السلام عليكم، بالنسبة لمشكلتك الأولى ففيكِ شوية من سمات الكمالية غير الصحية وجايز ده راجع لعوامل تربوية، زي إن الأسرة مثلا كانت عاوزة تفوق دائم منك أو كانوا بيحاسبوك على أي خطأ. دايما بتدوري على الكمال ومش بترضي عن اللي بتوصليه. وفكرة إنك بتنكري جهدك وبتفكري إنك لا تستحقي إنجازاتك لأنك ملكيش أي فضل فيها فدي سمة من متلازمة المحتال. طبعا لا أقدر أجزم بس من الكلام المكتوب إنك عندك المتلازمة دي لكن هي عامة متلازمة منتشرة وسط الناجحين والمبدعين وبتخليهم يشككوا في إنجازاتهم وتقدير الناس لهم وبيعتقدوا إنهم لا يستحقوا اللي وصلوا له وإنهم بيخدعوا الناس أكيد وكل النجاح ده كان بسبب حظ أو أسباب تانية غير جهدهم. فحاولي تعالجي المشكلتين دول قبل ما يزيدوا ويتحولوا لعائق في طريق نجاحك بالحياة. *** طبعا أي نجاح فالفضل فيه لربنا، لكن برضه ربنا قال لنا ناخد بالأسباب وده اللي أنتِ بتعمليه. الطبخة اللي طبختِها، أيوه اتبعتِ وصفة بس أنتِ اللي بذلتِ مجهود وتعبتِ في عملها، مش مجرد قرأتِها وهي اتعملت وحدها. ومع التكرار هتتحسني وساعتها هتبقي اكتسبتِ المهارة وهتختلفي عن أي شخص اتبع نفس الوصفة. نجاحك في الامتحان، أيوه دعيتِ وربنا وفقك، لكنك برضه أخذتِ بالأسباب وذاكرتِ واجتهدتِ ومقولتيش أنا هترك المذاكرة وأقعد أدعي طول السنة وربنا هينجحني. ******** فيه تمرين صغير ممكن تعمليه عشان تدربي نفسك على رؤية مجهودك وعدم إنكاره، وهو كتابة إنجازاتك اليومية، سجلي كل يوم على الأقل ٣ حاجات عملتِها حتى لو صغيرة واكتبي جنب كل واحدة سببين على الأقل للإنجاز خاصين بكِ. مثلا، نجحت في امتحان كذا... لأني... ١- ذاكرت بانتظام.. ٢- التزمت بالمراجعة. وهكذا. واحدة واحدة هتتعودي تشوفي جهدك وفي نفس الوقت طبعا تكوني ملتزمة بشكر ربنا وإرجاع الفضل له إن أعانك تبذلي الجهد ده ووفقك له. ************ *********** بالنسبة لسؤالك عن الزواج، فرأيي الذي لا أتنازل عنه إن الزواج مش قطار مطلوب مننا نقفز فيه قبل ما يفوتنا، هو محطة من محطات حياتنا الكتيرة لما ييجي وقتها نركبها واحنا مستعدين فعلا وفاهمين مسؤوليتنا وحقوقنا فيها، مش لمجرد خوف من كلام الناس وكلمة "عنوسة" وكل الضغوط المجتمعية اللي بتخلي البنات والشباب يدخلوا زواجات متسرعة أو لأسباب مش صح فتنتهي بالطلاق أو بأسر مفككة غير سوية. ** سن الزواج عامة تأخر في مجتمعنا بسبب الظروف الاقتصادية وبعض الأسباب التانية، فأنا شايفة سنك لسه صغير وقُدامك وقت تعالجي جذر مشكلة كرهك للزواج وتتأني في اختياراتك. لو تقدم لك شخص مناسب وقعدتِ معه ولقيتِ فيه قبول وهو مناسب وعلى خلق ودين فصلي استخارة وخذي الخطوة واستغلي فترة الخطوبة في إنك تتأكدي من قرار الزواج منه. ** مش مطلوب منك تسايري المجتمع ولا تاخدي قرارات تندمي عليها بعدين ولا مطلوب تكوني نسخة من غيرك. ممكن تتابعي مختصة نفسية عشان تعالجي مشكلتك النفسية تجاه الزواج عشان تقدري إن شاء الله تختاري صح بعد كده وتكملي مع شريك الحياة بطريقة سوية بدون عقد تسببت فيها مشاكل أسرية أو ظروف مجتمعية. ** طولت عليكِ بس حبيت أفيدك على قد ما أقدر، وربنا يوفقك للي فيه الخير.💚💚
