السلام عليكم، طيب هي مشكلتك إن مفيش خطة واضحة لصرف المال، ونقطة إن إيدك فرطة دي ممكن تتحكمي فيها بالتدريب. دي بعض النصائح ممكن تعمليها وجربي كده لمدة شهر وشوفي النظام إيه: ** الأول لما تقبضي، افصلي جزء الالتزامات في ظرف منفصل. احسبي باقي المبلغ المتبقي من المرتب وقسميه على الشهر. كل أسبوع له جزء معين من المرتب، لو قرب يخلص أجلي شراء الحاجات غير الضرورية للأسبوع اللي بعده. كل حاجة هتشتريها في يومك سجليها، مراقبة مصروفاتك هتخليكِ تاخدي بالك الفلوس بتضيع في إيه، هتكتشفي إن فيه حاجات صغيرة ممكن ملهاش لازمة فتعملي حسابك الشهر اللي بعده إنك مش هتشتريها. سجلي كل مبلغ ولو صغير، المبالغ الصغيرة هتكتشفي إنها غالبا بتستهلك جزء كبير من الراتب. *** دايما بينصحوا لما تروحي سوبر ماركت متروحيش وأنتِ جوعانة، الجوع هيخليكِ تشتري حاجات كتير ملهاش لازمة والمكان بيبقى مترتب بحيث يزيد رغبتك الشرائية، وكمان ابقي كاتبة الحاجات اللي عاوزة تشتريها في ورقة والتزمي بها ولا تنجري وراء إغراءات أماكن الشراء. قبل ما تشتري حاجة اسألي نفسك هل محتاجاها ضروري ولا ممكن التنازل عنها؟ ده هيوفر لك كتير. ** وضروري جدا جدا تقتطعي جزء للإدخار، ده مهما حصل لا تقربي منه.. عامليه زي جزء الالتزامات بالضبط. أول ما تقبضي شيليه على جنب، ومتأجليش الخطوة دي لآخر الشهر عشان ممكن تصرفيه وأنتِ مش واخدة بالك. وهيفرق جدا معك لو خصصتِ جزء ولو صغير صدقة شهرية، وإن شاء الله ربنا هيبارك لك. ** وأنصحك ابحثي على دورات أو فيديوهات عن "إدارة المال الشخصي" أو "زيادة الوعي المالي" هتلاقي على يوديمي وعلى يوتيوب. سجلي النصائح وطبقيها وكل حاجة بالتدريب والاستمرارية هتبقى عادة إن شاء الله وهتعرفي تديري مالك كويس. بالتوفيق.💚💚
لعرض الإجابة في فدني اضغط هنا