السلام عليكم
اول حاجة انا كنت في علاقة حب مع بنت لينا 3 سنين من سنة بدات علاقتنا يقل فيها التواصل والكلام بدا يكون في زعل من ناحيتي انا بحب وجودها جنبي ببقا مطمن حاسس انه الحياة حلوة بيها طبعا هيا بعدت لسبب انها عايزة تحافظ على نفسها بتخاف أهلها وكدا انا وفقت على دا كنا نغيب حد يسال عن التاني كل فترة وفترة هيا كانت في امتحانات وخلصت انا ليلة السبت صليت استخارة على الموضوع كله حتى لو هايوصل لي زواج
السبت الصبح لقيتها باعتة رسالة سالت عني من كام يوم كنت عايز ايه اتكلمنا بعد كدا قالت دا آخر كلام مابينا بلاش تبعت تاني عايزة اكون مرتاحة مش خايفة من حاجة ومتى اخون ثقة اهلي بس لا عملت بلوك ولا شي انا طلبت منها تعمل بلوك خلاص طالما مفيش تواصل اعمليه يبقى العلاقة انتهت بس هيا رفضت قالت مش هاعمل هل كلامها ليا وكدا دا نتيجة للاستخارة انها مش نصيبي رغم اني بحبها خالص مش طالعة من بالي لسة ظروفي متى تسمح اخطبها بس بحاول اهلي رافضين لفكرة أنساب احنا عليتنا أكبر هما لا انا ضد دا بقولهم انا شاريها كفاية أهلها نفسهم سمعتهم كويسة وجماعة محترمين جدا جدا مليش دعوة بقصة الأنساب وكدا عايز اعرف اقنع اهلي ازاي وكمان هل دي نتيجة الاستخارة خايف متى تكون ليا.
السلام عليكم، مفهمتش نقطة.. دلوقتي الاستخارة صليتها عشان تتقدم لخطبتها ولا عشان تكمل في العلاقة معها؟ اولا، الاستخارة مينفعش تصليها عشان حاجة حرام، يعني مثلا مينفعش واحد يستخير هل يروح يسرق ولا لأ. فأنت لو بتستخير عشان قرار زواج منها تمام كده عادي، لو غير كده إنكم مثلا تكملوا تواصل بدون رابط رسمي مينفعش. ** ثانيا، الاستخارة معناها إنك بتسلم تماما لاختيار الله حتى لو مش هيكون في الحاجة اللي نفسك فيها، معناه إنك تركن مشاعرك على جنب وتكون حيادي تمام وتسلم الاختيار برضا تام لله. استجابة الاستخارة مش بإشارة أو راحة نفسية، الاستجابة إن لو فيه خير في الموضوع ربنا هييسر الظروف لحدوثه لو فيه شر لك هيبعده عنك. ** لو نويت تصلي استخارة عشان الزواج منها يبقى اعمل كده وسلم الخيار لله وارض به أيا كان ووقف تعلق عشان لو لا قدر الله لو مش من نصيبك متنكسرش. محدش عارف النصيب مع مين ولا الخير فين. ربنا يكتب لك اللي فيه الخير.
تم النشر الاثنين، ١ يونيو ٢٠٢٦
السلام عليكم ورحمه الله وبركاته. طالما احنا الحمد لله بنستخير ربنا يبقى احنا بنختار دلوقتي ربنا هنشوف ربنا هييسرلي وربنا ييسر ايه ما بتبقاش علامه فغلط كده احنا بنعرف الاستخاره نتيجتها خالص انا خلاص بترك الامر لله ببدا اشوف بقى انا الحياه مش معايا ازاي امشي انا أسعى واشتغل بالطريقه اللي ربنا هيكون راضي عني فيها وهي طبعا في الحاله اللي انت بتذكرها في السؤال مش هتتواصل معاها انك مش هتحاول باي شكل من الاشكال انك تتواصل معاها ولا انك تبعث لها حتى لو مفيش بلوك معمول هو ده بقى كده فعلا هيكون الطريق الصح مع ربنا لانه مش البلوك هو يبقى انا كده مش قادر امسك نفسي طب ما انا اللي بعمل البلوك وانا اللي بفكه مش هتفرق في حاجه انا محتاج ان انا اكمل بس عشان فعلا اشوف نتيجه الاستخاره دي انا قلت يا رب اختر لي اذا كان خير قربوا مني اذا كان شر ابعدوا عني انا هبدا اشوف بقى مع الحياه زي ما انت بتقول فرض على اساس ان الموضوع ده هيكمل ولا لا يكمل بجواز ولا لا يبقى احنا لسه مش هنعرف دلوقتي خالص لان دي حاجه. لما إن شاء الله ظروفك تسمح وتبدا تكون جاهز هتبدا تقول طيب انا هشوف بقى البنت اذا كانت مرتبطتش مرتبطتش ما اتجوزتش يبقى ربنا كاتب لك انك تروح وتقدم لها وتخطبها يبقى هي نصيحه لكن لو بعد ما كنت جاهز روحت علشان تشوف هي فين واخبارها ايه وشرحت تقدم لها ولقيت انه اتيسر لحياتها هي طريق ثاني يبقى هي دي نتيجه الاستخاره الحقيقيه انه مش مش ده المكان اللي هيكمل الجواز. ان شاء الله بالتوفيق.
تم النشر الأربعاء، ٣ يونيو ٢٠٢٦
إنت في حالة تعلق وده لازم تتعافى منه ، اسمع دورة الداء والدواء الشيخ علاء حامد شرحها عاليوتيوب ولو حسيت إنها حلقات كتيره اسمع آخر ٣ فيديوهات منها بس ولكن الأفضل إنك تسمعها من أولها والله المستعان
تم النشر الأربعاء، ٣ يونيو ٢٠٢٦
لعرض السؤال في فدني اضغط هنا