كيف أتغير وأنا أشعر أنّ حياتي تدمرت؟

Question

يا جماعه بجد أنا تايهه و كل حاجه في حياتي بايظه مش عارفه ابدأ منين بس أنا دراسيا بدأت أكره التعليم و المذاكرة و احس بملل و احباط سريع و ببقى عاوزة انام مع ان دي تالتة ثانوي و مع اني كنت شاطرة جدا السنين الي فاتت و نظام يومي متشقلب جدا بقاله شهور و روتيني عبارة عن نوم و اكل و موبايل و تضييع وقت و من جوايا حاسه بعبثيه الحياة و مش قادرة أبدأ احلم او اتخيل اي حاجه حلوة للمستقبل.. و كمان أنا كنت على علاقة بشخص و حبيته جدا و اتعلقت بيه و نفسيتي اتدمرت لما سيبنا بعض و مش قادره أتخطى أبدا و كمان أنا بقالي سنة بعمل العادة و كل المؤشرات بتقول اني بقيت مدمنه عليها و انها بوظت حياتي بس أنا من جوايا مش حاسة نفسي مدمنه و حاسة من جوايا انها خرجتني من الاكتئاب الي كنت فيه قبلها .. كل حاجه بايظه و اوضتي مهما حاولت اغير نظامها و اروقها مبحسش بتغيير جوايا و بترجع تبوظ تاني بسبب اني بقطع ورق و أنا قاعدة بدون سبب ...و حاسة نفسي مش عارفه اصلي بسبب اني طول الوقت على جنابه... حاسة نفسي كرهت البيت جدا و ببقى احسن طول مانا برة .. أتمنى حد يساعدني بجد لاني بتدمر جداا و من جوايا كارهه نفسي و الحياه و حاسة اني هضيع مستقبلي و حاسه ان اللي بمر بيه اكتر بكتير من اني اكتبه و مش جوايا اي طاقة لأي تغيير بس نفسي اتغير

Accepted Answer

السلام عليكم ، أنا اخوكى عبدالله ، بصراحة هو فى حاجات من كلامك المعظم بيعملها وفى حاجات انتى فعلا لازم تغيريها ، زى مثلا المعظم مبيحبش الدراسة ،اه بالمناسبة أنا تالتة ثانوى ازهر ، أو زى الأوضة اللى كل ما أروقها الصبح تبوظ باليل دى كلها حجات عادية ، أنا كنت فى علاقة بصراحة مع وحدة حبيتها جدا جدا جدا بس الحمد لله فقت لنفسى وقلتلها لازم ننفصل اولا علشان حرام ثانيا لسا الوقت بدرى شوية حبتين طلعت اصلا هى كانت عاوزة تقولى كدة بس مجتش الفرصة ، الزيتونة انتى اللى ممكن تبقى شايفة الحجات اللى بتعمليها دى مش ممكن تتصلح وكدة بس بالعكس تقريبا معظمنا بيمر بالمرحلة دى واللى بيتبع طريق ربنا بينجو منو اه بينجو علشان الطريق دا كلو ضلال ، بجد نصيحة من اخوكى متزعليش على حد ،علشان لو ليكون نصيب كدة كدة اكيد هتتقابلو تانى بس بالحلال ، أما العادة دا موضوع أنا استحيى اتكلم فيه بس انا هقولك نصيحة ،اول حاجه لازم تعمليها تلغى المتابعة لأى مصدر او اى شخص لما بتشوفيه بيفكرك بيها ، تانى حاجه حاولى تلغى التلفون فترة من حياتك لأن معظم الحاجه دى من التلفون اصلا ، بعد كدة أنا آسف يعنى بس اتمنى الكلام يفيدك ،لما تجيلك الحالة دى غيرى مكانك روحى اقعدى مع حد لو مافيش حد ، فربنا اولى واحد تلجأي له اصلا ، أقولك حاجه تغير حياتك (قيام الليل) قيام الليل عمل معايا معجزات اسمعى بودكاتات دينيه للدكتور أحمد العربى مثلا ولا الشيخ سمير مصطفى فى كتير وابحث عن العلاج من العادة بالبودكاستات الدينية سيبك من العلم فى العادة بالزانة لأن العادة جزء كبير منها بتكون بسبب الشيطان ، بس انا خلصت كلامى اتمنى بجد تكونى استفدتى ولو بجزئ صغير ، وربنا يوفقك ويرفع عنك البلاء والهم والغم ويقربنا جميعا منو ، ويوفقك فى دراستك أنا وانتى 🙂 إدعيلى أنا وانتى بقا ، رسالة أخيرة انتى اقوى من الشيطان تقدرى تتغلب على الهم اللى هو سبب فيه بس علشان تتغلب عليه لازم تستعين بربنا ، والله العظيم انتى بنت زى الفل ونص كمان بس حاولى مش تفكرى كتير ، يا رب يا اللى مش عارف اسمك ايه 😂 تدخلى الكليه اللى نفسك فيها وانا كمان يا رب 🙂 قولى آمين بقا 🤎

