الموقف اللي بتوصفيه ده مش صداقة، ده استغلال واضح وصريح. في الجامعة بنقابل شخصيات كتير، ومنهم اللي بيعرف يختار الشخصيات الطيبة عشان يستغلها لمصلحته الشخصية سواء في الأبحاث أو الماديات. عشان تخرجي من الدائرة دي، محتاجة خطوات عملية: 1.كلمة 'لا' حق مشروع: لما تطلب منك بحث أو فلوس، قولي 'مش هقدر' أو 'مش متاح معايا حالياً' من غير ما تبرري كتير. التبرير الكتير بيديها فرصة تضغط عليكي أكتر. 2.واجهي الابتزاز العاطفي: لما تحاول تحسسك بالذنب أو تقول 'مش قادرة'، افتكري إنها قادرة تطلب وقادرة تتكلم عليكي في الجروبات، يعني هي مش ضعيفة، هي بتستخدم 'الضعف' كوسيلة ضغط. 3.تجاهلي كلام الجروبات: يمكن بتعمل كدا عشان عارفه انك هتشوفيه فتزهقك وتخليكي تزعلي وترجعي تكلميها معرفش هي عندها حب السيطره والتملك تقريبا ، فالافضل تقطعي معاها خالص احسن ليكي ، واعرفي ان اي حاجه ف الدنيا دي ملهاش اهميه ف مقابل صحتك النفسيه ، لان الانسان لو تعبان نفسيا مش هيقدر حتى يتكلم او يعمل اي حاجه حتى لو كان بسيطه فحافظي علي نفسيتك وابعدي عن كل حاجه تأذيها . 4.الانسحاب التدريجي: مش لازم تصادميها بقوة لو ده بيوترك، بس قللي الكلام جداً، اعتذري عن الخروجات، وخلي علاقتك بيها رسمية جداً وفي أضيق الحدود. 5.الفلوس خط أحمر: الصداقة مفيهاش إجبار على دفع فلوس. لو هي محتاجة فعلاً، فيه طرق تانية، لكن إنها تاخد فلوسك ومترجعهاش ده تصرف غير مقبول تماماً.نصيحة أخيرة: انتي في الجامعة عشان تتعلمي وتبني مستقبلك وتكوني صداقات سوية بتدعمك مش بتستنزفك. الشخصية دي وجودها في حياتك بيعطلك وبياخد من طاقتك النفسية على الفاضي. متخافيش من خسارتها، لأنك فعلياً مش خسرانة صديقة، أنتي بتخلصي نفسك من عبء. بالتوفيق في دراستك، وخليكي واثقة إن وضع الحدود هو اللي بيجبر الناس على احترامك.
هي نصحيه قالهالي دكتور وبحاول امشي عليها ، ف الدنيا اللي احنا فيها حاليا اولي حاجه للإنسان انه يكسب نفسه ويبعد عن اي اذي لحد ما ع الاقل يستقر وبعدها لو حب يصبح ف اللي حوليه فما عليه اللا النصيحه فقط
تم النشر الثلاثاء، ١٧ مارس ٢٠٢٦
هي عشان بتتمسكن ف بتصعب عليكي وطالما انتي مستغله منها كدا وعارفه انها سيئه الطباع ف خلصي نفسك منها وبلاش عاطفه لانه مع مرور الوقت ممكن تندمي وتقولي ياريتني نهيت العلاقه دي من زمن ،لو انتي حاولتي معاه مرة واتنين وهي لسه مصرّه علي طريقتها ف بلاش منها خاالص
تم النشر الثلاثاء، ١٧ مارس ٢٠٢٦
بحاول اعمل كده وبحاول ابعد عن ناس عموما بس هي بتقرب كل شويه فابحس ان انا كده مش كويسه وظالماه وهي شاطره انها تخلني احس بالذنب بس بحاول
تم النشر الثلاثاء، ١٧ مارس ٢٠٢٦
مش معني ان الشخص والده متوفي يبقي يتصرف بالطريقه دي ، وكونك مبتعرفيش تقولي لأ ف هتتعبي جامد جدا ف الدنيادي وهتلاقي نفسك مستهلكه من كل الناس والامر هيوصل بيكي للأذيه النفسيه ثم للإكتئاب ، مش معني اني عاوز اساعد حد في محنه اني اتأذي منه ، ف متستنيس انها تأذيكي اذيه متعرفيش تفوقي بعدها ، ركذي ف حياتك اولى
تم النشر الثلاثاء، ١٧ مارس ٢٠٢٦
انا كلامي قليل معاها بقى قليل جدا بس هي بردوا بتطلب وانا بتحرج ارفض عشان مش بعرف اقول لا خالص لو حد طلب حاجه هي عشان والدها متوفي دايما بتضغط عليا من الناحيه دي في كل حاجة واكتر حاجه انا مش نوع بغش ولا بغشش حد في الامتحانات هي بتجبرني اغششها مره رفضت فضلت تكلمني فتره وحش لحد ما جبتلها هديه وكان هيتعملي محضر غش بسببها وهي عادي ولا اعتذرت ولا أي حاجه مش عارفه اوقفها عند حدها
تم النشر الاثنين، ١٦ مارس ٢٠٢٦
لعرض الإجابة في فدني اضغط هنا