انا حاسة إن في جبل على قلبي من كُتر الزعل والله قلبي بيتحرق ومش عايزة اخد وقتي في الزعل عشان بيصعب عليا الايام اللي ضاعو مني في العياط.
انا بحب اضحك وبحب أبققى مبسوطة وبحب اعيش وأجرب بس بجد مش قادرة استحمل زعلي ولا وجع قلبي تاني ومش عايزة أحكي لحد لأني عارفة اني مش هستفيد بحاجة ولا هرتاح
انا برتاح بس لما بعيط وانا عيطت عياط معيطتهوش في حياتي وبرضو مش عارفة ارتاح وحاسة اصلا محدش هيفهمني وطول الوقت عمالة ادعي ربنا يخليني أنسى وابطل احبه بس بلاقي نفسي لسة بحبه وعايزاه رغم كل اللي حصل وبجد حاسة اني مش واثقة في نفسي ولا بحب نفسي عشان قابلة اني احب واحد اذاني
السلام عليكم، أولا، هو إيه المشكلة لما تبكي أو تاخدي وقتك في الحزن؟ مش وقت ضايع خالص... أنتِ بتتعافي نفسيًا عشان توفري وقت كبير مستقبلًا. مش هتبكي أو تحزني دلوقتي، يبقى هتراكمي مشاعر جواكِ وهيفضل الماضي فوق كتافك والآثار النفسية معطلاكِ ومانعاكِ تعيشي حياتك صح. ** خدي وقتك، بس برمجي عقلك وافهمي إنك مش بتاخدي الوقت ده تضييعًا على شخص لا يستحق. أبدًا، الوقت ده عشانك أنتِ، عشان نفسك تستحق. عشان ده جزء من الثمن اللي لازم يندفع عن خطأ ارتكبتِه عن حماقة أو قلة وعي أو حتى عمدًا. ** خدي وقتك عادي، بس افهمي إن الوقت ده مش بتقضيه كده فاضية. لأ، بتستغليه وبتعيشيه حتى وأنتِ نفسيتك محبطة أو مش قادرة تنجزي... نفسيتك محبطة، استغلي الوقت ده في الرسم أو في مهارة تتعلميها بتفرغ طاقة سلبية أو اكتبي ونمي مهارة الكتابة أو استغليه في قراءة تخفف حالتك. مش قادرة تنجزي، اعملي حاجات سهلة تعطيكِ شعور بالإنجاز كل يوم وتحسي بدفعة ولو خطوة بسيطة. ** آخر حاجة، شيلي من دماغك خالص كرهك لنفسك عشان لسه متعلقة بشخص آذاها. دي حاجة نفسية، زي أي إدمان أو تعود بيحتاج وقت عشان ينتهي، وحتى لو غلطتِ وحبيتِ شخص لا يستحق فتعاملي مع نفسك إنها نسخة قديمة منك أصغر وأقل نضجًا محتاجة تحتويها وتسامحيها على اللي فات عشان تركزوا في اللي جاي. *** قربي من ربنا وركزي في عباداتك وحياتك والوقت هينسيكِ كل ده متقلقيش. ربنا معك.
