السلام عليكم ورحمة الله وبركاته الله يوفقك اولاً ف جميع خطوات حياتك الكبيرة والصغيرة. لو حاسه إنك في مظلمه مع حد مش علشان تسهيل حياتك لا عموماً علشان يدعي عليك ولا لقدر الله يحصل حاجه ونندم بعدين "روحي كلميهم واطلبي منهم يسامحوكي ولو العكس سامحي" على فكره دي إفادة ليكي أصلاً ولنفسيتك وراحتك كمان. إما بقى إن ربنا يقفل البيبان علينا ربنا لما بيقفل باب وإتنين وتلاته وعشرة بيكون مش صالح البيبان بس بما إننا بنى آدمين بنتشعلق وبنفضل نسأل طب ليه أنا عايزه كذا وكذا، مع العلم إنه أصلاً ربنا بيقفل البيبان دي وبيكون في بيبان مفتوحه لينا إحنا بس ملبوخين بالبيبان التانيه أو عقولنا رافضه حاجه تانيه أو إن ربنا عايزنا نسعى للباب دا ونشوفه كويس. طب بس الحبوب دي كترها مش صح ولصحتك عليها حق عليكي متضرهاش لإن كل اللي انتي فيه هيعدي والله ومهما طول. احسبي كل اللي انتي فيه دا ابتلاء محبه لأنه فعلاً محبه من ربنا. ضيفي إنه مين مش مبتلي بس احنا وكمان لو ركزتي في غيرك مشاكله الاكبر هتعرفي نعمتك اللي انتي فيها. تعالي اقولك إن اليوم مش هيجي تاني وكلنا عارفين دا يعني درجاتك عدت بس اكيد لسه فيه وقت لحاجات تانيه تقدري تركزي فيها مع نفسك بسم الله كده خطوه خطوه واتعب التعب اللي متأكده إنه لو تعبته هكون في قمه فرحتي وادعي دايما يارب ارضيني واكرمني من كرمك ولطفك عليا مش بتعبي اصل لو بتعبنا مش هنوصل لحاجه. اتعملي علشان تغيري سواء كبتك وتوترك اتكلمي مع ربنا اول خطوه وانتي بتعملي طاعاتك وعباداتك تاني دوني والله لو تعرفي قيمه التدوين سواء ع الفون او نوت بوك لطيفه زي قلبك كده هتحسي بتحسن كبير. ومن قلبك قولي دايماً رضيت يارب كل ما يجي منك يا حبيبي حبيبي واستغفري وسبحي هيفتح كل البيبان اللي مقفوله والله كل دا علشان ربنا عايز يسمعك اكتر ربنا يرضيكي بكل خير وجميل وابشري والله.
لعرض الإجابة في فدني اضغط هنا