انا تعبت من اني ديماً حاسه اني متأخره عن كل الناس في جواز في تعليم في استقرار مادي انا بعيد تعليمي من اول ثانوي وحاسه اني كبرت و فنفس الوقت لازم احقق حلمي بس في صعوبة وبطلت اذاكر فجأه بحس بالتنمر والغباء من الناس مع اني شكلي مش كبير زيهم الا ان في شعور جويا بيقول انا اكبر بخمس سنين انا ضيعت وقتي انا عمري مهوصل وعماله اضيع وتوتر ومسؤليه وبخسر عرسان كتير بسبب تمسكي بتكمله الدراسه او انهم عاوزين وحده مخلصه انا متكفله بدراستي وبشتغل بس فجأه مش عاوزه اكمل فحاجه
حاسه اني بطولي مع انهم عاوزين يساعدوني بس حاسه ان لازم اكمل لوحدي نفسي ارتب دماغي ومشاكل كتير ف البيت و الشخص الي هيخليني اعمل الي انا عايزاه انا مش حاباه معرفش لي
ايهما افضل اتجوز وادرس ولا افضل اشتغل وادرس
واي الحل مع شغفي و التوتر وشعوري بالاحراج بس انا حاسه ان الثانويه فتره وهتعدي بسرعه والجامعه الاعمار مختلفه ده شيء طبيعي انا مشتته فعلا وكنت بفكر اكلم دكتور نفسي انا معنديش ثقه فنفسي بتمنى الافاده
السلام عليكم، مفيش حاجة اسمها متأخرة عن كل الناس أو الأوان فات إني أتعلم أو أحقق الحاج الفلانية. أنتِ في رحلة ومحطات رحلتك مش محددة بوقت لو فاتك يبقى خلاص راحت عليكِ، سواء تعليم أو زواج أو تعلم مهارة معينة. اعتمادنا على التعليم الحكومي هو اللي رسخ فكرة إن التعليم له مراحل مربوطة بسن معين فده اللي محسسك دلوقتي إنك متأخرة عن اللي معك في الدراسة. وتفكير المجتمع هو برضه اللي رسخ فكرة إن الزواج له سن معين وقطار لو تأخرتِ عنه يبقى ضعتِ **** أنتِ بتقولي أكبر منهم خمس سنين، فيه ناس بدأت في عمر كبير قوي، ناس حتى كانت أمية وبدأوا تعلم في أعمار كبيرة مفكروش إن خلاص العمر عدى احنا لسه هنبدأ؟ *** الغي من دماغك خالص فكرة مقارنة نفسك بغيرك، ملكيش دعوة بحد، رحلتك مختلفة عن رحلاتهم فركزي على رحلتك وورقة امتحانك أنتِ. المقارنة أسوأ حاجة ممكن تعمليها وتسبب فشلك لأنها هتخليكِ تركزي على الجانب السلبي بدل ما تركزي على نقاط قوتك واختلافك وإنك تستثمري نفسك صح عشان تحققي اللي عاوزاه. *** الزواج هييجي في الوقت المناسب، فمتشغليش بالك هل لو ركزت على الحاجة الفلانية الحاجة التانية هتفوتني، حددي أولوياتك وإيه الأهم تركزي عليه الفترة الجاية وحددي هدفك من كل حاجة عاوزة تسعي لتحقيقها، يعني التعليم هدفك منه إيه وليه لازم تركزي عليه لو كان هو الأولوية. الزواج، هل هو أولوية وإيه هدفك منه؟ هل أنتِ فعلا مدركة المسؤولية والمعنى الحقيقي للزواج ولا الدافع نحوه هو مجرد خوف من تأخر الوقت أو إنك شايفة البنات حولك بتتزوج وأنتِ لسه فعاوزة تلحقي؟ *** طول ما أنتِ خايفة من فكرة الوقت بيمر أو أنا متأخرة هتفضلي ضاغطة نفسك ومش عارفة تحددي الطريق حتى لو كان واضح قدامك. *** اقعدي مع نفسك كده قعدة رايقة واكتبي كل افكارك وأهدافك واللي عاوزة تحققيه والمشاكل أو العقبات اللي بتقف في طريق الأهداف دي، وفي جلسة تانية رتبي الأفكار دي وجاوبي على الأسئلة اللي قلتها فوق وحددي الأولويات وابدئي واحدة واحدة من غير إحساس سربعة وتشتت. *** ممكن تتناقشي مع الذكاء الاصطناعي وتخليه يرتب معك الاولويات ويضع لك خطة مرنة تمشي عليها، وممكن تقسمي وقتك بين الدراسة وبين تعلم مهارة تساعدك تلاقي شغل لو حتى أونلاين. *** بالنسبة للزواج فادعي ربنا بالزوج الصالح وسيبيه لوقته، ومتتنازليش عن هدف أولوي في حياتك عشان شخص مثلا تقدم لك ورافض إنك تتمسكي بالهدف ده. الشخص اللي شاريكِ هيدعمك وهيساعدك تطوري من نفسك مش هيكسر جناحاتك عشان عاوزك تفضلي معتمدة عليه هو بس. وبلاش فكرة "الشخص اللي هيخليني أعمل كل ده"، لو الشخص ده مش موجود أبدا هتفضلي منتظرة ومش هتحققي اللي عاوزاه؟ اعتمدي على الله أولا ثم على نفسك، استعيني بالله وابدئي وإن شاء الله يوفقك لكل ما فيه الخير لك. بالتوفيق.💚💚