Answer

بصي يا ستي اعتبرني أخوك في الله حوار الثانوية ده زي ما إخواننا الفضلاء قالوا موضوع طبيعي خالص بس المهم أنه مش يستمر ده مش بمزاجك أنا عارف أنا كنت عامل عملية في شهر 9 وقعدت 9 و10 نقاهة من العملية وزيارات وبتاع ومفيش مذاكرة خالص بس في 10 كنت بدأت أفتح الكتاب بس بدرجة قليلة خالص وأنا من محبين التليفون والكلاب والحاجات ده جدا ومن محبين اليوتيوب أكتر حاجة وبمناسبة اليوتيوب إياكي وفيديوهات لو عاوز اجيب 99في المية لازم تشوف الفيديو كله كلام هرب ((إنا الله لا يضيع أجر من أحسن عملا)) حتى لو أنت عملتي مجهود وبعد كده عرفتي حاجة أحسن تختصر الوقت متندميش على اللي فات ربنا مش بيضعه ربنا هيجازيكي خير موضوع التليفون بقى أنت أكيد حلواني تبعديه كتير ومنفعش أنا عارف وجربت كتير ورخم الموضوع الصراحة بس والله الموضوع جميل بالجهاد ده جهاد نفسك تالته ثانوي خليها تغير منك كتير جاهدين نفسك مرة واتنين وتلاتة هتقعي وهتقومي عادي هتذاكري أسبوع وأسبوع لئ أسبوعين وأسبوعين لئ أنا مش بقولك اعملي كده أنا قصدي لما تيجي تذاكري ممكن يجيلك زهق بعد شوية فموضوع للمذاكرة كله مر بيه اللي طالبه منك أنك مجاهدي نفسك مش إنك لما تسيبي التليفون مثلا لو رجعتي تاني يبقى أنت مذنبه وحرام عليكي لئ خالص أنت بشر ومتنسيش اللي أنت بيحاربك نفسك وشيطانك فخلي جهودك ده حاجة حلوة وحاولي دائما تذكري نفسك بالشهاده فيديو تحفيزي يعني زي دفعة بسيطة كده تفتكري فرحتكم الحاجات الجميلة ده. موضوع العاده بقى أنت بتقولي أنك اللي مؤشرات كلها بتقول أنك مدمنة وأنت كتفيك بتقولي أنها بتسعدك وبتفرحك العاده هي السبب الرئيسي في حزنك واكتئابك وعدم قدرتك على المذاكرة والنوم الكتير والزهق المفاجئ وكل الأمور ده تعطيكي خمول غير طبيعي وحزن واكتئاب غير طبيعي ما بالك وأنت في ثانوية كمان الثانوية شئ جميل أنا قصدي على ضغطها النفسي يعني مع العادة شئ بيتعب فده أول شئ في العاده أنك لازم تعرفي أن الله ابتلاكي بهذا الأذى وأنك مريضة فعليا أيا كان مستواكي في الإدمان ثانيا:عليك بقيام الليل لا تتركيه أبدا حتى وإن انتكستي تضرعي إلى الله احكي كل اللي في قلبك ادعي بالمستحيل قولي يارب أنا مذنبة وأنت الغفور الرحيم دا أول وأهم شئ الباقي أسباب 2-عندما انتكستي وأدعو الله ألا تعودي إليها مرة أخرى لا تلومي نفسك أبدا كأنك لم تفعلي شيئا وابدأي التعافي من جديد عادي خالص ولكن بكل مرة تكن خالصة للتوبة وتذكري أن من ((صفات المتقين الذين هم أعظم البشر عند الله عز وجل وصفهم الله عز وجل في كتابه العزيز قائلا {وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ (133) الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (134) وَالَّذِينَ إِذَا فَعَلُوا فَاحِشَةً أَوْ ظَلَمُوا أَنفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَن يَغْفِرُ الذُّنُوبَ إِلَّا اللَّهُ وَلَمْ يُصِرُّوا عَلَىٰ مَا فَعَلُوا وَهُمْ يَعْلَمُونَ (135)} 📖 (سورة آل عمران) وأنصحك أخيرا بأن تذهبي لطبيب وتتأكدي من أن دوائه ليس به ضرر عليكي لأن الحاجات ده لازم تتأكدي بأنه كويسه علشان ميجبش تأثير عكسي أتكدي من كذا دكتور صيدلي بعيد عنكم علشان حساسية الموقف يعني. ولو عزتي أي حاجة اعتبريني أخوكي وابعتيلي وأنا هرد إن كان في موضوع العاده أو الثانوي ومعلش على الرسالة الطويلة ده

