السلام عليكم، ثالثة ثانوي سنة دراسية زي أي سنة، هي أيوه مهمة لكن مش مصيرية بالدرجة اللي الناس متخيلاها وحولتها لعقدة في حياة الطلبة. الناس بتتخيل إنك لو مدخلتش كلية معينة أو نقصت في المجموع يبقى كده اتحكم على مصيرك بالفشل طول عمرك وده اللي بيعمل رعب للطلبة وبيخلي السنة جحيم عليهم وبيخليهم ينكسروا لما النتيجة تظهر بغير ما كانوا يتمنوا. *** السنة عاوزة مذاكرة واجتهاد أكيد لكن مش لدرجة تموت نفسك عشان تجيب مجموع. الالتزام والاستمرارية مع خطة متوازنة وواقعية تراعي فيها أوقات طاقتك وتركيزك ووجود فترات راحة وترويح عن النفس، مع المراجعة بانتظام وحل أسئلة كتير والتدرب على حل امتحانات (خاصة امتحانات السنوات السابقة)، مع أهم شيء الابتعاد عن القلق الشديد وضغوط التوقعات العالية خاصة من الأهل والأقارب. والأهم من ده كله، الاستعانة بالله سبحانه وتعالى وعدم التقصير في العبادات لأجل المذاكرة واليقين التام "إن الله لا يضيع أجر من أحسن عملا) وده كتير مش فاهمينه ومتخيلين إنه لو الواحد اجتهد ونقص في المجموع فكده ربنا ضيع جهده، وده غلط جدا، احنا بس مش شايفين الصورة الكلية ولا المستقبل فمش فاهمين إن ربنا فعلا مضيعش مجهوده لكنه وجهه للطريق اللي فيه الخير الأكبر له. ** ناس كتير اجتهدت لكن نقصت في النتيجة ودخلت كليات مكنتش عاوزاها أو جابت مجموع صادم بالنسبة لمستواها لكن في النهاية حققوا نجاحات كبيرة في الطريق اللي ربنا اختاره لهم أكتر من الطريق اللي هم كانوا مقررينه لنفسهم وبيحلموا به. ** فلو داخل ثانوية، ادخل بقلب مطمئن ويقين بالله وتأكد إنك مش مطلوب منك غير السعي ومتعلقش نفسك بنتيجة معينة أو كلية معينة، اعمل اللي عليك وأنت متأكد إن ربنا إن شاء الله هيكتب لك اللي فيه الخير. بالتوفيق إن شاء الله.
جزاكم الله خيرا 🌹❤️🩹 @mai mahfouz
تم النشر الأربعاء، ٥ أغسطس ٢٠٢٦
لعرض الإجابة في فدني اضغط هنا