تم النشر السبت، ١٠ أكتوبر ٢٠٢٦
أولاً حضرتك محتاجة تفهمي إن التعليم ده شيء اساسي، لو حابة تدخلي أولادك في السنابل مدرسة نضيفة يجب على الأب والأم ان يكونوا خريجين ومعاهم شهادة، ف فكرة ان حضرتك تسيبي تعليمك كلمة واحدة انتِ بتضري بمستقبلك. ثانيًا لا قدر الله زوجك طلع شخص سيء وتركك انتِ والأولاد بعد الشر ووالله انا شوفت الكلام ده بعيني قبل كده والأم لولا انها متعلمة وخبرة اشتغلت وصرفت على عيالها ولولا النقطة دي كان زمانهم بيشحتوا. باين ان حضرتك سن صغير لسه فإن شاء الله تلحقي ولو أمكن الفرصة انك تتزوجي مثلا أثناء ٢ جامعة مثلا، وحاولي متخليش الزواج يعطل دراستك. واوعي تظني ان عشان حضرتك متأخرة وأصغر من الي في المدرسة ده معناه ان مش من حقك التعليم بل بالعكس التعليم حق كل شخص ولو وصل لعمر ال٦٠، كل شخص حر يعمل الي هو عايزه واوعي تخلي كلام حد يأثر فيكي حتى لو صحابك او اهلك بكرا يشوفوا نتيجة الي بتعمليه سيبيهم في الي بيقولوه واعرفي انك طول ما انتِ صج ربنا هيكون معاكي. اتمنى اكون فدت حضرتك واي استفسار تاني انا موجودة.
تم النشر الأحد، ١١ أكتوبر ٢٠٢٦
أنا فاهمة تمامًا اللي بتمرّي بيه، الشعور ده بالتأخر والضغط والتوتر مش غريب، خاصة لما تكوني بتحاولي توازني بين حلمك في التعليم وبين الضغوط الاجتماعية والعائلية والشخصية. أول حاجة لازم تعرفيها إن الثانوية والجامعة مش سباق زمني ثابت، والأعمار بتختلف فعلاً، وده طبيعي جدًا. كتير من النساء بيبدأوا أو يكملوا دراستهم في مراحل مختلفة من حياتهم، والمهم مش السن، المهم الإصرار والخطوات المنظمة. حاولي ترتبي أفكارك بخطوات عملية بسيطة: قسمي أهدافك لأجزاء صغيرة، زي تحديد ساعات دراسة يومية ثابتة تناسب شغلك، واستخدمي مذكرة أو تطبيق بسيط تسجلي فيه إنجازاتك اليومية عشان تشوفي تقدمك بوضوح. ده هيساعدك تقللي الشعور بالغباء أو التنمر الداخلي، لأن الإنجازات الصغيرة بتبني الثقة تدريجيًا. أما بالنسبة للزواج، فالأفضل تفكري فيه كخيار يدعم أهدافك مش يعيقها، يعني لو الشخص المناسب هيساعدك تكملي دراستك وأنتِ شغالة، ممكن يكون توازن مفيد، لكن لو مش حاسة بالراحة أو الحب، خدي وقتك عشان ما تندميش. الإسلام بيحث على طلب العلم والتوكل على الله مع السعي، فاستمري في الدعاء والعمل بجد مع التوازن. لو التوتر والتشتت مستمرين، فكري في استشارة متخصص نفسي كخطوة إيجابية لترتيب أفكارك وتعزيز ثقتك بنفسك، ده مش ضعف. ابحثي عن أسئلة مشابهة على فدني عشان تشوفي تجارب أخرى، وتذكري إنك مش لوحدك في الرحلة دي، والخطوات الصغيرة اليومية هتوصلك لهدفك إن شاء الله.
تم النشر السبت، ١٠ أكتوبر ٢٠٢٦
الجواز مش إنجاز كل الناس بتتجوز اعملي حاجة تفتخري بيها قدام نفسك وولادك وبعدين فكري فيه وتأكدي الشخص المناسب لسه مجاش وميكونش حلمك مقتصر ع جواز آه سنة الحياه بس مش سباق مين يوصل الاول م براحتك ياعم ده رزق ادعي ربنا بس بالزوج الصالح وسيبي ربنا يرتبها
تم النشر الأحد، ١١ أكتوبر ٢٠٢٦
لعرض السؤال في فدني اضغط هنا