا سبحانه وتعالى بيحثنا على التوازن، وإننا نطلب العون منه أولاً، ونبني قوتنا الداخلية من خلال الصلاة والذكر والتفكر في نعمه، عشان ما نعتمدش كليًا على ردود فعل الناس. عشان تتعاملي مع ده عمليًا، جربي تبدئي بخطوات صغيرة زي كتابة يومياتك كل يوم عن مشاعرك بدون الحاجة لمشاركتها مع حد، وتركزي على بناء تقدير ذاتي من جواكِ من خلال إنجازات بسيطة أو هوايات بتحبيها. كمان، لما تحسي بالرغبة دي، اسألي نفسك: "إيه اللي أنا محتاجاه فعلاً دلوقتي؟" ودوري على طرق صحية للحصول عليه زي الدعاء أو التركيز على علاقات إيجابية متوازنة. ده مش هيحصل بين يوم وليلة، لكنه رحلة لفهم أعمق لنفسك، وأنتِ قادرة عليها. لو عايزة تتكلمي أكتر عن جوانب معينة، أنا هنا. وممكن تبحثي عن أسئلة مشابهة على فدني عشان تشوفي تجارب أخرى.
تم النشر الجمعة، ١٩ يونيو ٢٠٢٦
مش مريضة و لكنك مستهلكة و تايهة زي كتييير جدا من شباب هذا الجيل جدي لك هدف في الحياة و حسني علاقتك بربنا يكون هدفك الأولي و الأهم انك تعملي اللي يرضي ربنا عز و جل و ساعتها هتوصلي بإذن الله اللي يقال عليهم من استأنس بالله لا يستوحش
تم النشر السبت، ٢٠ يونيو ٢٠٢٦
مش عارف أضحك ولا إيه 😅 بس أحب أطمنك ناس كتير اوووى بتعمل العبث اللى بتعملية دا وانتى مش مريضة ولا حاجة
تم النشر السبت، ٢٠ يونيو ٢٠٢٦
طبيعي كلنا نحتاج استعطاف بس مش لدرجة نتخيل الخبيث من الشيء زي الكانسر دا ،،بالنسبه للكاميرا وإنك تلقائي بتفتحيها فدا مش لوحدك🙃 سهله وخليكي أعقل من كدا ولا تحطي فكرة الاستعطاف أبدا في دماغك
تم النشر الجمعة، ١٩ يونيو ٢٠٢٦
لعرض السؤال في فدني اضغط هنا