السلام عليكم ورحمة الله وبركاته
انا بدات ف تالته ثانوي من اول 8 واشتركت ف المنصات وجبت الكتب بس لحد دلوقتي مسمعتش ولا محاضره ونزل ف كل المواد اكتر من 20 محاضره والانجليزي سنتر وبرضو مش بكون مركزه ولا عارفه افهم وف امتحان النهارده جبت 6 من 10
ومش قادره اذكر ولا افتح كتاب وكمان الصلاه حاسه تقيله م عارفه اي ده ومبعرفش الوقت بيضيع ف اي اوقات ع الموبايل وكمان بقيت بمل من الموبايل ومش بمسكو عندي ملل من كل حاجه وحتى النوم حاسه بنام بس مبنامش بمعني ممكن توصل ل12ساعه بس كل شوبه اقوم فمحسش اني نمت
اتمني تقولوا لي اعمل اي وتفيدوني
والسلام عليكم ورحمة الله وبركاته
السلام عليكم، أولا استهدي بالله كده وبلاش تضغطي أعصابك وأنتِ في البداية لسه. الثانوية آخر حاجة محتاجها هي التوتر والضغط النفسي فروقي كده وخلي ثقتك بربنا وبنفسك كبيرة. *** بالنسبة للملل اللي عندك وتضييع الوقت على الموبايل أو غيره فده تسويف. أنتِ حاسة من جواك إن فيه مسؤولية عليكِ والإحساس ده بيعمل لك ألم وعقلنا وظيفته يحمينا من أي نوع من الألم فبيخليكِ ساعتها تهربي لأي حاجة أو تحسي بملل عشان تسوفي ومتعمليش المهام المطلوبة منك. *** بالنسبة للصلاة، لو عودتِ نفسك تقومي أول ما تسمعي الأذان حتى لو في الأول تبدئي بصلاة واحدة تواظبي عليها في موعدها وباقي الصلوات ممكن بعدين قبل فواتها طبعا، وتتدرجي بإضافة الصلوات التانية، ده هيخليكِ تتعودي على الصلاة مع سماع الأذان، والصلاة بتبقى أسهل مع الوقت على فكرة فاستعيني بالله وادعيه يقويكِ وإن شاء الله ترجعي تواظبي عليها بسرعة. ****** فيه حاجة مهمة كمان لازم تعمليها، تأكدي إنك مش عندك أنيميا أو نقص فيتامينات وخاصة فيتامين د لأن دول ممكن يسببوا خمول وعدم تركيز ورغبة في النوم لوقت طويل أو عدم انتظامه. فاكشفي باطنة وتأكدي ولو فيه حاجة عالجيها واهتمي بنظامك الغذائي واعملي رياضة في البيت تمارين خفيفة حتى لو عشر دقائق كل يوم، هتحسن من جسمك وطاقتك وتغير معنوياتك ونفسيتك. ****** بالنسبة لتراكم المحاضرات، فأنتِ لو مبدأتيش أصلا هتراكمي أكتر والضغط النفسي هيزيد عليكِ أكتر، هتلاقي نفسك في دائرة مش قادرة تخرجي منها. فابدئي حتى لو بخطوات بسيطة أفضل من إنك تفضلي واقفة مكانك. **** ممكن تشوفي إجابتي على السؤال ده إزاي تراجعي وتوفقي بين مذاكرة المحاضرات القديمة والجديدة ومراجعتها. https://www.fedni.net/q/41462396 ***** متبصيش على المتراكم وإنك فاضل لك كذا ووراكِ حاجات كتير، طول ما أنتِ باصة على حجم الجبل اللي المفروض تطلعيه هتفضلي واقفة مكانك مش هتتقدمي خطوة، لكن لو ركزتِ على الخطوة اللي قدامك ثم اللي بعدها هتلاقي نفسك في النهاية طلعتِ الجبل من غير ما تحسي. فتعاملي مع المذاكرة والمحاضرات المتراكمة بنفس الطريقة. *** أنصحك تبحثي على يوتيوب عن فيديوهات (ذاكر أقل ذاكر بذكاء) وطبقي النصائح اللي فيها وإن شاء الله تقدري تذاكري بذكاء وتركيز أكبر في أقل وقت. وبالتوفيق إن شاء الله.💚💚
تم النشر الاثنين، ٧ سبتمبر ٢٠٢٦
وعليكم السلام ورحمة الله وبركاته يا بنتي. أول حاجة أحب أقولها لك إن اللي بتمرّي بيه دلوقتي شائع جدًا في سنة تالتة ثانوي، والشعور بفقدان الشغف والثقل في كل حاجة مش ضعف منك، ده إشارة إن جسمك وعقلك محتاجين إعادة ترتيب. المهم إننا نبتدي بخطوات صغيرة وواقعية عشان نرجّع الطاقة تدريجيًا. ابدئي بتقسيم اليوم لأجزاء بسيطة جدًا: اختاري محاضرة واحدة بس في مادة واحدة كل يوم، واسمعيها وأنتِ قاعدة على المكتب بدون ما تفتحي أي حاجة تانية. لو حسيتِ إن 20 محاضرة كتير، خلّي هدفك اليومي "محاضرة واحدة + مراجعة سريعة لنقاطها". ده هيخلّي الإنجاز ملموس ويقلل الشعور بالإرهاق. بالنسبة للامتحان اللي جبتي فيه 6/10، خديه كإشارة إنك محتاجة تركزي على الفهم أكتر من الكم، فجربي تكتبي ملخصات قصيرة بعد كل محاضرة حتى لو سطرين. بالنسبة للصلاة اللي بقت تقيلة، حاولي ترجعي لها بخطوة واحدة: قومي لصلاة واحدة في وقتها وادعي ربنا يخفف عنك، لأن الصلاة في حد ذاتها بتدي طاقة وبركة حتى لو في البداية مش حاسة بيها. أما النوم الطويل بدون راحة، فحاولي تثبتي موعد نوم واستيقاظ ثابت كل يوم، وتقللي استخدام الموبايل قبل النوم بساعة على الأقل. لو الموبايل بقى ممل، استغلي الملل ده في إنك تفتحي كتاب أو محاضرة بدل ما تقعدي تقلّبي بدون هدف. ابدئي النهاردة بخطوة صغيرة واحدة بس، وكل يوم زودي شوية. لو عايزة أفكار أكتر عن تنظيم الوقت أو طرق المذاكرة، ابحثي على فدني عن أسئلة مشابهة، هتلاقي تجارب كتير مفيدة. ربنا يوفقك ويشرح صدرك ويسهّل لك الطريق يا رب.
تم النشر الاثنين، ٧ سبتمبر ٢٠٢٦
لعرض السؤال في فدني اضغط هنا