تعليقي دا ليس بغرض البحث عن حل لمشكلة معينة ، بل حبيت أنقل تجربة حياتية يمكن غيري مر بيها أو واقع فيها حاليا ، أنا طالبة ثانوية عامة دفعة ٢٠٢٦ ، درجتي طلعت وحشة جبت ٥١% ومعايا دور تاني فيزياء ، طبعا كانت صدمة وتحطيم لأهلي قبل ميكون ليا بس إن شاء الله خير ، بعد تفكير كتير قررت أعيد السنة هشيل درجات الرأفة من الكيمياء والأحياء و E وأعيد السنة علي ٤ مواد ولو قفِّلتهم بإذن الله مجموعي يوصل ل٩٣% وأعوض أهلي ، وهدفي أدخل كلية أداب قسم علم نفس عشان أكون أخصائية نفسية بإذن الله ، مش خطوة سهلة إني أقرر أعيد السنة وصحابي يكونوا دخلوا كليات وسبقوني بسنة دي فيها تحطيم من الداخل بس بحاول أتجاوزها وربنا يعيني إن شاء الله ، حابة بس أوصل رسالة لغيري
في مقولة بتقول " لو كنت تعلم الغيب لاخترت الواقع "
الخير ليك في الموضع اللي ربنا حطاك فيه أيَّا كان الموضع فكله خير وانت مش شايفه بس في المستقبل هتعرف إن رغم إن الطريق كان صعب ومتعب إلا إن فعلا هو اللي كان خير .
لا تنسوني فضلاً من صالح دعواتكم لعلَّ أحدكم أقرب إلي الله مني .
السلام عليكم، أولا ربنا يوفقك ويعوضك خير إن شاء الله. جميل إنك بتفكري كده وإنك كمان تجاوزتِ نقطة إن أصحابك يكونوا سابقينك بسنة لأن دي من ضمن الأسباب اللي بتخلي كتير يخافوا من إعادة السنة لأن تفكيرهم وزعلهم إنهم هيكونوا متأخرين عن زمايلهم مع إنها مش بتتحسب خالص بالأسبقية ولا العمر اللي دخلت ولا خرجت فيه من الكلية والنجاح ممكن يتحقق من أي طريق وفي أي عمر، المهم الاستعانة بالله والسعي باستمرار. استخيري ربنا برضه لو كنتِ لسه مستخرتيش وتوكلي عليه ولو هتعيدي خلاص رتبي أمورك وتجنبي الأخطاء اللي وقعتِ فيها السنة دي وركزي على المراجعة بانتظام وحل أسئلة امتحانات كتير واعملي لنفسك أجواء امتحان كل فترة. وربنا يعينك ويقويك وإن شاء الله تحققي هدفك وتكوني أخصائية نفسية كبيرة في المستقبل القريب. ربنا يوفقك لكل خير.💚
تم النشر الجمعة، ٢١ أغسطس ٢٠٢٦
يا مجهولة، شكراً إنك شاركتي تجربتك بهذا الصدق والنضج. قرارك بإعادة السنة مش قرار سهل أبداً، خاصة وأنتِ شايفة صحابك بيتقدموا، وده بيحتاج قوة داخلية كبيرة وثقة في ربنا. إنكِ تقرري تعيدي عشان توصلي لهدفك في كلية الآداب قسم علم نفس، ده دليل على إنكِ بتفكري بعيد وبتحطي أولوياتك صح. الرسالة اللي نقلتيها جميلة جداً، والمقولة دي فعلاً بتذكرنا إن الخير مخبي في تفاصيل ما بنشوفهاش دلوقتي. ربنا بيختار لينا الأفضل، حتى لو الطريق فيه تعب أو تأخير. وإنكِ بتسعي تعوضي أهلك وتكوني أخصائية نفسية، ده هدف نبيل وهيخدم ناس كتير إن شاء الله، وهيخليكِ أقوى وأكثر فهماً للناس اللي بيمرّوا بظروف صعبة زي اللي مريتي بيها. ربنا يوفقك في الإعادة ويسهل لكِ المواد الأربعة ويوصلكِ للـ93% اللي بتتمنيها، ويبارك في جهدك ويجعله في ميزان حسناتك. استمري في الدعاء وخدي خطوة بخطوة، وهتوصلي بإذن الله. لو حابة تشاركي أي تفاصيل أو تحتاجي دعم في أي مرحلة، أنا هنا.
تم النشر الجمعة، ٢١ أغسطس ٢٠٢٦
انا ي قلبي قلت إني فكرت كتير مأخذتش القرار دا بسهولة وأنا عارفة السلبيات بتاعته وعارفة إن الوزير غير نظام الإمتحانات ل٥٠% مقالي و٥٠% اختر ، عارفة السلبيات قبل م أقرر أعيد ، وصليت استخارة ٤ أو ٥ مرات وكنت مرتاحة الحمدلله + في أسباب تانية مخلياني عاوزة أعيد برده مش حتي عشان أهلي لأ هما أهلي قالولي لو هتدخلي علشانَّا فبلاها خالص احنا راضين بقضاء ربنا ، بس أنا اللي عندي أسباب تانية كتير تخليني أقرر أعيد .
تم النشر الأحد، ٢٣ أغسطس ٢٠٢٦
انا كمان دفعة 2026 ومنصحكيش تماماً وده من وجهة نظري الامتحانات السنادى كانت صعبه يعنى السنه الجايه اصعب يعني احتماليه التقفيل والاحلام الورديه نسبة تحقيقها ضيئله ده غير ان تنسيق السنه الجايه يمكن هيكون اصعب ف انتِ ارضى لان ده اختيار ربنا ليكِ كنت بفكر نفس الفكرة بس سمعت ڤديو المستفاد منه ان مجموعك لو وافق دعائك ف ده خير واْحمِد ربنا لكن لو موافقش يبقى تفرح وتحمد ربنا لانه هوا اللى اختارلك والله يعلم الخير ف بلاش تسخطى ولو فعلاً الفكره مسيطرة على عقلك ومش شايفه غير ان ده الحل يبقى تستخيري لو خير هتعمليها ولو مش خير هتصحى مقفوله وكارهه الفكرة كلها بعد صلاة الاستخاره ف بلاش تمشى ورا تفكيرك واستخيري ربنا(كلام من واحده اتظلمت جداً واتكسر بنفسها بس الحمدلله)
تم النشر الأحد، ٢٣ أغسطس ٢٠٢٦
لعرض السؤال في فدني اضغط هنا