السلام عليكم
انا أم عندي 50 سنه معايا ولد وبنت
البنت عندها 14 سنه والولد 12 سنه، قبل ما يتوفى ابوهم
الله يرحمه قالي انه عايز يحط مبلغ في البنك للبنت عشان تتعلم بيه وأجهزها بيه بس انا قلتله متحطلهاش وانا
مش هخليها تحتاج حاجه هو وافق، احنا ساكنين في بيت ملك فأنا اقترحت عليه اننا نبني الدور التاني لإبني ونعمله شقه فيه هو وافق وعملنا الشقه ومفاضلش
غير السيراميك والدهان فقط، احنا صبّناها وابني كان عنده تقريبا 8 سنين، وجهزنا باقيها من كم شهر كده،، والشقة اتكلفت كتير بصراحه،،
قبلها بسنه ابني قالي انه عايز موبايل جبتله موبايل، بعدها قالي انه عايزة عجله (دراجه)
زي ابن خاله، جبتهاله، وبنتي دلوقتي عايزاني اجبلها تابلت
عشان هي داخله اولي ثانوي السنه الجايه، بس انا مرضيتش
وقولتلها معاكي موبايل، هي معاها موبايل خالها جايبهولها
وانا كل شويه بهددها بيه ان لو مسمعتش كلامي هبيعه
مع ان تمنه دلوقتي بعد ما بقي مكسر ميجبش الف جنيه،
وكذا مره اشيله منها، وقلتلها لو خرب مش هصلحه وهو تقريبا قرب يخرب،،،، المشكله انها من سنتين تقريبا قبل
ما يتوفي ابوها لما كنا قاعدين نتكلم وهو قالي عايز يحطلها فلوس بأسمها هي سمعتنا ومن وقتها كل ما تقولي علي حاجه وانا ارفض تقولي كده وتقولي الفلوس اللي عملتي بيها لابراهيم كانت المفروض ليا، انا عملت كده ليه عشان اضمن مستقبله،، مش بتروح دروس عشان عايزاني اجبلها طقمين خروج وانا رفضت وتقريبا مراحتش اي درس، الكتب الخارجيه مجبتلهاش والاله الحاسبه كمان،، كل شويه تقولي
انتي ظالمه وانا مش مسمحاكي، انا بضربها عالطول لما مش
بتسمع كلامي وبقارنها بباقي البنات،، بس بعمل كده عشان
تبقي زيهم، ابني الكل بيشتكي منه انه بيسب الدين ولسانه
طويل وهي لما بتسمع كده. بتقولي اخيرا حد عرف ابنك
علي حقيقته، كل شويه تقولي انتي مش امي ابراهيم بس
اللي ابنك، لاني بضربها ومش بضربه، كل يوم تحلم اني
بضربها واني دبحتها بالسكينه وانا بقولها ده وسواس لانك
حاطه في بالك كده، بقيت مبتحسش باجي اضربها مش
بتتحرك ولا بتدافع عن نفسها ولا حتي بتعيط ولا بتجري
زي الاول،، مش بتزعل مني مهما ضربتها واتخانقت معاها يعني بقي عندها تبلد عاطفي،، هي رجليها
واجعاها ومحتاجه عمليه ب 19 الف فيها لان الدكتور
قال ان معملتهاش بمرور الزمن حركتها هتقل تدريجياً
وده اللي بيحصل الان، ابوها قبل ما يتوفي جبلها حلق
4 جرام ففمره كانت اختي عندنا فقلتلها لو عايزاني
اعملك العمليه هاتي الحلق ابيعه واعملهالك، هي ضحكت
وقتها بس بعد ما مشيت اختي، عيطت واتخانقت وقالتلي ليه تقولي كده قدام حد والعمليه انا مش عايزه
اعملها لانك عايزة تاخدي مني حقها كأني مش بنتك زي ابراهيم،، انا قلتلها خلاص متعمليهاش، عدي علي الكلام
ده شهر ورجليها بقيت تعباها اكتر وحركتها بدأت تقل قولتلها
هعملهالك قالتلي والله ما هعملها حتي لو ببلاش والان هي رافضه تعملها وكل شويه تقولي انتي ظالمه وانا مش
مسمحاكي وانتي وهو بتكرهوني،،، انا مره قلتلها انتي كافره، لانها مكنتش بتصلي بانتظام وكان عمرها وقتها 12 تقريباً،، قولتلهاانتي مريضه نفسيا ومجنونه، وفعلا من سنتين روحت
كشفتلها عند دكتور مخ واعصاب لاني شكيت انها
كده، بس النتيجه طلعت سليمه ومن وقتها وهي بتقولي
اني ظالمه واني زي ما عملت ليها اعمل ليه هو كمان، وانا
قلتلها ان ابني مش زيها، هو عاقل ومؤدب مش زيها،
دلوقتي عايزة اعرف هل انا ظالمه زي ما بتقول ولا لا؟؟
آه انتِ ظالمة لأبنتك جداً ولأنك مش عادلة بين بنتك وابنك هتاحسبي علي كده قدام ربنا وبعدين عاوزاها تصلي كيف وهي متلقيه منك المعامله دي الأم الي مفروض تكون قدوه في الحنان والأخلاق بتعاملها كده فا إزاي هتسمع كلامك وهتصلي وكل الحال ده بسبب عدم الإهتمام بالدين والقرب من ربنا لو كنتي كأم فاهمه دينك كويس كنتي هتعرفي إن الرسول قال ((اتقوا الله واعدلوا بين اولادكم)) وقال عليه الصلاة والسلام لما سأله بشير بن سعد أن يعطي النعمان ولده غلامًا قال: أعطيت ولدك كلهم؟ قال: لا، قال: اتقوا الله واعدلوا بين أولادكم وأراد أن النبي يشهد فقال: إني لا أشهد على جور سماه النبي جورًا. والعدل هنا ينطبق عليه معنيان العدل مادياً وشعورياً يعني توازني الحب عليهم بتساوي أيضاً ودا قول الإسلام في ذالك فا المطلوب منك تتأسفي ليها وتحاولي تعطيها الحنان الي ما اديتهولهاش زمان هيبقا صعب تتقبله دلوقت آه بس دا تكفير عن الي عملتيه عشان لما تتوفي متلاقيش نفسك عذبتي في النار بسبب ظلمك لبنتك وحاولي تديها حنان أكثر من اللازم دلوقتي عشان انتِ اذتيها نفسياً كثير والأذى النفسي اقوى بكثير من الجسدي ووديها العمليه غصبن عنها عشان متندميش انتِ بالآخر
تم النشر الثلاثاء، ٩ ديسمبر ٢٠٢٥
لو مكنتش قولتلها هاتي الحلق عشان اعملك وقدام حد كمان كان ممكن توافق تعمليها انتي معدلتيش بينهم وميزتي اخوها عنها وهي عمرها ما هتسامحك وأكيد جوزك مش هيسامحك مش عشان الولد يبقي ف اعتقادك انك تأمني مستقبله ماهي كمان بنتك انتي مش جايبها من الشارع روحي استسمحيها وعوضيها باللي نفسها فيه واحب اقولك حسابك عند ربنا كبير وانتي أم جاحدة اوي على بنتك اطلبي منها السماح واتأسفي ليها وخلي كلامك صادق ومهما رفضت على العملية خديها غصب ووديها تعملها من معاكي وعشان تثبتي لينا انك هتعمل من غير معتمدين جنيه منها لو فمقدرتك هاتيلها هدية دهب خاتم مثلا او موبايل وكذا طقم مش اتنين بس زي ماهي عايزة يا كده يا هتفضل تحسبن وتدعي عليكي فحياتك ومماتك بدل ماتدعيلك وتكره اخوها وكمان انتي مدلعة اخوها زيادة عن اللزوم وانتي بنفسك عارفة انه لا محترم ولا متربي وبكره هو ومراته هيردولك اللي عملتيه فبنتك أضعاف مضاعفة ويطردوكي من ملكك
تم النشر الثلاثاء، ٩ ديسمبر ٢٠٢٥
هي مفتقده ابوها جدا اوي خلي بالك لأنه كان الحنان كله اقعدي مع بنتك و قوليلها انا ظلمتك و بوسي علي راسها واديها و خليها تسامحك لان لو معملتيش كدا بعد ما تموتي هتشبعك دعا عليكي وقوليلها الشقه ده بتاعتك انت و اخوكي مش بتاعت اخوكي وبس وحاولي ترضيها ب موبايل جديد وحاولي تأجري الشقه ويكون ليها مصروف ول اخوها مصروف من الايجار وجزء تشليه علي جنب وسيبيلها الخاتم الدهب وحاولي تستلفي حق العمليه من خلناها وعمامها لحد ما تجمعي مبلغ العمليه وحاولي تعوضيها عن الحنان الي افتقدته من ابوها البنات حنينه اوي وصدقيني هتلاقيها هي السند اكتر من الولد بس اعدلي بينها وبين اخوها وخليهم يشاركوا معاكي في المسئوليه و شيليهم المسئوليه زعل البنات وحش جدا فا حاولي تحتويها
تم النشر الثلاثاء، ٩ ديسمبر ٢٠٢٥
وعليكم السلام. حسب كلامك وحسب رأيي ظالمة مع الاسف. انت عارفة وجع الاجرين هاد شو الي بخليه أسوء؟ الضغط النفسي والمعاملة الي عم بتعامليها لبنتك، .ابوها الله يرحمه فكر فيها وكان رحيم عليها، بس هي خسرت سندها وروحها، وكمان امها اجت عليها! وانت عارفة انو امراض الاعصاب جزء كبير منها مكتسب من المعاملة الي بواجهها الشخص بحياته؟ بكرا ابنك بتجوز وبتجيلك كنة ورح تضطري تعامليها احسن معاملة عشان ابنك حبيبك، والله اعلم شو بتكون طينتها ، وساعتها بتعرفي قيمة بنتك الي بين ايديكي. بس الخبر الحلو انه مفتش الاوان، غيّري معاملتك مع بنتك واعطيها الحنان وعامليها زي ابنك، البنات هني الي بيضلّو الحناين على الاهل بالغالب. وتذكري اذا ضليتي هيك تعامليها رح تصير تدوّر معاملة منيحة من الغرباء. غير المشاكل النفسية الي رح تسببيلها ياها. تمام الجنة تحت اقدام الامهات على عيني وعلى راسي ، بس زي ما في برّ الوالدين في برّ الابناء. والأبناء القصد البنات والاولاد مش بس الذكور يخالتي.
تم النشر الثلاثاء، ٩ ديسمبر ٢٠٢٥
لعرض السؤال في فدني اضغط هنا