السلام عليكم ياحبيبة القلب قبل ما أبدأ كلامى ف الكلام موجه للجميع لأن انا حسيت إن الدنيا مزعلاكو كلكو @الجميع أولا..... وقبل اى حاجه لازم نكون عارفين ان الدنيا دى دار شقاء وإختبار ونشقى فيها ونشقى فى الإختبار كى ننجح فيه وننتقل برحمة رب العالمين علينا من دار الشقاء الفانيه إلى جنة الخلد ثانياً..... قال الله عز وجل فى كتابه العزيز ﴿لَقَد خَلَقنَا الإِنسانَ في كَبَدٍ﴾ لقد خلقنا الإنسان في تعب ومشقة لما يعانيه من الشدائد فى الدنيا يعنى دى طبيعة الإنسان وطبيعة الدنيا بس مش معناه إن هانعيش طول عمرنا فى شقاء لا طبعاً احنا كل واحد فينا اتخلق واتكتبله نصيب من الابتلاء والمرض و الفرح والحزن إلى أخره من أمور الدنيا وما الله بظلامٍ للعبيد نقطه 1 انتى قلتى ان انا حياتى بايظه ومفهاش حاجه واحده حلوه او مظبوط ف أنا هاطلب منك طلب صغير وهو انك تقعدى مع نفسك قاعده تطلعى منها الشيطان استعيذى بالله من الشيطان الرجيم واقعدى استشعرى نعم ربنا عليكى بصى لمن هم أعلى منك فى البلاء احصى نعم ربنا عليكى شوفيهم كام نعمه شوفى حياتك بنظره مختلفه ونتلاقى ان الشيطان كان عليكى عن نعم لا تعد ولا تحصى وعلى فكره من أسباب حزن الإنسان انه بيتعامل مع نعم ربنا على انها بديهيات وحجات اساسيه ف مبيحسش بقيمتها وميحسش انها تستاهل الشكر وبالتالى هايشوف ان حياته مفهاش حاجه حلوه اما بقى كون اننا نفشل فى كل حاجة ف ده طبيعى لولا الفشل ماخلق النجاح ولو فشلنا ٥ مرات مثلا ف عمر ال ٥مرات ماهيكونو زى بعض نقطة 2 انتى سألتى سؤال جميل وهو إحنا ليه كبرنا بس استأذنك يا جميله هانبدله ب سؤال تانى وهو إحنا هنا ليه؟ لماذا خلقنا؟ اقولك انا إحنا هنا ليه إحنا هنا عشان نعبد ربنا خُلقنا لعبادة الله الواحد الأحد خُلقنا لتعمير الأرض وللتزاوج لكى نتكاثر لكى تكبر الأمه الإسلاميه وهل هذا مانفعله خُلقنا للعباده ف غرفتنا الحياة الدنيا وألهتنا عن العباده خُلقنا لتدمير الأرض ف أفسدناها ودمرناها خلقنا للتزاوج والتكاثر ف أصبحنا نرى ماتسمى بالمساكنه ونرى الشباب والشابات منغمسين مع بعض فى إطار غير شرعى والكارثه اننا بقينا شايفين ده عادى ولو فى ذرة ضمير جوانا بتقولنا ان الحاجه دى غلط بنموتها ونستمر فى اللى احنا بنعمله تحت مسمى اننا نعيش يومين وننبسط نقطة3 إحنا كبرنا ليه ؟ بصى ياست البنات العمر مراحل إن أطال الله فى عمرنا ف لازم نعدى بكل مراحل العمر ولازم نعيشها والشاطر اللى يعرف يستمتع بكل مرحله فى عمره لأن كل مرحله وليها متعتها يعنى كل مرحله فيها متعه وشقاء غير المتعه والشقاء اللى فى اى مرحله تانيه وطبيعى ان احنا منحبش نكبر لأن كل مابنكبر كل مابنشيل مسؤليه أكبر وهاديكى الجواب الصح إحنا ليه كبرنا؟ هاقولك كبرنا عشان نصبح بالغين مكلفين ونؤدى ما خُلقنا لأجله وهو عبادة رب العالمين ف احنا نشقى فى الدنيا ل نسعد فى الأخره نقطه4 وَابتَغِ فيما آتاكَ اللَّهُ الدّارَ الآخِرَةَ وَلا تَنسَ نَصيبَكَ مِنَ الدُّنيا وَأَحسِن كَما أَحسَنَ اللَّهُ إِلَيكَ وَلا تَبغِ الفَسادَ فِي الأَرضِ إِنَّ اللَّهَ لا يُحِبُّ المُفسِدينَ﴾ واطلب فيما أعطاك الله من الأموال الثواب في الدار الآخرة؛ بأن تنفقه في وجوه الخير، ولا تنس نصيبك من الأكل والشرب واللباس وغير ذلك من النعم، في غير إسراف ولا مخيلة، وأحسن التعامل مع ربك ومع عباده كما أحسن سبحانه إليك، ولا تطلب الفساد في الأرض بارتكاب المعاصي وترك الطاعات، إن الله لا يحب المفسدين في الأرض بذلك، بل يبغضهم نقطة5 بقى والأخيره عشان عارفه انك زهقتى من طول الكلام لازم نعرف ان العيب مش فى الزمن العيب فينا اولاً لإن إحنا إدينا الدنيا أكبر من حجمها وجعلناها أكبر همنا واتعاملنا معاها على انها أبديه وليست فانيه بقينا بتحارب فيها على كل حاجةونسينا ان احنا هانخرج منها ب ولا حاجه ولذلك عمرنا ماهنرتاح فيها والهموم اللى انتى مش عارفه شكلها هايبقى عامل ازاى لما تتقدمي فى العمر اكتر من كده ف دى فى المستقبل والمستقبل ده من العلوم الغيبيه التى لا يعلمها إلا الله ف هل من المنطق ان انا اقعد اشيل هم حاجه انا اصلاً مش عارفه ايه هى ده لا من الدين ولا من العقل وحابه اختم كلامى ب حاجه خليكى دايماً قريبه من ربنا وحافظى على علاقتك بربك لأنها الحاجه الوحيده اللى هاتنجيكى فى الدنيا وفى الأخره والقرب من ربنا ده زوال للهموم والله اتمنى ا اكون قدرت أفيدكم وعذراً على الإطاله
يارب امين 🤍
تم النشر الاثنين، ٢٤ نوفمبر ٢٠٢٥
بصى انا حاسه بيكى وعارفه كويس اوى الشعور دع بس عن تجربه ف انا بقولك استنى واتفرج على عوض ربنا وانتى مش متأخره بالعكس هو ده الخير ليكى ومتعلميش ربنا مجهودك ايه ولو على الإبتلائات ف دى تنقيه للإنسان ربنا يوفقك ويعوضك ويرزقك كل خير
تم النشر الأحد، ٢٣ نوفمبر ٢٠٢٥
عليكم السلام ورحمه الله وبركاته ، شكرا ليكي علي كل الكلام الجميل ده ♥️♥️
تم النشر الأحد، ٢٣ نوفمبر ٢٠٢٥
كلامك جميل جدا ومريح وانا فاهمه كويس، والحمد لله انا قريبه من ربنا بصلي وبحفظ القرآن بس أنا بشر ولا اتعب وأيأس وخصوصا ان لسه سني صغير ومريت بمشاكل كتيره فوق الوصف وفوق طاقتي وتحملي وانا لسه المفروض ببني حياتي وحاجات كتير ميتحملهاش حد ، في نظير زمايلي واللي من سني اغلبهم مبيحصلش معاهم كده وحياتهم ماشيه اللهم بارك او مشاكلهم مشاكل عاديه. ، وده كتير بيسببلي يأس وإحباط وأنه انا محققتش اي حاجه ف حياتي وأنه الكل سابقني بخطوات مش بس خطوه ، وخصوصا ان انا ف وسط بيعشق المقارنات واللي حواليا دايما ينقلولي اخبارهم ويكلموني عنهم عملوا ايه وانجازاتهم ايه والاقيني انا معملتش اي حاجه مطلعتش خطوه واحده لقدام من كم سنه ومفيش اي جديد ف حياتي ، خمس سنين يعدو كلهم ف تعب نفسي وبدني وفشل ف كل محاوله بحاولها بتنتهي بيأس واحباط وكل ده بمر بيه وانا لوحدي ، بس الحمد لله اني بقدر اقوم وأكمل بفشل للمره المليون بقوم بعدها احاول للمره المليون وواحد ، بس الإنسان طاقه خايفه طاقتي تخلص ومقدرش لما اقع اقوم تاني ، وخصوصا ان مفيش حد بيسندني غير اهلي ،قصادهم في مليون واحد بيحبطني ويكسرني .. عندي ثقه ف ربنا انها هتعدي وكله هيبقا تمام أن مكنتش المره دي هتبقى المره اللي بعدها . ، ممكن تدعيلي ربنا ييسرها معايا ويصلح الأحوال ♥️
تم النشر الأحد، ٢٣ نوفمبر ٢٠٢٥
لعرض الإجابة في فدني اضغط هنا