السلام عليكم، هنتريق ليه بس؟ وبعدين مين قال مجهودك ضاع؟ ممكن كان في تفكيرك كلية معينة بس مش معنى إنك مدخلتهاش وربنا كتب لك حاجة تانية أو إنك نزلت في المجموع إن كده مجهودك وتعبك راح على الفاضي وإنك مش هتشوف نتيجة تعبك. أنا مش عارفة هل فيه إمكانية إنك تعمل كشف وتتأكد من درجاتك ولا خلاص، بس عامة الثانوية العامة مش نهاية المطاف ولا هي اللي هتحدد نجاحك في الحياة، هي يا دوب بتوجهك في طريق جديد وأنت في إيدك تخلي الطريق ده بداية نجاح وتفوق إن شاء الله. ناس كتير اتظلمت في الثانوية أو جابوا مجموع صادم رغم مجهودهم الكبير ومع ذلك حققوا نجاحات كبيرة في الكليات اللي دخلوها حتى لو هي مكنتش رغبتهم والكلية اللي كانوا بيحلموا بها، وفيه أكيد ناس تانية تركوا التجربة تكسرهم، فأرجو إنك متكونش منهم ومتحولش الثانوية العامة لكسرة تفضل ملازماك طول العمر وعقدة نفسية جواك. متاخدش أي قرارات دلوقتي وأنت لسه تحت تأثير الصدمة والمشاعر السلبية، وانتظر التنسيق وممكن تشوف تنسيق العام الماضي هيعطيك مؤشرات للكليات اللي أخدت من مجموعك، وإن شاء الله تلاقي من ضمنها كليات كويسة أو ومجالات مكنتش عامل حسابها ممكن تفتح لك طريق جديد في حياتك. اعمل قائمة بالكليات وابحث عن معلومات عنها وشوف إيه الأنسب لما التنسيق يفتح إن شاء الله. وربنا يوفقك في كل حياتك.
لعرض الإجابة في فدني اضغط هنا