هو انا لو طول عمري عندي مشكله في الصحاب حتى لما بيكون فيه بيستغلوني كتير يعني أنا بقيت في سنه تانيه جامعه واتعرفت على بنت وبقينا صحاب بس هي بتطلب كتير يعني اكتب ليها أبحاث وحاجات مطلوبه مننا ولما برفض تعاملني وحش وتقعد تقولي انا مش قادره ومش عارفه وهي بتتكلم بعدها على جروبات عادي وبتطلب مني فلوس كل ماتشوفني مره أخدت فلوس معايا كلها وبردوا بيكون معاها ومش بترجع حاجه وفي الآخر لما بحاول أبعد انا بكون وحشه وبتحسنني بالذنب مش عارفه أعمل اي
الموقف اللي بتوصفيه ده مش صداقة، ده استغلال واضح وصريح. في الجامعة بنقابل شخصيات كتير، ومنهم اللي بيعرف يختار الشخصيات الطيبة عشان يستغلها لمصلحته الشخصية سواء في الأبحاث أو الماديات. عشان تخرجي من الدائرة دي، محتاجة خطوات عملية: 1.كلمة 'لا' حق مشروع: لما تطلب منك بحث أو فلوس، قولي 'مش هقدر' أو 'مش متاح معايا حالياً' من غير ما تبرري كتير. التبرير الكتير بيديها فرصة تضغط عليكي أكتر. 2.واجهي الابتزاز العاطفي: لما تحاول تحسسك بالذنب أو تقول 'مش قادرة'، افتكري إنها قادرة تطلب وقادرة تتكلم عليكي في الجروبات، يعني هي مش ضعيفة، هي بتستخدم 'الضعف' كوسيلة ضغط. 3.تجاهلي كلام الجروبات: يمكن بتعمل كدا عشان عارفه انك هتشوفيه فتزهقك وتخليكي تزعلي وترجعي تكلميها معرفش هي عندها حب السيطره والتملك تقريبا ، فالافضل تقطعي معاها خالص احسن ليكي ، واعرفي ان اي حاجه ف الدنيا دي ملهاش اهميه ف مقابل صحتك النفسيه ، لان الانسان لو تعبان نفسيا مش هيقدر حتى يتكلم او يعمل اي حاجه حتى لو كان بسيطه فحافظي علي نفسيتك وابعدي عن كل حاجه تأذيها . 4.الانسحاب التدريجي: مش لازم تصادميها بقوة لو ده بيوترك، بس قللي الكلام جداً، اعتذري عن الخروجات، وخلي علاقتك بيها رسمية جداً وفي أضيق الحدود. 5.الفلوس خط أحمر: الصداقة مفيهاش إجبار على دفع فلوس. لو هي محتاجة فعلاً، فيه طرق تانية، لكن إنها تاخد فلوسك ومترجعهاش ده تصرف غير مقبول تماماً.نصيحة أخيرة: انتي في الجامعة عشان تتعلمي وتبني مستقبلك وتكوني صداقات سوية بتدعمك مش بتستنزفك. الشخصية دي وجودها في حياتك بيعطلك وبياخد من طاقتك النفسية على الفاضي. متخافيش من خسارتها، لأنك فعلياً مش خسرانة صديقة، أنتي بتخلصي نفسك من عبء. بالتوفيق في دراستك، وخليكي واثقة إن وضع الحدود هو اللي بيجبر الناس على احترامك.
تم النشر الاثنين، ١٦ مارس ٢٠٢٦
السلام عليكم، طبعا الإجابات كفت ووفت. مشكلتك بس إنك محتاجة تعودي نفسك وتقويها على الرفض وإنك تكوني جريئة ومتتكسفيش أبدا تقولي لأ. زي ما هي مش بتتكسف خالص وبتتعمد تسيئ معاملتك لو حست منك تردد أنت كمان فكري في نفسك وخليها أولوية. الأشخاص اللي زي دي مينفعش معهم أسلوبك ده وبيخليهم يتجرؤوا ويتمادوا أكتر. اقعدي مع نفسك كده وواجهيها بالوضع ونتائجه وهل انت راضية عن تعرضك للاستغلال بالشكل ده وتخيلي شكل نفسيتك وحياتك هتكون عاملة إزاي إذا استمرت الشخصية دي في حياتك. ده هيساعدك إن شاء الله ويوضح لك الصورة أكثر ويخلي قرار قطع العلاقة دي أسهل. الموضوع أيوه هيحتاج منك مجهود وصبر لكن في الآخر نفسك تستحق تدوري على مصلحتها وتبعدي عنها أي أذى... الموضوع مش مستحيل بس أنت ابدئي وجمدي قلبك. استعيني بالله وادعيه دايما يبعد عنك شرها وأذاها وعلى طول التزمي ذكر (حسبي الله ونعم الوكيل) وإن شاء الله ربنا هيكفيك شرها وشر غيرها. ربنا معك.
