السلام عليكم، الاستخارة ملهاش علاقة بالأحلام فمتربطيش ده بنتيجة الاستخارة. الأحلام مش بيتبني عليها حاجة. ** ممكن حد يشوف رؤيا مبشرة بعد الاستخارة يستبشر بها لكن مش يعتمد عليها ويقول إن دي نتيجة الاستخارة وإن فيه خير في الموضوع، وفيه فرق أصلا بين الأحلام الكويسة والرؤى. *** نتيجة الاستخارة بتبقى بتيسير الأمر اللي صليتِ عشانه، لو خير ربنا هييسر حصوله ويزيل أي عقبات في الطريق إليه ولو كان فيه شر هيحصل تعسر. هتلاقي عقبات ومشاكل بتمنع إتمام الأمر، وممكن يكون منها اللي أنتِ حاساه دلوقتي، إنك تكتشفي عيوب في الشخص أو تبدئي تتخنقي من معاملته وسلوكه وشخصيته وتشكي في إنه الشخص المناسب لك. *** وخدي بالك، اللي بتشوفيه في الخطوبة بيكون عينة بسيطة من اللي هيقابلك بعد الزواج فشوفي هتقدري تتحملي الشخصية والطباع دي بعد الزواج ولا لأ، ممكن تصلي استخارة مرة تانية وتوكلي على الله، لا تنتظري أحلام واقعدي مع نفسك بعد الاستخارة وراجعي كل حاجة عرفتِها عنه واللي كونتِه عن شخصيته ودينه وأخلاقه الفترة اللي فاتت وبعدين قرري إذا هتكملي أو تنهي الخطوبة. فكري كويس وقرري الأصلح لك. وإن شاء الله ربنا يكتب لك اللي فيه الخير. بالتوفيق.💚💚 https://www.islamweb.net/ar/fatwa/101562/هل-هناك-علاقة-بين-الأحلام-والاستخارة
العفو، بالتوفيق إن شاء الله.💚💚
تم النشر الأربعاء، ١٦ سبتمبر ٢٠٢٦
تمام شكرا جدا 🤍
تم النشر الأربعاء، ١٦ سبتمبر ٢٠٢٦
هو مش كل الرجال كده، الغيرة الشديدة والتحكم لدرجة الخنقة والشك وصعوبة المعاملة كل دي صفات صعبة ولو أنتِ دلوقتي مش مبسوطة، ومخنوقة ومضايقة من الصفات دي وهو لسه خطيبك فبعد الزواج كل ده هيزيد (لأن هيعطي لنفسه صلاحيات أكبر بعد مبقاش مجرد خطيب وبقى زوج) فالعينة اللي شايفاها دلوقتي ومش متحملاها هتكوني مضطرة تتحمليها بعد الزواج، فشوفي أنتِ عاوزة شكل حياتك الجاي إيه. الحب مش كل حاجة وللأسف هيخليكِ تتغاضي وتعدي حاجات كتير مينفعش تعديها، وممكن تكملي على أمل ممكن يتغير فاركني الحب على جنب واختاري بعقلك. واللي أعرفه إن محدش بيتغير عشان حد، وكل البنات اللي اعتقدوا إن أزواجهم هيتغيروا بعد الزواج أو إنهم يقدروا يغيروهم أو يصلحوا عيوبهم اكتشفوا بعد فوات الأوان إن محدش بيتغير عشان حد ومحدش بيتغير إلا عشان نفسه والرغبة في التغير ده تكون نابعة من جواه هو. وزي ما بيقولوا "الطبع يغلب التطبع" احنا منقدرش ناخد قرار عنك لأن أنتِ اللي عندك الصورة الكاملة وتقدري بعد تفكير تقرري أي حياة تقدري تتحمليها وأي وضع وصفات تتقدري تتعايشي معها بعد كده.
تم النشر الأربعاء، ١٦ سبتمبر ٢٠٢٦
انا فاهمه كل ده لاكن انا بعمل استخاره وكلو تمام لاكن ف الواقع مش عارفه أقرر هو علي طول يقولي اي راجل شرقي بجد بيعمل كده واكتر مني كمان ف انا عوزه اعرف هل فعلا كل الرجاله بيعملوا كده ولا لا وانا مش بسأل عشان اطمن وأكمل انا مش مبسوطه برغم انو سعات بيكون حنين وكويس بس اوقات كتير بيتحول لشخص تاني خالص انا بسأل ناس كتير جدا عن الموضوع ده وكتير بيقولي متبوظيش الموضوع عشان شويه غيره بس الموضوع مش كده وفي اللي بيقولي لو مفيش رده فعلا عنيفه يبقي متكبريش الموضوع يعني هل الشخص ممكن يتغير بعد الزواج ولا ده طبع فيه
تم النشر الأربعاء، ١٦ سبتمبر ٢٠٢٦
تمام، أنا فاهمة صعوبة الوضع بالنسبة للي قلتِه لكن الزواج قرار مصيري وحياة طويلة إن شاء الله هتعيشيها مع شخص معين، فلازم تبقي واخدة القرار الصح وتكوني متأكدة من إنه فعلا شريك الحياة اللي هيقدرك ويحافظ عليكِ. ناس كتير استمرت رغم كل الإنذارارت وعلامات التحذير اللي ظهرت لهم خلال الخطوبة (لأي سبب سواء حب أو ضغط مجتمعي أو إحساس بالذنب، أيا كان) وللأسف ندموا بعد الزواج، منهم اللي انفصلوا ومنهم اللي كملوا رغم كرههم للوضع بس مضطرين. فمتاخديش قرار أبدا مش في صالحك أو تندمي على تبعاته قُدامه (بالنسبة لحياتك الزوجية مقصدش مشاكل بين الأهل)... أهله وأهلك مش هينفعوكِ بحاجة لما تعيشي تعيسة معه وهتكوني بتظلمي ينفسك وبتظلميه لو كملت في اختيار غلط. والحب على فكرة مش مضمون، وفكرة إن الحب قادر يتغلب على كل الصعاب والعيوب مش صح، للأسف سهل جدا الحب يموت أو يقلب كراهية للطرف الآخر لو تغيرت الظروف والواقع واكتشف كل طرف إنه مش قادر يتقبل ويتأقلم مع عيوب الطرف الآخر. فاستخيري تاني وأنتِ متيقنة في اختيار ربنا وتوكلي عليه، وتخيلي حياتك معه بشخصيته كلها هتقدري تعيشي معها بعد الزواج ولا لأ.
تم النشر الأربعاء، ١٦ سبتمبر ٢٠٢٦
احنا بنحب بعض من فتره كبيره واهلي واهلو معرفه كمان من زمان لو انفصلت عنه هيحصل مشاكل كبيره بين الاهل وهكون انا السبب يعني قرار مني هيوقع كل حاجه من زمان دي المشكله
تم النشر الأربعاء، ١٦ سبتمبر ٢٠٢٦
لعرض الإجابة في فدني اضغط هنا