Answer

تانى حاجة الارتباط صدقينى دا شئ مش سهل انا عارفة لأنه والله اتفه من انك توقفى حياتك عشانه انتى في فترة لازم تركزى فى مذاكرتك وحياتك اما الارتباط هيجى لما تكونى فى السن والفترة المناسبة حاليا انت مش مستعدة لا لمسؤلية الارتباط ولا الاسرة ومفيش حاجة اسمها ارتباط بدون زواج دا حرام شرعا اولا ولانه ثانيا بيدمر النفسية والمشاعر وبيستهلكهم فلو سمحتى حافظى على مشاعرك وصونيها واهم حاجة حاليا قبك من ربنا ودا هيخليكى تقاومى وتقوى وبالنسبة للمذاكرة طول ما نفسيتك مشتتة بالمحرمات وعلى فكرة متزعليش من الكلمة بس هى دى الحقيقة انا عارفة انها صعبة على النفس لكن والله دى الكلمة المناسبة لو زوقتهالك او خففتها نفسك حتراوغ وتدلع ومش هتعرفى توقفى روحك عن الغلط والشيطان للاسف مزينلك المحرمات دى ولابس ماسك انا مكتئبة ومضطرية ودى الحاجة الوحيدة الى بتساعدنى غلط قربى من ربنا بالذكر بالصلاة بالقران بالدعاء ودا اهم شى كل ما تقعى قومى وقربى اكتر واستعيذى ودوسى على نفسك هتنجى، لو فى حاجة بتضايق من البيت جربى تذاكرى برة البيت في كافيه في بيت حد من قرايبك فوق السطوح اى مكان تبعدى فيه عن الى مضايقك واى مكان تكونى فيه قدام ناس كتير عشان متقدريشتمارسى العادة خليكى اطول وقت ممكن فى تجمعات حتى لو هتكونى مع نفسك بالتفكير او مش مندمجة معاهم فى النقاشات خليكى معاهم جسديا لحد ما تطلعى من إدمان العادة واهم اهم اهم حاجة ادعى كتير كل لحظة ان ربنا يساعدك وبيقين اهم حاجة انه سبحانه هيساعدك وصدقينى هتطلعى من اى حاجة مضيقاكى

كيف أتغير وأنا أشعر أنّ حياتي تدمرت؟

نفسية

سؤال من احد أعضاء فدني

تم النشر السبت، ٨ نوفمبر ٢٠٢٥

5 إجابة

15 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك