انا دا اول سوال يكون محرج شويه وانشره مش مجهول نجرب مش هنخسر حاجه،
المهم انا لو ماسك حاجه في ايدي (قلم،غطاء،حاجه بلاستيك، ساعات بتوصل لحاجه غاليه شويه ) بحب اعضعض فيها لحد ما افتفتها الموضوع مقرف وغريب
عايز اعرف السبب اي
الحل عارفه وهو لو قربت حاجه من بوقي وانا مركز بحاول ارميها بعيد او اقوم احطها في حته بعيده بس المشكله وقت السرحان و المزاكره وانا سرحان افضل ابوظ في الحاجه ومش اخد بالي لحد ما تبوظ او وانا بذاكر انا دسته الاقلام مش بتكمل اسبوعين لان الأقلام كلها ببوظها بس كدا هي دي كل المشكله
بص، هحاول أرد على قد معرفتي الموضوع بيبقي غالبًا من غير ما تاخد بالك وانت سرحان. أنا كمان للأسف بيحصل معايا، بس بدل العضّ بحط جزء من صباعي في بقي ، وده مضايقني جدًا ومخليني حاسه إني زي الأطفال 😅، بس الحمد لله بحاول أقلل منه . أنا شايفه كمان إن دي حاجه جاية من التعود، وممكن يكون ليها علاقة بالقلق أو التوتر حتى لو مش واضح. الفكرة إن كل ما بتتكرر، بتثبت أكتر وبيبقى صعب تسيبها، بس مش مستحيل. بما إنه عندك الموضوع في إنك بتحط حاجات في بقك، فحاول تقلل ده تدريجيًا. جرب تمسك حاجة في إيدك تشغلك بدل ما ترفعها لبقك، أو تبعد الحاجات اللي بتستسهل تحطها في بقك من حواليك وانت بتذاكر. وأول ما تاخد بالك إنك بدأت تعمل كده، حتى لو بعد شوية، وقف فورًا ومتكملش. المهم كمان إنك تاخد قرار بجد إنك عايز تبطل، لأن الحاجات اللي زي دي مش بتتغير لوحدها. محتاجة منك تركيز ومحاولة كل مرة، حتى لو بتغلط وترجع تاني. مع الوقت هتلاقي الموضوع بيقل. في الآخر، هي حاجة بسيطة بس بصراحة بتدي انطباع مش أحسن حاجة وبتقلل من كاريزما الشخص شويةزي م بيقول ، فكويس إنك واخد بالك منها وبتحاول تتخلص منها (تعديل بسيط بعتذر بعد م كتبت الكلام دا لقيته مشابه ل كلام احد الأعضاء)
تم النشر الاثنين، ٢٧ أبريل ٢٠٢٦
الموضوع كله شوية توتر أو طاقة زيادة ومحتاجة تخرج صح فالحل إنك تسترجل على العادة دي وتكسرها بذكاء أول حاجة لازم تشغل إيدك بحاجة تقيلة زي هاند جريب تقعد تمرن بيها أعصاب إيدك وتطلع فيها طاقتك وأنت بتذاكر أو سرحان أو هات سبحة إلكترونية واقعد سبح واستغفر منها بتكسب ثواب ومنها صوابعك مشغولة بعيد عن بوقك وبالنسبة للأقلام والحاجات اللي بتتقطم دي فدي بتبوظ مظهرك جداً فخلي دايماً جنبك لبان أو ازازة مياه كل ما تفكر تمد إيدك على بوقك خد بوق مياه أو اقطع التفكير ده وقوم اتمشى
تم النشر الاثنين، ٢٧ أبريل ٢٠٢٦
يا محمد، شكراً إنك شاركت السؤال ده بجرأة كده، دي خطوة كبيرة نحو التغيير! 😊 العادة دي (العض على الحاجات لحد ما تبوظ) شائعة أوي، خاصة أثناء الدراسة أو السرحان، وغالباً بتكون مرتبطة بتوتر خفيف، ملل، أو حاجة لـ"تحفيز" الفم عشان التركيز (زي اللي بيحصل في الـADHD أو عادات الطفولة اللي مستمرة). مش مقرف خالص، ده سلوك بشري عادي، بس نقدر نتحكم فيه. الحلول العملية خطوة بخطوة: استبدل الحاجات الغالية بـ"ألعاب عض آمنة" : اشتري chewable pens أو silicone chew toys (بتتباع أونلاين رخيصة، زي اللي للكبار في أمازون أو صيدليات). حط واحدة جنب القلم دايماً، وكل ما تلاقي نفسك سرحان، غيّر ليها فوراً. نظّم الدراسة عشان السرحان : استخدم تقنية بومودورو (25 دقيقة دراسة + 5 دقايق بريك). في البريك، امشي شوية أو اشرب مية، مش تعض. حط القلم في مكان بعيد أثناء السرحان، واستخدم قلم معدني صلب مش بيبوظ سهل. تتبّع العادة : لمدة أسبوع، اكتب في نوت على موبايلك كل مرة تحس إنك عايز تعض (إيه اللي بيحصل قبلها؟ ملل؟ توتر؟). ده هيساعدك تلاحظ وتوقف قبل ما تبوظ حاجة. بدائل سريعة : مشَط شعرك، اضغط على stress ball، أو امضغ علكة خالية من السكر (بس مش كتير عشان الأسنان). جرب دول يومياً، وهتشوف فرق في أسبوعين. لو استمرت قوية، شوف خبير نفسي على صفحة الخبراء في فدني: https://www.fedni.net/experts – فيه متخصصين في السلوكيات والتركيز. أنت قادر تتغلب عليها، يا بطل! قولي إيه رأيك بعد أسبوع؟ 💪
تم النشر الاثنين، ٢٧ أبريل ٢٠٢٦
@. Nehal بصي من الصيدلية المانيكير المر هو شفاف ملوش لون بس طعمه يخليكي تكرهي تقربي إيدك من بوقك خالص وطول ما إنتي قاعدة سرحانة خلي في إيدك سبحة إلكترونية أو خاتم بيلف عشان وخلى معاكي دائما لبان هيشغل بقك تشغلي صوابعك بعيد عن سنانك وخلي دايماً معاكي مبرد لو حسيتي بأي حتة زيادة ابرديها بدل ما تقطميها وأهم حاجة كل ما تلاقي نفسك هتبدأي استغفري ربنا واستعيذي من الشيطان وقومي اتوضي عشان التوتر يهدأ وأول ما تشوفي ضوافرك بدأت تطول وشكلها بقى حلو هتتحمسي وتخافي عليها لوحدك وتفتكري إن الجمال بيبدأ من الحفاظ على النعمة اللي ربنا ادهالنا. وجد والله هتلاقي الدنيا تمام .
تم النشر الاثنين، ٢٧ أبريل ٢٠٢٦
بصي لو النوع ده بيعمل طبقة بتلمع وقشرة فوق الضفر يبقى لازم يتمسح قبل الوضوء عشان الميه توصل لضوافرك وصلاتك تكون صحيحة وممكن تحطيه تاني بعد ما تخلصي صلاة عادي أما لو النوع اللي الجلد بيشربه ومش بيبان له أثر فده عادي تتوضي وتصلي بيه.. المهم ركزي هل هو مانيكير كادي ولا بيشربو الجلد عشان صلاتك تبقى مقبولة بإذن الله لو لقيتيه عادي خلى معاكي اسيتون في الشنطه وقبل الصلاه تمسحي المانيكير بقطنه واسيتون .... هو لو فضل معاكي اسبوع أظافرك هتطول وتلاقي الدنيا تمام وخلى المبرد علطول معاكي بس ... وربنا يتقبل منك 🤍🌷 التعليق مكنشي ظاهر عندي شفتو بالصدفه والله 😅
تم النشر الثلاثاء، ٢٨ أبريل ٢٠٢٦
ينفع اصلي بالمانكير دا ؟ الموضوع مش توتر خالص بيبقي زهق طول ما انا قاعدة بقرقض فيهم زي الفار مع ان الموضوع مقرف بالنسبالي بس لما بسرح ومش بركز بلاقي نفسي بعمل كدا @Esmat Ali
تم النشر الاثنين، ٢٧ أبريل ٢٠٢٦
اه مش هطول للدرجة يعني حاجه بسيطه .. عشان الجروح أو الاكلان يروح بس .. إن شاء الله خير ... العفو ربنا يحفظك
تم النشر الثلاثاء، ٢٨ أبريل ٢٠٢٦
والله مش مهم تطول مش بيفرق معايا اهم حاجة بالنسبالي تكون نضيفة بس مشكلتي اني احيانا بشد الجلد وبجرح نفسي وهجرب المانكير ان شاء الله واشوف + عادي ولا يهمك وشكرا لردك
تم النشر الثلاثاء، ٢٨ أبريل ٢٠٢٦
للاسف نفس الحكاية بس في ضوافري والموضوع فيا من وانا صغيرة ولحد دلوقتي مش قادرة ابطله
تم النشر الاثنين، ٢٧ أبريل ٢٠٢٦
لعرض السؤال في فدني اضغط هنا