تم النشر الثلاثاء، ١٧ مارس ٢٠٢٦
ابعدي عنها علطول اصل مافيش صحاب كده ودي غالب مش بتكون ناجحه او شاطره وهتجرك معاها برضو ف انتي ابعدي واختاري وصحابي حد غيرها اصل مش اخر وحده يعني ولازم تمري بكدا هتخسري وتصحابي انا عن نفسي لما الاقي وحده مش زي ما انا عاوزاها ببعد عنها واتصحاب علي ناس احسن لان الصاحب ساحب وكلنا عارفين كده
تم النشر السبت، ٢١ مارس ٢٠٢٦
بصي بطلي دور الضحية بقرار منك الناس بتتعامل معانا بالطريقة اللي إحنا بنسمح بيها. لو فضلتي تقولي حاضر عشان متزعليش حد، هتخسري نفسك في الآخر. قولي لأ من غير تبريرات طويلة هي بتستخدم سلاح الابتزاز العاطفي عشان تحسسك إنك مقصرة، مع إنها هي اللي مقصرة في حقك. لما تحاول تحسسك بالذنب، فكري نفسك إن المساعدة ذوق مش فرض، وإنك مش مسؤولة عن كسلها أو مصاريفها وفي الأبحاث قولي والله مشغولة وورايا حاجات كتير مش هقدر أعمل غير حاجتي. وفي الفلوس قولي معيش غير اللي يكفيني بالعافية. والبنت دي لازم تبعدي عنها تدريجياً. متدخليش معاها في خناق، بس قللي الكلام، متفتحيش مواضيع، وخليكي رسمية جداً. الصداقة سند مش استنزاف. ونصيحة أخيرة الصاحب اللي يخليكي تحسي بالثقل والهم لما تشوفي رقمه أو تقابليه، يبقى مش صاحب، ده حِمل لازم يترمي. وجد والله ربنا يحفظك ويسعدك
تم النشر الاثنين، ١٦ مارس ٢٠٢٦
يا حبيبتي، أنا فاهمة تمامًا إحساسك، ودي مشكلة شائعة جدًا في الصداقات اللي بتبدأ زي كده. أنتِ طيبة القلب وبتحبي تساعدي، بس هي بتستغلك وبتحول الصداقة لعلاقة غير متساوية، وده بيخليكِ تشعري بالإرهاق والذنب. الحمد لله إنك وصلتِ للسنة التانية جامعة، يعني عندكِ قوة وذكاء! الحل العملي خطوة بخطوة: حددي حدودكِ دلوقتي : المرة الجاية لما تطلب، قولي بهدوء وثبات: "أنا آسفة، مش هقدر أساعدكِ في ده دلوقتي، عندي التزاماتي الخاصة." متبرريش كتير، ومتقوليش "لا" بغضب. لو عايزة تكتبي رسالة، خليها قصيرة زي: "مش هقدر أكتب البحث، ركزي على دراستكِ بنفسكِ، ربنا يوفقكِ." تعاملي مع الذنب : هي بتحاول تحملكِ الذنب عشان تستمر في الاستغلال،. مش مسؤوليتكِ نجاحها أو فشلها، ولا فلوسها. أنتِ مش "وحشة" لو رفضتِ، ده حماية لنفسكِ. ابتعدي تدريجيًا : قللي التواصل، مترديش على كل رسالة فورًا، ولو شفتيها في الجامعة، ابتسمي ومشي. لو بتطلب فلوس تاني، قولي "معلش، مش معايا." مع الوقت، هي هتفهم وتبعد لوحدها. ابني صداقات صحية : دوري على ناس في الجامعة زيكِ، اللي بيتبادلوا المساعدة مش بيطلبوا بس. انضمي لنشاطات دراسية أو جمعيات خيرية، هتلاقي أصحاب حقيقيين يقدرونكِ. أنتِ قوية وهتقدري، يا قمر... وده درس حلو للحياة، وهيخليكِ أذكى في اختيار الأصحاب. لو عايزة نصائح أكتر، ابحثي في فدني عن أسئلة مشابهة هتلاقي إجابات كتير، أو شوفي الخبراء هنا: https://www.fedni.net/experts. ربنا ييسر أمركِ ويبعثلكِ الخير 💕
تم النشر الاثنين، ١٦ مارس ٢٠٢٦
علاقة سامة متقلليش من نفسك بإنك تطولي فيها
تم النشر الاثنين، ٢٣ مارس ٢٠٢٦
ابعدي عنها وخليكي في طريقك واختاري الصحبة اللي تشدك للنجاح مش للرجوع للخلف
تم النشر السبت، ٢١ مارس ٢٠٢٦
بكل اختصار اتعلمي تقولي لاء و متجيش ع نفسك عشان حد لو انتي شايفة انها متستحقش خلاص انك يكون معندكيش صحاب افضل كثير من احساس ان حد بيستغلك
تم النشر الأربعاء، ١٨ مارس ٢٠٢٦
مهو ده تعريف الشخص التوكسيك ، نصيحة ليك متقطعيش معاها اتدربي فيها عالبرود ، اه بكلمك جد طوري مهاراتك فيها ، اتعاملي عادى ولما تطلب حاجه قولي لها مش فاضية مش معايا ولما تتغير معاك زى م بتقولي تجاهليها جدا و اتعلمي تهزري مع غيرها و متبصيلهاش حتى كأنها مش واقفة ، ولو بعتتلك واتس مثلا اتعودي مترديش على طول حتى لو فاضية مفيش مشكلة تخليها تانى يوم عادى وقولي مخدتش بالى كنت مشغولة ، هي بتلعب عليك نفسيا و دى خبرة مطلوبة ف الحياة هتلاقى بيئات عمل توكسيك ومديرين وزمايل عمل توكسيك. و صحاب كده بردو ، فأنت شكلك محترمة ف فرصة ليك تتدربي فيها وانا معاك ف الكومنتات لو حبيت توجيهات
تم النشر الاثنين، ١٦ مارس ٢٠٢٦
ابعدي عشان لو وفقت تبقى معاها هتفضلي طول عمرك في استغلال وانتي نفسك عارفه ان استغلال ابعدي عنه حتى لو هتبني وحشه ابعدي وحولي تبطلي طيبه عارفه انك اكيد بتقولي دي صاحبتي الوحيده بس دي مش صحابه
تم النشر الاثنين، ١٦ مارس ٢٠٢٦
لعرض السؤال في فدني اضغط هنا