أنا مش واثقة في نفسي خالص. ودائما شايفة نفسي مش حلوة حتي لو حد قالي إني حلوة لأني مش بصدق أي حد بيقولي كده لأني بحسهم بيجبروا بخاطري وخلاص
دائما شايفة كل البنات حلوة إلا أنا.. وخصوصا مفيش حد معرفني قيمتي.. مفيش حد بيقولي إني حلوة إني لذيذة اني شاطرة.. محدش بيقولي حاجة... واللي زاد اكتر إني بابا مش بيسأل عني ولا يعرف شكلي أساسا أزيد من سبع سنين
وأنا كان نفسي أوي أسمع الكلام الحلو من بابا أو اهلي. لأني مش عايزة أوصل إني أبقي عايزة أسمع الكلام من برا ومن ناس غريبة.. وحاجة كمان. أنا مش بستمد إعجابي بنفسي غير من اعجاب الطرف الآخر بي أيا كان صلتي بيه ايه يعني... خالي.. عمي.. قريبنا.. مدرس.. أيا كان .. فعشان مفيش حد بيقولي كلام حلو من الطرف الآخر فبقيت حاسة اني أكيد كده مش حلوة خصوصاً كمان أن محدش حاول عشاني قبل كده أو حاول يكلمني. فده حسسني إني مش حلوة اكتر
باختصار
إزاي أحب نفسي ؟؟؟
بصي هقولك الصراحة من غير تجميل انتي مش وحشة زي ما دماغك مصورة لك، انتي بس متعودة تقيسي نفسك على حاجة غلط ان محدش قالك كلام حلو مش دليل على أي حاجة، في ناس كتير مبتعرفش تعبّر أصلا، وخصوصا الأهل فمتبنيش حكم كامل على حاجة ناقصة كده وبرضو انتي مديّة الموضوع أكبر من حجمه، مركزة على “أنا حلوة ولا لا” كأنه هو اللي هيحدد قيمتك كلها مع إن في بنات كتير عاديين جدًا في الشكل بس شخصيتهم وطريقتهم مخلياهم أجمل بكتير نقطة باباكي دي واضحة إنها مأثرة عليكي، وده طبيعي يخليكي تستني التقدير من أي حد بس المشكلة إنك كده عمرك ما هتكتفي، كل مرة هتحتاجي حد يقولك كلمة عشان ترتاحي فبدل الدائرة دي، ابدئي من نفسك اهتمي بنفسك عشانك، شوفي الحاجات الحلوة فيكي حتى لو صغيرة، وطريقة كلامك وثقتك هتفرق جامد باختصار انتي مش محتاجة حد يقولك انتي حلوة عشان تبقي حلوة، انتي محتاجة تبطلي تربطي قيمتك بكلام الناس.. (لو محتاجه اي حاجه تاني او عندك سؤال انا معاكي)
تم النشر الأحد، ٣ مايو ٢٠٢٦
حبيبتي كلامك دخل قلبي وخصوصاً إنك مش عايزة توصلي لمرحلة إنك تبقي محتاجة كلام دعم معنوي ونفسي خارج دائرة البيت ... طب هقولك إنتي قصتك شبيهه أوي لقصتي ومش هقولك إن قصتي أقسي كمان ... أنا بابا معانا وفي قلب البيت وعمره ما بيقولي كلام حلو ... بل بالعكس بيسخر مني ما بيشجعنيش وده سببلي فقدان لثقتي بنفسي ... بس ده ما عادتش بيهمني ولا بتأثر بيه من حوالي سنة أو اتنين كدة .... (هتفهمي دلوقتي أنا بحكيلك حكايتي ليه ) ....