وعليكم السلام ورحمة الله وبركاته ما شاء الله بنوته رقيقة ومشاعرها قويه ومخلصة جدآ في علاقاتك ولكن الموضوع بدأ بدري وبدري أوي يعني من ٣ سنين تقريبآ كنتي ١٣ سنه ونص أو ١٤ سنه ودا وقت اضطراب في المشاعر لانها بتكون مبنية على عاطفة واندفاع وليست مبنية على عقل وحكمة وعلشان كده اسمها فترة مراهقة وكذلك احمد وقت ما عرفك تقريبآ مكنش طلع بطاقة وغالبآ انتي اول بنت يكلمها لان سنه صغير فكان من الطبيعي انه يتعلق بالعروسة الجميلة اللي ضحكتله واعجبت بيه وهنا احساس الرجولة كان سابق قدراته لانه فكر في خطوبة وارتباط وكلم اهله وكلم اهلك لكن رد فعل اهلك منطقي وتعامل بابا كان غاية الحكمة وكلمته كانت صح وهنعرف كلمته لما نشوفها ازاي اتحققت خصوصآ ان احمد كانت وخداه الشهامة بزيادة انه يملك الاصرار على تحقيق النجاح في علاقتكم إلا أن كلمة والدك تكسب في الاخر لانها نابعه عن حكمة لما قالك بلاش تكلمي ولاد علشان مفيش واحد بيتجوز واحده كلمها وبمرور الوقت بدأ احمد يكبر واكيد بدأ يدخل في علاقات متعدده لانه حس ان بابك مقفول فكان دافع اكتر انه يتعدد في علاقاته ويقطع تواصله معاكي لانه لقى البديل وبالتالي قلبه قسي معاكي وبيتجاهل ويبعد ويقول كلام عنيف واصبح لا يهتم بدموعك بل انه تجرأ وبدأ يدخل في مطالبات جنسية وكل دا انتي واقفة مكانك مستنية تحقيق الوعد اللي قالة من ٣ سنين انه هيحارب الدنيا من أجلك بس الحقيقة بتقول انه اول ما قرر يحارب بدأ يحاربك انتي وعلشان كده انا قولتلك انك بدأتي بدري لان كل وعد في توقيت غير مناسب بيكون مجرد حماس عاطفي غير مبني على واقع حقيقي ، والايام اثبتت ذلك ان احمد مع الايام لقى ان الجواز مش سهل وانه محتاج فلوس ولسه قدامه جيش وكمان محتاج وظيفة وفجأة اكتشف دا دلوقت ! طيب كان الاستاذ احمد هيتجوز ازاي من ٣ سنين فاتو؟ وكمان كان مستعد يحارب لكن دلوقت بيقولك اه نصبر كمان ٦ سنين ما هو كده كده مش خسران حاجة لانه عايش حياته سواء بالتجهيز لشغل او دراسة او أي شيئ تاني ولما بيحتاجك بيلاقي حضرتك في الانتظار ولما بيزهق ويقفل ويغيب بيرجع يلاقي حضرتك مستنياه بالذكريات القديمة اللي أصبحت من وجهة نظرة حرام × حرام ومع كل دا انتي مستنية تشوفي نتيجة عكس اللي بتعيشي فيه هنا لازم نبدأ بالحل وسامحيني لو كلامي قاسي بس انتي لازم تعرفي حاجة ان في فرق بين الواقع والتوقع يعني الواقع بيقول انه بيتسلى وبيتلاعب وانتي للأسف متوقعه منه الإخلاص فيما وعد ، توقعك اصبح غير مطابق للواقع وعلشان كده لازم تعيشي الواقع انه شخص باع وشاف طريق تاني ومش فارق معاه لا مشاعرك ولا حزنك ولا دموعك ولا كسرة قلبك ولو انتي شايفه ان عدم استخدامه للبلوك او اي رد فعل للإنسحاب فدى مش معناه انه مخلص ووفي بالعكس دا معناه انه سايبك تعملي بلوك وهو واثق انك هترجعي تكلميه وبالتالي هو مش هيبعد ولا عمره هيسيبك بس هيجبرك انك تنسحبي علشان وقت الجد يقولك انتي اللي بعدتي مش انا لاني كنت بحاول وغصب عني حضرتك هو مستنيها تيجي منك علشان يفضل في نظرك فارس الاحلام اللي مغرم بيك بس الظروف صعبه ولو انتي لم تتخذي الخطوة بنفسك