تم النشر السبت، ٢٧ سبتمبر ٢٠٢٥
بالعكس أما بتحكي بترتاحي طبعا اتكلمي واحكي وعيطي وخدي وقتك في الزعل عشان بعد اما تعملي كل ده بقي مش هتحسي بحاجه هتحسي أن كل الزعل راح أو ع الأقل قل شويه واكيد عمرك ما هتفضلي زعلانه ولا هتفضلي مبسوطه مهما حاولي ف ده طبيعي طبعا
تم النشر الاثنين، ٢٩ سبتمبر ٢٠٢٥
بصي عمومًا نسيانه تقبلي انه حاجة مش سهلة لانك اخد وقت ف حياتك اخد من تفكيرك ويومك وكل حاجة فخليكي هينة على نفسك واعرفي انه ده طبيعي مش اڤورة منك، بس ادي لنفسك وقت للحزن والتفكير فيه بعدين حاولي تفكري في حاجة مختلفة في يومك او اعملي حاجة بتحبيها وخدي شاور كتير ابدئي اسمعي سلسلة التعافي لدكتور عماد عثمان وارجعي ادي امانك لنفسك ربنا قادر بكرة يرزقك بشخص تقر بيه عينك وينسيكي كل حاجة بس الأول كوني الشخص ده لنفسك ربنا يرزقك يارب 💗
تم النشر الأحد، ٢٨ سبتمبر ٢٠٢٥
السلام عليكم احزنى بس على الوقت اللى ضيعتيه احزنى بس على المشاعر اللى طلعتيها فى وقت غلط وجابت نتيجة غلط احزنى على عدم استماعك لنصيحة الناس اللى قالولك بلاش وجهى حزنك صح عشان تقدرى تاخدى خطوات لقدام وتلاقى نفسك بتوقفى حزن
تم النشر الأحد، ٢٨ سبتمبر ٢٠٢٥
يا وردة، أولاً أحب أقولك إن اللي بتحسيه طبيعي جداً، والزعل وهموم القلب أوقات بيكونوا تقيلين جداً على النفس، خاصة لما تحسي إنك محبطة ومنكسرة من جرح ما زال في قلبك. أحياناً الألم النفسي بيكون أشد من الألم الجسدي، ومشكلتك وصعوبة التعبير عنها مخلية قلبك مزنوق وعليه "جبل" من الهمّ. خليني أقولك كام حاجة تساعدك تخطي المرحلة دي: اقبلي مشاعرك بدون حكم مش لازم تحاسبي نفسك لو زعلت أو انكسرت. مشاعر الحزن والألم جزء من شفاء القلب، ومافيش داعي تخونيها أو تمنعيها. ممكن تعطي لنفسك وقت صغير لتسبيح العياط وأعطي مشاعرك فضاء، وبعدين حاولي تمسكي أشياء بسيطة ترفه بيها عن نفسك. ما تخليكي وحيدة مع حزنك حتى لو ما حبيتيش تحكي لحد، ممكن تدوني فرصة إنك تتواصلي مع مُختص. أحياناً مجرد التحدث مع شخص محايد ومتفهم بيفرق كتير. الخبراء النفسيين في فدني متوفرين، وممكن يساعدوك تخرجي اللي جواكي بطريقة صحيحة. اجهدي في بناء ثقتك بنفسك إذا انكسرت ثقتك بسبب التجربة الصعبة، هذا طبيعي، لكن لازم تبدأي تشتغلي على إعادة بناء ثقتك وتقديرك لنفسك. في خطوات صغيرة ممكن تعمليها يومياً: مثلاً اكتبي نقاط قوتك وإنجازاتك حتى لو صغيرة، وذكري نفسك بقيمتك وكرامتك. ادعي ربنا بقلب صادق البركة في الدعاء واللجوء لله في كل حال. اطلبِ منه الصبر والسكينة، واستعيني بقوله تعالى: {فإن مع العسر يسراً * إن مع العسر يسراً}. اقرأي القرآن واعملي على ذلك كجزء من قوتك الروحية داخل الألم. حاولي تشغلي نفسك بحاجات بتحبيها سواء كانت قراءة، هوايات، أو حتى روابط اجتماعية صحية، املئي وقتك بيوميات فيها نور وأمل، مش بس لتنسي وجعك، ولكن لتقوية روحك. أنت إنسانة قوية لأنك بتعانين وتحاولي تواجهين، ومع الوقت والحب للنفس والرعاية الجيدة، القلب بيطيب إن شاء الله. لو حبيتي، ممكن أساعدك أوجهك لكبار الخبراء النفسيين في فدني حتى تأخذي دعم متخصص. ووردة، أنا دايماً هنا جنبك، ولو حبيتي تحكي أكتر أو تسألي أي حاجة، ما تتردديش. ربنا يخفف عنك ويبدلك فرح وسعادة. 💕
تم النشر السبت، ٢٧ سبتمبر ٢٠٢٥
لعرض السؤال في فدني اضغط هنا