السلام عليكم، أولا ربنا يعينك ويوفقك وإن شاء الله تلاقي الشغل اللي عاوزاه بأقرب وقت. بالنسبة للعمل الحر أو الأونلاين، طالما أنتِ الحمد لله محددة عاوزة أي مجال تحديدا فإن شاء الله مع الخطوات الصح توصلي. لو هتختاري كتابة المحتوى فالأفضل تاخدي الاول دورة في كتابة المحتوى عشان تعرفي أساسيات كتابة المقالات في حالة اخترتِ المحتوى الطويل أو كتابة محتوى للسوشيال ميديا عشان هي مش مجرد كتابة، فيه أساسيات وخطوات عشان تكتبي محتوى يشد القراء وينشط الخوارزميات فيساعد على انتشار المحتوى. *** مقدمة برامج لو بتجيدي الإلقاء فممكن تشوفي على يوتيوب الدورات المجانية الخاصة بالإلقاء وبالفويس أوفر عشان تعرفي أكتر عن المجال. *** دي أول خطوة بعدها، خطوة التسويق لنفسك وشغلك. لازم تعملي بورتفوليو بنماذج العمل سواء مقالات أو تسجيلات صوتية لمقالات أو قصص تاريخية، بحيث لما تقدمي على فرص العمل أو تنشري نماذج شغلك العميل يعرف أنتِ تقدري تقدمي إيه وهل تعرفي تعملي الخدمة اللي هو عاوزها ولا لأ. *** بعد البورتفوليو، عندك إما مواقع العمل الحر زي خمسات ومستقل ودي بتعملي حساب عليها وبترفعي البورتفوليو، في خمسات الناس بتشوف خدمتك وبتطلبها منك والأفضل لو عندك حساب على سوشيال ميديا تنشري الرابط بتاعك عشان الناس توصلك أسرع. وفي مستقل العملاء بيكونوا ناشرين المشاريع اللي طالبينها وأنتِ بتقدمي عليها وتحاولي تقنعي العميل يختارك من بين الكل. **** وفيه عندك خيار تاني وأقترح تعمليه سواء اشتركتِ في خمسات ومستقل أو لأ، وهو إنك تعملي حساب على لينكدن. دي خطوة مهمة جدا وهتساعدك توصلي للعملاء اللي مستهدفاهم... بتعملي الحساب وتكتبي المهارات بتاعتك وتنشري أعمالك وكتاباتك وتنشري كمان بوستات بمعلومات من خبرتك توصل للناس أنتِ تقدري تعملي إيه. وبتضيفي ناس من نفس مجالك ومن مجالات قريبة، وتتفاعلي مع منشوراتهم وتعلقي عليها، ده هيخليك معروفة ويسهل الناس تفتكرك لما تدور على شغل تبع مجالك. *** ممكن تقرئي إجابتي على السؤال ده، فيها روابط لدورة مهمة لعمل السيدات من المنزل من أكاديمية ابن سينا وكمان رابط قناة مفيدة جدا عن العمل الحر وهتعرفك الطريق الصحيح إن شاء الله. https://www.fedni.net/q/52847274/كيف-أجد-عمل-ا-أونلاين الأهم من كل اللي فات إنك تستعيني بالله وتتوكلي عليه وتدعيه دائما بالرزق الحلال وخرجي صدقات شهرية حتى لو بمبلغ صغير، وإن شاء الله ربنا هيبارك لك ويرزقك من واسع فضله. وبلاش تقلقي من ناحية الاحتياج للمال والشغل بصورة ملحة لأن التعلق الشديد والقلق بيعمل نتيجة عكسية ويؤخر الشغل والدخل. استعيني بالله وابدئي وإن شاء الله ربنا يوفقك.💚💚
العفو 🥰، سعيدة جدا إنك استفدتِ من كلامي، تسلمي كتير يا رب وربنا يوفقك دايما.❤️❤️❤️
تم النشر الخميس، ١٧ سبتمبر ٢٠٢٦
شكرا جدا جدا جدا لحضرتك ونعم بالله العلي العظيم استفدت جدا من أرااء حضرتك الراقية جدا فعلاً جزاكى الله عنا خير الجزاء، 🤍🤍🤍🤍🥰
تم النشر الخميس، ١٧ سبتمبر ٢٠٢٦
لعرض الإجابة في فدني اضغط هنا