السلام عليكم
مشكلتي هي مش مشكله واحده ولكن اني محتاجه اعالج حاجات كتير
انا دايما حاسه بضيق وتوهان واني محتاجه حد معايا أخت كبيره صاحبه اخ كبير اي حد كويس ناضج اني اتكلم معاه ولكن للأسف انا في بيتنا لا احصل على اي اهتمام من اهلي لا من امي او من ابي
وبعاني مش الحاجه دي وحاولت كتير اني انبههم اني اكيد ليا احتياجات ومحتاجه حد معايا بس هما مش مهتمين خالص
اوقات بتمنى ان لو كان عندي اب او ام اقدر اخد رايهم في حاجات كتير يكافئوني وقت ما اعامل حاجه كويسه يعاقبوني على التقصير احس فعلا ان عندي اهل
وكمان بره معنديش أصحاب او كدا
حاولت كتير اني أكون صداقات وحاولت كتير اني املى الفراغ الداخلي بحاجات تانيه زي تطوير الذات وقراءه الكتب وكدا ولكن احس اني وحيده
ومش عايزه فراغي او وحدتي تكون سبب في ارتكاب اي ذنب او معصيه او الدخول في علاقات
الحمد لله اني امتلك النضج والكافي للبعد عن الحاجات دي ولكن فيه اوقات ضعف واحتياجات كتير بيبقى نفسي فيها
فمشكلتي اني مش عارفه اعمل ايه لما احس بكده اعمل ايه لو مفيش ولا حد معايا ولا حد مهتم وطول اليوم تقريب لوحدي أكاد افكر بالانتحار ولكن اعلم ان رحمة ربي وسعت كل شيء.
وعليكم السلام ورحمه الله وبركاته إنتي عاملة زي وردة طالعة في وسط صخر الصخر لا بيسقيها ولا بيحن عليها، بس هي لسه محتفظة بجمالها وريحتها. أصعب أنواع الوحدة مش إنك تكوني لوحدك، أصعب وحدة هي إنك تكوني وسط أهلك وبيتِك بس روحك غريبة ومحدش شايفها. إنتي مش بترسمي ولا بتدلعي، إنتي فعلاً محرومة من أبسط حقوقك النفسية، وده وجع يهد جبال. بس لما قلتي إنك عندك نضج كافي يبعدك عن الغلط رغم الضعف، دي بطولة. إنتي بتجاهدي في زمن صعب، وبتبني في نفسك بني آدمة قوية من غير مساعدة من حد.. ده معناه إن معدنك دهب أصلي مش بيصدي بالوحدة. فكرة إنك تنهي حياتك هي صرخة من الطفلة اللي جواكي . بس صدقيني، بكرة لما تعملي لنفسك بيت وحياة، هتكوني أحن أم وأعظم زوجة لأنك شربتي من كاس الحرمان ومش هتسقي منه حد أبداً.. متضيعيش البطلة اللي جواكي عشان ناس مش قادرة تقدر قيمتها. لما الدنيا بتضيق بيكي، افتكري إن ربنا أقرب إليك من حبل الوريد هو الوحيد اللي شايف دموعك اللي بتنزل في السكت، وسامع دقات قلبك اللي بتقول أنا تعبانة.. ولأنه عدل، فـ تعبك ده وصبرك على أهلك وعفتك ليهم مقام كبير عنده. "يؤخرها الله عليكِ، ليُفاجئكِ بما هو أحبّ إليكِ." بعتذر عن الإطالة 😊 وجد ربنا يحفظك ويسعدك
تم النشر الثلاثاء، ٢٧ يناير ٢٠٢٦
