ازاي يكون عندي شخصيه؟
الموضوع ده تعبني نفسيا اوي من صغري وانا بخاف ارد واتكلم انا حاليا دلوقت عندي 19 سنه وفي جامعه ومن كتر ما كل ال حواليا عمال يقولي انتي معندكيش شخصيه انتي غلبانه وكل ما اعمل حاجه او احكي حاجه مثلا اهلي يقولولي وعرفتي تكلمي اصلا عرفتي تعملي كده انتو فاهمني ؟ لحد ما وصلت لمرحله اني مش قادره اصدق اني في جامعه او اني كبرت بيشوفوني صغيره في كل حاجه
يمكن معاهم حق حتى لما ببقى مع صحابي مثلا في حاجه مضايقاني مثلا هحكي موقف لو في جروب وبنعمل بحث مثلا او تسلميات الجامعه ممكن هما يريحو ونا ال اعمل مبعرفش اتكلم اقول اي
في كل مواقف بقى حتى مثلا لما صحبتي تقولي انا مش هحضر كذا عشان مش عايزه اعمل برزنتيشين ودكتور يسألني بقول هعمل زيك عكس لو لقيت صحبتي تانيه بتقول لا انا هحضر
بقول انا هحضر يعني قرار مش طالع مني أنا مش قادره اثق في قراري ال باخدو ده سببه اي برضو انا حالتي غريبه اوي بشوف كل بنات بتعرف تتكلم وتتعامل لكن بحسني غريبه اوي
بقيت بكرهه اتعرف ع حد عشان اي حد يعرفني يقولي انتي غلبانه بحس اني ضعفي باين وبيشوفوني عبيطه ونا كده فعلا
مش بعرف اتعامل في اي حته مش نافعه في أي مكان انا مش عايزه افضل كده وخايفه افضل كده اي الحل ؟
بصى انا كنت زيك ف بداية الجامعة ودا شئ طبيعى جدا بس فى فرق بيننا انا ف البداية محاولتش انى اتغير على عكسك تماما بتدورى وتسالى ازاى تحلى المشكلة دى ف دا ف حد ذاته نقطة تتحسب لك تانى حاجة بخصوص المشكلة دى ف انا جربت طرق كتير وبجد اكتر حاجة هتنفعك انك تدبسى نفسك ف اى حاجة تجبرك انك تتعاملى وتتكلمى وتاخدى قرار لوحدك على سبيل المثال اولهم كان انى ابقى ليدر سيكشن ف بقيت بشكل يومى لازم اكلم دكاترة واظبط معاهم مواعيد واخد قرارات بخصوص السيكشن وبردو الناس بقيت تتعامل معايا اكتر لنفس السبب ف خلاص بقيت مجبر على كدا ولازم اعمل كدا غاية ما اتعودت و واحدة واحدة الموضوع بقى ابسط وهكذا شوفى ايه ممكن يجبرك تتعاملى مع ناس وتاخدى قرارات بنفسك واعمليه ومع الوقت هتتعودى خلاص
تم النشر الخميس، ٣٠ أبريل ٢٠٢٦
بصي الامر يبدو طبيعي الي حد ما لان الانسان عادي جدا يكتشف نفسه وشخصيته ويتعرف على نفسه وانتي لسه بتكتشفي نفسك الحل ببساطة انك تنزلي لوحدك كتير تتعاملي مع ناس كتير لوحدك تتعودي تعملي حاجات كتير لوحدك تركزي فقرارتك وتحسبي الي هيحصل بناء عليها يعني مثلا لو غبت هنقص درجات فمش هغيب مثلا مريضة مش هينفع أحضر هكذا
تم النشر الخميس، ٣٠ أبريل ٢٠٢٦
طيب ليه بجد تحطي نفسك في الضغط دا وحتى لو شخصيتك ضعيفة إيه الـ فيها دي مش كارثة بجد دي حاجة بتتبني وإن شاء الله مع الوقت هتكون شخصيتك أقوى وهتكوني متكلمة وواثقة من نفسك، يا غالية ياما شوفنا ناس كانت تظن إنهم ضعفاء ولكن سبحان الله طلع العكس، الموضوع محتاج منك تقبل وتعرفي إن مش كل لما تتعامل بتكون قوية ساعات كتير جدًا الإنسان بيخفي قلة الثقة والخوف، أنتِ محتاجة تتقبلي الموضوع وتمارسي أنشطة مع أصحابك وتسمحي لنفسك بالكلام وتقضي مثلًا بعض أمور بيتكم أنتِ بنفسك وتابعي التغيرات، وصدقيني الموضوع مع الوقت هيكون رائع وفي حاجات كتير جدًا في شخصيتنا ممكن تتغير، ممكن تحاولي مع نفسك وتتقبلي الحاجة دي وتعرفي إن مفيش حد كامل وتشتغلي على نفسك تسمعي بودكاست وتبدئي تشتغلي على شخصيتك وبجد أنا شيفاكِ قوية وأول دليل إنك كتبتي سؤالك عادي بكل ثقة🤍🫂
تم النشر الخميس، ٣٠ أبريل ٢٠٢٦
اتغيري تغير مفاجئ مع الكل عن طريق إنك ما تكونيش كتاب مفتوح للكل وقللي كلامك ،، وعلقي قلبك بالله لإن كل إنسان قلبه معلق بالله بتلاقي فيه عِزّه ويظهر عليه قوة شخصية بدون تكلف
تم النشر الخميس، ٣٠ أبريل ٢٠٢٦
كنت زيك كده يوم من ضمن الايام و دلوقتي بقوا بيقولوا يا ريت احمد بتاع زمان يرجع محدش بيعحبه حد اعملي اللي في دماغك و كبريها هترتاحي
تم النشر السبت، ٢ مايو ٢٠٢٦
اقعدي مع نفسك و اكتبي انتي عايزاه ايه و الصفات الي تحبيها في نفسك و الأشخاص الكويسة و فكري كويس و ارشحلك دكتور عماد رشاد هو دكتور نفسي عنده محتوي كويس علي اليوتيوب في العموم اهم شيء انك تستمدي ثقتك من نفسك مش من نظرة الي حواليكي
تم النشر الجمعة، ١ مايو ٢٠٢٦
لعرض السؤال في فدني اضغط هنا