سعيدة إن أهلك كويسين وبيتكم سوي الحمد لله، ومعلش افتكرت من كلامك إنك عندك عقدة من الزواج لأسباب تانية زي مثلا نماذج سيئة شفتيها (مش شرط أهلك، ناس حولك) أو على الانترنت، كله بقى ينشر المساوئ والمشاكل على النت والبنات والشباب تعقدوا من الزواج وخايفين من الخطوة دي.. لو الفكرة بس إنك مش حابة تتركي أهلك فأعتقد مش هتشكل عائق قوي خاصة لو لقيتِ إن شاء الله شخص وعائلة شبيهة بأسرتك، حاولي بس متفكريش بطريقة سلبية إنك ممكن متلاقيش ناس زيهم ولا بيئة لطيفة شبه بيتك لأن أفكارك ممكن توقعك في اللي أنتِ خايفة منه، ففكري بإيجابية دايما وربنا يوفقك في كل حياتك ويوجهك دايما للاختيارات الصح💚... وعادي اخرجي عن الموضوع براحتك.😅😅
تم النشر الخميس، ٣٠ يوليو ٢٠٢٦
العفو🥰، هي مش شرط أسباب تربوية يعني كانوا قاسيين وبيضغطوا بطريقة وحشة، ممكن التطلعات والآمال والكبيرة ممكن برضه يستقبلها الطفل ويترجمها جواه لفكرة تؤدي في الآخر إنه يبحث عن المثالية عشان يرضي تطلعات الأهل... المدرسة كمان وأسلوب المدرسين هي كمان سبب من أسباب ظهور المثالية... كلامهم عن فشلك ارميه ورا ظهرك، ناس كتير اتقالها من أهلها والمدرسين إنهم فشلة وعمرهم ما هيفلحوا، وما شاء الله حققوا نجاحات كبيرة، فهم مش مقياس للحكم عليك، وعدم وجود موهبة أو مهارة في فترة من العمر لا يعني إن الإنسان عمره ما هينجح أو يمتلك موهبة طول عمره، وفي حالات العكس، كانت موهوبة ومتفوقة من صغرها لفترة كبيرة وبعدين حصل لها دروب في حياتها واستسلموا في الآخر وفشلوا، فدي مش قاعدة ولا مقياس... وبلاش ترددي الكلام السلبي ده على عقلك عشان العقل الباطن بياخد الأفكار دي وتترسخ جواه ويحولها لحقيقة، فاعملي التمرين اللي قلت لك عليه وبرمجي عقلك على أفكار إيجابية دايما.
تم النشر الخميس، ٣٠ يوليو ٢٠٢٦
شكرا جدا لحضرتك ، مش عارفه اسباب تربوية او لا ، انا عيلتي زي اي عيلة تاني بس الحمدلله طلعتنا كلنا اسويا و مفيش بينا مشاكل و يمكن هي احدى اسباب تعلقي بفكرة عدم الزواج ، لاني بفكر ليه اسيب مكان هادي و جميل زي دا علشان اخوض تجربة مليانة مشحانات و مشاكل ، بنسبة اني مش بحس بانجازتي لاني فعلا قبل فترة مراهقتي مكنش عندي اي موهبة ، اساتذتي كانوا بيقولوا عليا دايما فاشلة ، ف دلوقتي لم بعمل حاجه بحس انو معقول البنت الفاشلة بتاعت امبارح بتعمل دا انهاردة ، و مبقتش بحس باي انجاز انا لم بنجح بقعد ازن في دماغي و اكرر كلمة انا نجحت علشان استوعب و احس بنجاحي ، و لو اتعرضت لموقف يدعو للبكاء بعمل نفس التصرف ، بقيت بحس ببرود تجاه حاجات كتير و بيصعب عليا استوعبه لدرجة اني شكيت اني معاقة😂، اسفة اني خرجت عن موضوع
تم النشر الأربعاء، ٢٩ يوليو ٢٠٢٦
لعرض الإجابة في فدني اضغط هنا