في الابتعاد هتلاقي مع الوقت الاستاذ احمد فجأة بيخطب بحجة ان اهله بيجبروه على كده وفجأة تلاقيه بيتجوز بحجة انه غصب عنه بس لازم يسمع كلام اهله أو هتلاقي منه سلوك تاني زي مثلآ انك تعرضي عليه تديله جزء من مرتبك علشان يكمل ال١٠٠ الف وتتجوزو او الخطوة التانية اللي ماسك نفسه معاكي وبيمثل انه بيقفل علشان يمنع نفسه انه يضعف بشهوته معاكي ودي حيلة علشان لما تلاقيه بيبعد وبيقفل بسبب شهوته فحضرتك توافقي انك تبعتي صور او تدخلي معاه في علاقة جنسية بالهاتف وفي كل الاحوال الاستاذ أحمد بيلعب على مشاعرك ومستني انك تقدمي انتي الحلول والتنازلات او الانسحاب علشان هو يفضل بريء ومضحي وعلشان كده لازم نفتكر كلام بابا ان عمره ما هيتجوزك وهتفضل العلاقة دي علاقة سامة تستنزف مشاعرك وافكارك ولجل ان تنجو بنفسك لازم نبدأ فورآ بالبلوكات وبدون مقدمات واعتباره درس كبير في حياتك يعلمك ان الصادق يأتي من الباب وينتظر ولأنك قيمة غالية يظل هو منتظر حتى يسمح له وعليه ان يجتهد في تجهيز شأنه حتى يتقدم بما بتناسب مع مطلبات أهلك ولو لم يفعل ذلك فسوف تنتهي العلاقة بالفشل لأن من يأخذ بالتواصل بدون جهد سوف يتخلى عنك بكل يسر ١) الابتعاد فورآ وانهاء التواصل معه ٢) لا شك إن قرار البعد ليس سهلآ ولكن تذكري أن ألم البعد أهون من مذلة الاستمرار ٣) إن لم تنسحبي اليوم سوف تنسحبي ذات يوم ولطن طول الاستمرار يزيد من صعوبة الابتعاد مما يجبرك انتي على تقديم التنازلات ومع تقديم التنازلات لم يفي هو بوعوده وسوف يطلب المزيد ولا شك ان العلاقة مسيرها للفشل مهما طالت ٤) ركزي في دراستك وانجحي علشان تكوني قوية بنجاحك ثم احسني اختيار الشخص المناسب ممن يتقدمون إليك وهتلاقي العوض من ربنا ٥) قربي من ربنا وادعي انه يثبتك في الابتعاد ويعوضك بالخير عن الحزن والخذلان اللي حصل أخيرآ لازم تعرفي من لم يتألم فلم يتعلم وهذه طبيعة الحياة ندخل في محن لنعرف الطريق الصحيح مع الناس الي تقدرنا وتعرف قيمتنا وتصون وعودها ويارب يعوضك بالخير ويسعدك ويجازيه على ما ظلم
"ويدع الإنسان بالشر دعاءه بالخير" ؛ لما ربنا يظهرلك حقيقة شخص بلاش تسألي ربنا يديك الخير من نفس الشخص لان ربنا خلق لنا عقل لنفكر به يعني مش هنلاقي ربنا بينزل لينا وحي مخصوص علشان يقولك مصلحتك فين لكن لازم نفهم رسايل ربنا لما يخلي اللي قدامك يطلع أسوء ما فيه ودي رحمة من ربنا لأن من لطف الله بينا انه يظهر حقيقة الناس من حولك ؛ فلما ربنا يظهر الحقيقة منرحش نقوله يارب يمكن فيه الخير وانا معرفش ! لازم نحترم ارادة الله ونتقبلها وهو دا اللي قولناه اننا ازاي نفرق بين الواقع والتوقع وبلاش تعشمي نفسك بتوقع بعيد جدآ عن الواقع ولكن ممكن تدعي ربنا بالعوض وبالزوج الصالح وبكده نضمن اختيار ربنا اللي هيكون افضل من اختيارنا ويارب يوفقك لكل خير ويصلح حالك
تم النشر الثلاثاء، ٢٣ ديسمبر ٢٠٢٥
شكرا بجد علي الكلام دا انا مسحت كل حاجه وعملت بلوك هل عادي ادعي ان لو كان خير ليا ربنا يكتبو ليا ولا كدا بعلق نفسي بالفكره دي؟
تم النشر الثلاثاء، ٢٣ ديسمبر ٢٠٢٥
لعرض الإجابة في فدني اضغط هنا