إجابة علي السؤال: ماذا أختار للدراسة بعد الإعدادية، الثانوية العامة أم مدارس التمريض؟

بصي مبدئيًا كده قبل ما تفكري في تمريض أو ثانوي، اسألي نفسك المجموع ده فعلًا بيعبر عن مستواكي ومجهودك وتعبك طول السنة؟ وإنك فعلًا شاطرة في المواد دي وبتحبيها؟ ولا مجرد درجات وخلاص؟ لأن دي نقطة هتفرق جدًا في القرار. لو إنتِ فعلًا بتحبي الرياضة والعلوم والإنجليزي وبتستمتعي بالمذاكرة والفهم والحل، فخدي ده في الاعتبار كويس جدًا. وكمان شوفي شخصيتك عاملة إزاي، هل بتحبي تمشي في طريق واضح ومتحدد من بدري؟ ولا بتحبي يبقى قدامك اختيارات أكتر بعدين؟ التمريض مجال محترم جدًا ومش حاجة قليلة خالص، وميزته إنك من بدري بتبقي عارفة تقريبًا إنتِ رايحة في اتجاه إيه. أما الثانوي فبصراحة أنا مش شايفاه بالصعوبة المرعبة اللي الناس بتتكلم عنها. آه محتاج اجتهاد وتنظيم ومذاكرة، لكن بالنسبة لي شايفاه ضغط طبيعي موجود في أي مرحلة دراسية حتي لو الضغط اكبر ف دا مش هيفرق اللي هيفرق بجد هوا تعاملك معاه هيبقي ازاي. خصوصًا لو إنتِ متعودة تذاكري وبتعتمدي على نفسك. وعامة أنا كنت محتارة نفس الحيرة وكان فاضلي عن الدرجة النهائية تلات درجات، فمكنش الموضوع بالنسبة لي إني مضطرة أختار حاجة معينة أو إن مفيش قدامي غيرها. وكنت بحب الرياضيات جدًا والمواد العلمية عمومًا، ففضلت فترة طويلة بفكر وأسأل وأقارن بين الطريقين.بقولك بس عشان تعرفي اني كنت شبهك و ف نفس وضعك بالظبط. وفي الآخر بعد تفكير واستخارة اخترت الثانوي دفعة البكالوريا، والحمد لله لحد دلوقتي مش ندمانة على القرار. لكن ده لا معناه إن الثانوي أحسن لكل الناس ولا إن التمريض أحسن لكل الناس، لأن كل واحد وقدراته وميوله وظروفه مختلفة. وبرضو خلي بالك إن التعليم كل شوية بيحصل فيه تغييرات وقرارات جديدة، فمتحاوليش تبني قرارك كله على فكرة إن طريق مضمون ١٠٠٪ أو إن طريق تاني مفيهوش مستقبل، لأن محدش ضامن حاجة. وفي نفس الوقت متبصيش للثانوي على إنه مجرد دروس ومصاريف وضغط وخلاص، لأن لو عندك عزيمة وطموح وتعرفي تنظمي نفسك فدي مهارات هتفيدك طول حياتك. وأنا مش هقولك اختاري كذا أو سيبي كذا، لأن محدش أدرى بظروفك وقدراتك منك. شوفي رأي أهلك، ولو تعرفي حد في تمريض أو كلية تمريض أو حتى شغال في المجال الطبي اسأليه عن طبيعة الدراسة والشغل على أرض الواقع، وشوفي نفسك فعلًا مرتاحة فين. وفي الآخر صلي استخارة وتوكلي على ربنا، ومتخليش حد يحسسك إن مستقبلك كله واقف على القرار ده. لأن في النهاية اللي عنده عزيمة وعايز ينجح هيعرف ينجح مهما كانت ظروفه ومهما كان المكان اللي هو فيه. ربنا يوفقك ويختارلك الخير ويرضيكي بيه. 🤍

إجابة من 𝙰𝚜𝚖𝚘𝚛𝚊 ࣪

تم النشر الثلاثاء، ٢٣ يونيو ٢٠٢٦