السلام عليكم، بصي يا قمر، أنتِ أخدتِ القرار الصح فاثبتي عليه ومتخليش الشيطان يدخل لك من أي باب سواء من ناحية إحساسك بالذنب تجاه الشخص ده أو شعورك بالحنين في أي وقت أو مشاعر الألم اللي بتمري بها دلوقتي. أنتِ اخترتِ ربنا فخليكِ مع ربنا وهو هيعينك بإذن الله. مشاعرك طبيعية لكن صدقيني مع الوقت هتقل وهتنسيها. أعتقد إنك في ثانوية عامة، مش كده؟ في عمرك ده بتكون المشاعر متقلبة ولسه غضة وبتبقي فاكرة إنك قابلتِ حب عمرك ومش هتقدري تعيشي من غيره لكن الحقيقة إن المشاعر دي مش ثابتة وهتنسيها مع الوقت. ده حصل مع ناس كتير وعدت السنين ونسيوا المشاعر دي تماما. مش بسخف من مشاعرك أكيد، هي في وقتها مفهومة وحقيقية والألم بسببها حقيقي لكن بعد فترة ونضج هتفهمي إنها مكنتش بالصورة اللي متخيلاها في وقتها والموضوع كان أبسط من كده بكتير وهتنسي كل الألم اللي حسيتِه وقتها. ** دلوقتي مش مطلوب منك غير إنك تتفهمي مشاعرك ومتجبريش نفسك على النسيان أو عدم التفكير في للي فات. وركزي على التوبة والاستغفار والاستعانة بالله عشان يثبتك على الطريق اللي اخترتِه. واشغلي وقتك بالمذاكرة، من غير مقاومة التفكير زي ما قلت عشان المقاومة هتزود التفكير مش هتلغيه. لما تركزي تدريجيا على دروسك وأهداف تانية في حياتك هتندمجي واحدة واحدة في الواقع والمسؤوليات الأهم اللي وراكِ وهيقل الالم والذكريات إن شاء الله. ابدئي وربنا يوفقك يا قمر. 💚💚
لعرض الإجابة في فدني اضغط هنا