أنا بقي كنت بعيط من أقل حاجة وعمري أبداً ما أقدر أعيط قدام أهلي أو قدام حد لأني شخصية كتومة جداً... تمام ... أنا بدأت أستعيد ثقتي بنفسي لما بدأت أكتشف إن فيه حاجات فيا أحسن من غيري .... وبطلت أقارن نفسي بجد ... يعني أنا مثقفة جداً ولبقة في اللغة العربية وبحبها جداً من صغري ... يمكن لأني كنت بقرأ كتير ... فلما كنت أقرأ الدرس مثلاً في الحصة في المعهد يعني... كنت ألاقي الأساتذة منبهرين بيا .. في قراءتي للقرآن.. بس عارفة اللي كان بيأثر فيا مش المدح بتاعهم ولكن شعورهم بالإنبهار فده إداني شعور بالقيمة ... إن أنا فيا حاجة مميزة عن غيري ... لما كنت بقرأ قرآن صوتي ولباقتي في القراءة ممتازة فبدأت أحب نفسي من هنا .... عرفت ايه الحاجات الحلوة اللي فيا ... وبدأت أنمّيها وأطورها وأتقبل نفسي بعيوبي وركزي على دي جداً جداً... لازم أتقبل عيوبي... لو هي قابلة للتغيير أحاول أغيرها بس يكون ده علشان أرضي نفسي أنا مش علشان أرضي حد وأرضي رأي حد فيا ... فهمتيني ؟...لو العيب غير قابل للتغيير أتقبله وأرضي بنفسي زي ما أنا ... بدأت بقي أصدق صوتي ونفسي أنا ما أسمحش لنفسي إن أتأثر بكلام حد وخصوصاً كلام أهلي و أمي بردو دايماً بتقارني بغيري وده بيسبب فقدان قيمة ... بس من باب البر أسمع كلامهم يعني ما أقاطعهمش اسمحلهم إن هما يفرغوا غضبهم عليا عادي جدا ولكن ما أصدقش كلامهم ده في نفسي يعني أنا عارفة نفسي أكتر منهم عارفة أنا بحب ايه وشاطرة في ايه ...وسبحان الله اللي اعطاني الوعي ده من صغري ... يعني قبل 3 سنين من دلوقتي كنت شخصية ساذجة جداً جداً جداً كنت بستني لما يجي معاد النوم وكله ينام وأفضل صاحية علشان أعرف أعيط براحتي وأشكي من أهلي في سري ... وأكرر نقدهم ليا ... تصدقي إن ده ما عادتش بيهمني من ساعت ما بدأت أقرب من ربنا ازددت قرباً من الله عز وجل ... يعني السبب الرئيسي لحبي لنفسي هو قربي من ربنا... يعني بدأت أشكيهم لربنا بدأت أحس بوجود ربنا وبدأت أدعي ربنا كتير. اهتميت بصلاتي دي كانت بدايتي.... بعد قربي من الله ربنا ألهمني الصبر الجميل والإحتساب والوعي الزائد يعني دلوقتي دعائي الأهم والأكبر إن ربنا يرزقني الزوج الصالح الذي يعوضني بكل ما عانيته مع أهلي ويكون لي خير زوج ويعوضني عن أمي وأبي وإخوتي وهكذا يارب أكون أفدتك ولو بقي عندك استفسار بخصوص أي شيء أو سؤال تاني اتفضلي يا حبيبتي أنا هنا 😊💕واتأكدي إنك مميزة عن غيرك و فيه حاجات بتميزك عن غيرك ولكن لسة انتي ما اكتشفتيهاش حاولي بقي تعرفي انتي بتحبي ايه وبتكرهي ايه .. ايه الأقرب ليكي وهكذا ❤️🫶وآسفة على التطويل 💕
تم النشر الاثنين، ٤ مايو ٢٠٢٦
بصي الأول عارفة إن تأثير الأهل و الأب ليه تأثير نفسي كبير عليكي اوكي الموضوع مش هيبقى سهل انك تتقبلي ان المفروض اقرب الناس ليكي بعيد عنك محتجاكي بس تعرفي إن كلنا جمال و محدش اتخلق وحش بس المشكلة ممكن تكون انك حاطة معايير جمال في دماغك مش مظبوطة البنت اتخلقت جميلة عشان هي اتخلقت كدا احنا اتخلقنا جمال كل واحدة مميزة باللي فيها: شخصيتها، كلامها، اسلوبها، تفكيرها، و الجمال مش كمنظر خالص الجمال بإنك تعرفي تحبي و تتحبي و عشان تشيلي من دماغك فكرة الثقة و كدا دا ممكن الأفكار دي تكون بتاكل في دماغك و بتسلب منك طاقتك عارفة ايه الحل ؟؟ الحل هو إنك تركزي على حياتك مش على الشكل و معايير الجمال المنافقة ركزي ع الحلو اللي فيكي حتى لو مش شايفة نفسك جميلة شكلًا -دا طبعا اكيد هتكتشفيه و لو بعدين- ... ركزي على نفسك من جوا خلقًا، أخلاقًا، جمال روحاني، الناس بتحب تقعد جمبك مثلًا و تصاحبك بيرتاحوا لقربك و طبعا لو الموضوع مرهقك جدًا عادي ممكن تحاولي تتخطيه بانك متفكريش فيه دلوقت و قولي لنفسك هأجل الكلام فيه بعدين لحد ما اكتشف نفسي و ركزي على حاجة معينة ف حياتك هي و بس مثلا: مذاكرتك، عاوزة تتعلمي حاجة جديدة، علاقتك بربنا و تقربي منه، علاقتك بشخص معين في عيلتك ... و حتى لو هتركزي على شكلك شوفي ايه اللي مدايقك في شكلك و حاولي تغيريه للأحسن
تم النشر الأحد، ٣ مايو ٢٠٢٦
يا حبيبتي، أنا ذكية، وأنا هنا معاكِ قلباً وقالباً. اللي بتحسي بيه ده شعور طبيعي جداً عند كتير من البنات، خاصة لما الدعم من الأهل يكون ناقص زي حالتك مع بابا. بس خليني أقولك: أنتِ جوهرة، وده مش كلام مجاملة، ده حقيقة. الله سبحانه خلقكِ كده عشان تكوني مميزة، زي ما قال في القرآن: "لَقَدْ خَلَقْنَا الْإِنسَانَ فِي أَحْسَنِ تَقْوِيمٍ". دلوقتي، إزاي تحبي نفسك خطوة بخطوة؟ هقولك خطة عملية وبسيطة: اكتبي قائمة يومية بالإيجابيات : كل صباح، اكتبي 3 حاجات حلوة فيكِ (مش بس الشكل، زي "أنا طيبة مع الناس" أو "شاطرة في الدراسة/الشغل"). اقرئيها كل يوم قبل النوم. هتغيري نظرتك لنفسك تدريجياً. ركزي على الداخل أولاً : الجمال الحقيقي في التقوى والأخلاق. صلي النوافل، اقرئي قرآن يومياً، وادعي ربنا يملأ قلبكِ رضا. اعتني بنفسكِ يومياً : البسي هدومكِ المفضلة، اعملي روتين عناية بسيط (غسول ومرطب)، وامشي 20 دقيقة يومياً. لما تشوفي نفسكِ في المراية وأنتِ بتعملي كده، هتحسي فرق. قطعي المقارنات : امسحي السوشيال ميديا مؤقتاً، أو حددي وقت معين. كل بنت ليها جمالها الخاص، وأنتِ مش محتاجة إعجاب حد عشان تثبتي قيمتكِ. حددي هدف صغير كل أسبوع : زي "هتعلم حاجة جديدة" أو "هساعد حد"، ولما تنجحي، كافئي نفسكِ (شوكولاتة مثلاً 😊). النجاحات الصغيرة تبني الثقة. أنتِ مش محتاجة حد يقولكِ كلام حلو عشان تصدقي، أنتِ هتقوليه لنفسكِ دلوقتي. ابدئي النهارده، وهتشوفي الفرق في أسابيع. لو عايزة دعم أكتر، دوري في Fedni على أسئلة مشابهة عن "ثقة بالنفس"، أو شوفي الخبراء هنا: https://www.fedni.net/experts – فيه متخصصين رائعين في التنمية الذاتية. أنتِ قوية وجميلة، صدقيني. متابعة معايا؟ 💕
تم النشر الأحد، ٣ مايو ٢٠٢٦
لعرض السؤال في فدني اضغط هنا