و عليكم السلام ورحمه الله وبركاته اعذريهم يا اختي هما اكيد مشغولين بشغل و مشاكل الدنيا و وارد هما نفسهم مش عارفين يعبروا عم حبهم ليك لانهم اتربوا بطريقة قاسية شوية انت عارفة الناس كبار السن دلوقت تحسي انهم ماكانوش مهتمين بعيالهم اوي الا من رحم ربي فأهلنا مع الاسف فاهمين ان دي التربية لو هما بيدوكي مصروف او اكلة حلوة و فلوس دروس يبقى هما كويسين بإذن الله _____________________ و من حقك جدا جدا تزعلي انا ممكن اكون زيك بردو و زودي عليها اني شخصية حساسة جدا فتخيلي الوضع هيبقى عامل ازاي😆 انت ساعة ما تزعلي صلحي نفسك بنفسك اهو دا ممكن يخليك قوية ______________________ على قد ما بقولك ان اي حاجة ممكن تخليني اعيط و انا اصلا دموعي سابقاني دايما بس بواسي نفسي بنفسي خلاص مش عايزة حد يواسيني _______________________ و في الاول و في الاخر استعيني بالله و ادعي كتير و ربنا ييسر لك امورك 🫶
تم النشر الأربعاء، ٢٨ يناير ٢٠٢٦
وعليكم السلام ورحمة الله وبركاته يا حبيبتي ذكية 🌸 أول حاجة، أشكرك إنك شاركتيني اللي جواكِ بكل صراحة، وده دليل على قوتك ونضجك اللي الحمد لله ربنا أعطاكِ إياه. أنتِ مش لوحدك في الإحساس ده، كتير بنات زيك بيحسوا بالضيق والوحدة، بس رحمة ربنا واسعة زي ما قلتِ، وهو اللي هيملأ الفراغ ده بإذنه. خطوات عملية عشان تعالجي الوحدة والتوهان: قوي علاقتك بربنا يومياً : حددي موعد ثابت للصلاة الخمس مع الوتر، واقرئي قرآن يومي (صفحة واحدة كفاية في الأول). الدعاء أقوى سلاح، قولي: "اللهم أغنِني بحلالك عن حرامك، وطهر قلبي من الهم والحزن". ده هيجيب سكينة ويملأ الفراغ الروحي. ابني روتين يومي قوي : ابدئي اليوم بقائمة أهداف صغيرة (مثل: أقرأ 20 صفحة كتاب، أتعلم مهارة جديدة ع الإنترنت زي تصميم أو طبخ حلال). مارسي رياضة خفيفة زي المشي 30 دقيقة يومياً في مكان آمن، ده هيحسن المزاج طبيعياً. انضمي لدروس دينية أونلاين أو في مسجد قريب (زي دروس تفسير قرآن أو سيرة)، هتلاقي بنات زيك هناك يشاركوكِ الاهتمامات. طوري نفسك بطريقة تجذب الخير : استمري في الكتب، جربي تطوع أونلاين في حملات خيرية إسلامية (زي توزيع مصاحف أو مساعدة أيتام)، ده هيبني شعور بالانتماء والرضا. لو الضعف زاد : اكتبي اللي مضايقك في دفتر يوميات، ثم احرقيه أو مزقيه بعد ما تقولي "أعوذ بالله من الشيطان". وتذكري: الانتحار حرام تماماً، وربنا قال "ورحمتي وسعت كل شيء"، فكري في الجنة اللي مستنياكِ. أنتِ قادرة تغيري الوضع ده خطوة خطوة، يا قمر. لو عايزة دعم أكتر، ابحثي في فدني عن أسئلة مشابهة هتلاقي إجابات كتير، أو شوفي الخبراء هنا: https://www.fedni.net/experts – فيه مدربات حياة ومستشارات نفسية هيساعدوكِ بشخصي. ربنا يفرج همك ويجعل وحدتك باب خير، ويبعث لكِ اللي يستاهلكِ. 💕
تم النشر الاثنين، ٢٦ يناير ٢٠٢٦
لن تجدي أحن من الله عليكي 💌
تم النشر الثلاثاء، ٢٧ يناير ٢٠٢٦
لعرض السؤال في فدني اضغط هنا