السلام عليكم انا اسمي عبدالرحمن شادي طالب في تانيه ثانوي عندي 16سنه مش هطول عليكم في الكلام انا بابا كان مهندس معماري وهو حاليا متوفي مع العلم ان هو توفى وهو صغير في السن كان عنده 32 او 30 في الحدود دي +ان انا مشوفتهوش يعطبر انا بابا توفى وانا داخل اولى ابتدائي بس عالرغم من ذلك انا بحبه جدا واحد ممكن ييجي يقولي مطبيعي تحبه عالشان هو ابوك؟ انا هنا هرض وهقول لا ياما ناس كتير مش بتحب اهلهم وخاصه الاب علشان دايما الاب بيبقا طالع في دور الشرير العنيف الي بيعذب ولاده بس الي انا عايز اقول عليه هو ان ابويا انا اه مشوفتوهوش بس انا بحبه جداً ❤بسبب كلام اخواتي عليه كانوا دايما بيقولو ان هو حرفيا احن اب في الدنيا 🥺
المشكله بقا مش في كدا المشكله في امي انا مش عارف ليه مع ان المفروض الي انا بسمع عنه ان الام بتبقا حنينه والكلام الي حضراتكم عارفينه الي انا مشوفتش منه اي حاجه حرفيا دايما وانا صغير امي كانت بتضربني على اي حاجه حرفيا الي هو انتا لو مذكرتش هتتضرب لو ماكلتش هتتضرب لو مسعتدنيش في البيت هتتضرب بص اي حاجه هي بتقولها لازم حاضر وبس ولو راجل افتح بوقك عالشان هيبقا يوم اسود على دماغك ودماغ الي خلفوك حرفيا دايما اكتر ماده كنت بضرب فيها هي الدراسات وده لاني مكنتش بعرف اذاكرها لوحدي وطبعا اخواتي اكيد مش هيركزوا معايا عالشان دراستهم ودا الصراحه مش هقدر الومهم فيه كان كل صحابي بياخدوا دروس وشطرين فيها معادا انا عالشان المدرسين كانوا زي مبنقول بيدولهم الزتونه انا واحد كان بيقعض غصب عنه على الكتاب ويقعض يحفظ في الكتاب كله ويطلع ميتين اهله عالشان لما ماما تيجي من الشغل اسمعلها والصراحه تتقال برضو انا كنت بستهبل شويه 😂😂انا لسه عيل في سنه رابعه نفسي اعرف حتى لو انا مش بذاكر في عيل في سنه رابعة ابتداءي يضرب بالطريقه دي انا حرفيا لما كنت بضرب لازم اطلع من تحت ايديها وارم وسايح في دمي وفي الاخر تجري بيا على الحوض فى الحمام وتفضل تقولي انا اسفه مكنش قصدي واول منطلع من الحمام اتعامل نفس المعامله دي تاني (الجزء الاول) معلش وجعت دمغاكم
(الجزء التاني) انا كنت بعمل حمام على نفسي لحد اولى اعدادي او تانيه اعدادي تقريبا وهي كانت بتنام جمبي في الاوضه بتاعتي واخواتي في اوضتهم كنت بقوم من جنبيها وانا عامل كدا على نفسي بتسحب زي الفار اروح مشقلب البنطلون البسه بالعكس يعني عالشان هي كانت بتفضل تشوفني انا عامل حمام ولا لا وطبعا اكيد الي انا بعمله ده مش هيفضل مستمر فمره وانا نايم سمعت ماما صوت الحمام وانا بعمله على السرير راحت جايبا الحزام وانا نايم وفضلت تضربني بيه قد كدا وتشتم شتايم المفروض مططلعش من ست اساسا ومازال الشتايم دي ببتقالي انا لسه متشتم بيها النهارده وطبعا اخواتي ميقدروش يدخلوا عالشان هما كانوا معاها دايما كنت انا الي ببقا لوحدي وانا دايما الي غلطان وكنت كل مقولها انا نفسي في حاجه ينفع تجبيهالي تفضل تقولي لا مع ان عالفكره احنا الحمدلله مستوانا المدي مش وحش في المتوسط يعني تفضل تقولي انتا بتقلد صحابك وبتعمل زي مهما بيعملوا بالظبط وتفضل تقولي لا +ان انا كنت باخد عند مدرس انجليزي من اولى ابتداءي لمجرد ان هو قريب من البيت مش عالشان هو شاطر ولا لا واخد بالك من النقطة دي؟! هو اساسا مش بيعرف يشرح ومش انا لوحدي الي قولت كدا كلو كان بيقول كده برضو فكان كل امتحان يعملو انا ببقا عارف اني هرجع من الامتحان هتنفخ كنت بفضل اقولها يماما مش بفهم تقولي انا اسف في اللفظ انتا الي خول ومش بتذاكر وقولها تمم كنت بسمع الكلمه دي واقول لنفسي انا هوريكم ان انا بذاكر وكنت والله العظيم كنت بموت نفسي في المزاكره وبرضوا نفس النتيجه والكلام ده برضوا في درس math(الرياضيات)....(الجزء التاني)
(الجزء الثالث) جات تالته اعدادي وقولتلها يماما انا مش هكمل معاه ده طبعا بعد خناقت كتيره وضرب واهانه اكيد يعني قولتلها هروح عند مستر والله العظيم دا الي يتقال عليه وحش الانجليزي بجد لدرجه ان انا في تالته اعدادي قفلت الانجليزي وانا اساسا كنت طالع من اواءل تالته اعدادي الحمدلله يعني خلصنه تالته اعدادي خلاص دخلنا قولي ثانوي والعلاقه ما بينا باظط؟ باظط؟ هي كانت لسه مبظتش اصلا؟! 🤔
بدات تتحكم فيا وكل حاجه هي الي تقول عليها وانا مينفعش اطلب اي حاجه يراجل دا انا طلبت ساعه بس ويريتني مطلبت المهم انا قررت اني هنزل اشتغل في الاجازه واجيب كل اللي انا نفسي فيه بس في حاجه غريبه كل منزل اشتغل الشغلانه متكملش طب مهو انا كدا مش هعرف اجيب اللي انا عاوزه قولت خلاص عني مجبت حاجه انا عيل فقر اصلا
الموبيل بقا في الاجازه بس طب ليه يماما عالشان تركز في الدراسه انتا داخل على ثانويه عامه ولازم تجيب مجموع مش اقل من اخواتك ليه بقا عالشان عندي اخت في كليه طب بشري والتانيه في تربيه طفوله انجليزي فانتا مش هتبقا اقل من البنتين انتا الراجل وانتا.............. كلام كتير بقا لصبح طب يماما متخلي الموبيل معايا ملهاش علاقه اني ازاكر ولا لا منا زمايلي كلهم معاهم موبيلات وبيزاكروا وعارفين مصلحتهم كويس وانا كمان عارف مصلحتي هي بقا تروح قايلالي ايه الي انا بقولي هو الي هيمشي وطبعا لو اتكلمت انتوا عارفين اللي هيحصل هتقولي انتا لسه بتضرب حتى وانتا في اولى ثانوي واطول واحد في البيت؟ هقولك اه 🥺😭
طب يماما ينفع اخرج مع صحابي؟ لا مش هينفع
ولو وفقت بتحقق معايا؟ مع مين؟ وفين؟ وهتروح ازاي؟
ده انا في مره قولتلها انا عاوز اروح القهوه انا واصحابي كانت ناقصه تقوم تسبلي الدين الي انا عاوز اقولك اني لو روحت قهوه اخري عصير مانجه او موز بلبن وشكرا وشويه دومنا وخلاص كدا انا مش عارف دماغها مالها فيها ايه انا قرفت من الدنيا والله العظيم
ياريت الي عندو حل يساعدني
طيب ممكن نفكر في طبيعة شخصية ماما شوية ... تخيل معايا كده واحدة زوجها توفى وهي في سن صغير ممكن اول الثلاثينات او اواخر العشرينات .. ومعاها 3 اطفال لوحدها مش عارفه تعمل ايه؟ مش عارفه تتصرف ازاي؟ تفتكر الحياة هتبقى بالنسبة لها ايه؟ اكيد مضلمه وده طبعا في الاول .. مامتك المحرك اللي بيحركها هو الخوف .. الخوف من اللي جاي، طيب هربي العيال دول ازاي؟ طيب ازاي هعرف اربي الولد ده لوحدي؟ اكيد هيبقى محتاج ل اب برضه يشد عليه في اوقات. هي للاسف عملت كده بس عملته غلط ... قالت لنفسها هبقى الاب والام .. ولازم ابقى شديدة عليهم، بدل ما يطلعوا اي كلام .. لازم اعرف عنهم كل حاجه، لازم ابقى شديدة معاهم علشان يبقوا معتمدين على نفسهم، لازم اضرب علشان يتعلموا الصح. والدتك بتحبك .. بس للاسف حب غلط، والدتك كمان عايزة تربيك انت واخواتك بس للاسف برضه تربية غلط .. انا بحاول افهمك طبيعة شخصيتها يمكن ده يشفعلها عندك .. يمكن ده يحسسك بالمعاناة اللي هي حسيتها لما والدك توفي وسابها لوحدها تربي 3 اطفال ومش عارفه تعمل ايه؟ والدتك بتحبك ... اعذرها وحاول تطمنها .. واتعامل معاها حلو .. حسسها انك راجلهم، حسسها انك مسؤول .. لما تحس ده منك هتطمن. بتمنى ليك التوفيق
تم النشر السبت، ٢٩ يوليو ٢٠٢٣
بص ي معلم . خلينا نبدا الموضوع ب بساطه والديتك شخصية مسيطره بحكم أن والدك مش موجود الله يرحمه . لازم تتعلم تكون سياسي معاها أنا كنت سيناريو مشابه للقصه. ف خليك سياسي حساسها انها الكل ف الكل و انت ف نفس الوقت ب تعمل اللي انت عايز ممكن تخرج مع صحابك بس هي متعرفش انك خرجت مع صحابك ..ممكن تشتري الساعه من فلوس الدروس . خليك شقي سيكا .احكي ليها علي اللي أنا عايز تعرفه ليها بس ابني قصه وهميه هي تحب تسمعها و تصدقها . انت شخص بالغ عارف مصلحتك و هتقدر تحقق حلمك و تتفوق بردك أما الفون و كده حبيت دلع علي مراضيه و هكذا طب ه اخده يوم ف الاسبوع طب كمان شويا و هكذا هي ل الأول و الاخر امك و ست فاهمني
تم النشر الجمعة، ٢٨ يوليو ٢٠٢٣
بص ده مش رد الصراحه بس إعجاب مني إنك تشجعت و حكيت الكلام ده .
تم النشر الجمعة، ٢٨ يوليو ٢٠٢٣
طبعا زى ما ايه قالت .. انت مش هقدر تغير مامتك . ولا ينفع تعلى صوتك عليها أو تزعق معاها .. و هيا بطريقتها دى مش هتتقبل منك اى كلام .. انت حاول تتكلم مع اخواتك يعنى مثلا موضوع التليفون . قولهم إن انت ولد و طبيعى تتأخر برا البيت لازم يبقا معاك تليفونك ع الاقل لما تخرج علشان لو حاجه حصلت يعرفوا بتواصلوا معاك تطمنهم عليك و انت تبقا متطمن عليهم و انت برا .. كمان مينفعش تاخد منك التليفون علطول و كل حاجه تبقا مزكىو كدا انت هتضغط ع عقلك و مش هيقدر يستوعب حاجه طالما مافيش حاجه بتفصله عنها ..قولها إنها تديهولك ساعه فى اليوم او تطلعه لك يوم الخميس كله مثلا ... و بالنسبه للعنف دا .. انا عارفه أن الموضوع صعب . انا تالته ثانوى و لسه بتضرب لغايه دلوقتي و ضرب عنيف و قوى جدا .. ع الرغم من أن اخوانى الأصغر منى بتطلوا يتضربوا من زمان ... بس الحل انك تيجى فى صفها بالنقاش لو قالتلك ع حاجه قولها ماشى بس لو عملت كذا هيبقا افضل .. بس هيا تقريبا بتصغط عليك علشان تبقا راجل بمقاييس هيا عايزاه بالظبط .. بس هيا لازم تفهم انها مش حرة تتحكم فيك ... الغريب هو ازاى اخواتك ساكتين ع كدا .. اتكلم مع اخواتك و اقنعهم بوجهة نظرك علشان هما كمان يضغطوا عليها و يساندوك .. و هيا لو لقد محدش بيساندها فى رأيها و انكم كلكم بتقولها أن كلامها غلط اكييد هتغير رأيها
تم النشر الجمعة، ٢٨ يوليو ٢٠٢٣
لعرض السؤال في فدني اضغط هنا