السلام عليكم
بعد اذنكم ازاي اعرف قدراتي وازاي احط اهداف قدامي واحققها فعلا ويبقى عندي شغف
وعليكم السلام ورحمة الله وبركاته ازاي تعرف قدراتك؟ بأنك تحاول .. يعني مثلا لو انت محتار في عدة مجالات معينه ومش عارف هل انت هتبقى شاطر في (ٍس) او (ص) .. مش عارف تختار .. الحل هنا انك تجرب فيهم كلهم .. علشا تعرف انت كويس ف ايه ونجحت في ايه. ازاي تحط هدف قدامك وتححقه .. طبعا اي هدف بيبقى مرتبط بعدة شروط علشان يبقى الهدف ده قابل لتتحقيق. 1- ان الهدف بتاعك يكون واقعي وملموس يعني ايه هدف واقعي ؟ يعني يكون حقيقي فعلا .. ميكونش هدف بعيد او خيالي صعب انه يتحقق. 2- ان الهدف بتاعك يكون محدد يعني ايه محدد؟ يعني منقولش مثلا انا عايزة ابقى ناجحة .. تمام كويس ناجحة ف ايه بقى؟ لازم نكون محددين احنا عايزين ايه بالظبط. 3- ان الهدف يكون قابل للقياس قابل للقياس يعني الشئ اللي عايز اعمله ده، ينفع اقيسه، ينفع اعمل له خطة والتزم بيها، يعني لا يكون عائم .. معرفش مثلا اخد منه نتائج. 4- من الحاجات المهمة انه يكون محدد بزمن يعني هل ينفع اشتغل ع حاجه او بكون بذاكر شئ معين ومحددوش بوقت معين؟ لا طبعا الموضوع هلاقيه بيسحب مني وقت اكتر من اللازم وده شئ هيعوقني. 5- من الحاجات المهمة برضه ان الهدف بتاعنا يكون مرتبط ب اللي احنا عايزينه يعني ايه الكلام ده؟ يعني دلوقتي عايزة اخد كورس معين وليكن مثلا الجرافيك .. هسال نفسي سؤال انا باخد الكورس ده ليه؟ وعلشان ايه ؟ لازم يكون على صلة وثيقة ب اللي انا عايزاه بعد كده. ازاي بقى يبقى عندي شغف؟ يعني ايه شغف .. ؟ لو قصدك بالشغف انك تبقى مقبلة بقى كل يوم على الحياة .. بكل طاقة وحماس ف ده اوبشن في الحقيقة مش موجود ولا هيبقى موجود . انا مش بقفلها في وشك .. بس بقولك الحقيقة .. في الحقيقة الكلمة ديه بقت اساسا مكررة كتير جدا .. واستخدامها بالشكل ده على كل الالسنة بدون وعي معنى كده ان فيه خلل وخلل شديد كمان. انا مش مطلوب مني اني اكون رايقة علشان اعمل اللي ورايا او علشان اخلص التاسك الفلانية .. او علشان امشي في طريقي .. الشغف ما هو الا الشعله المحركة لا اكثر ولا اقل .. هل مطلوب ان الشعله ديه تبقى شغاله علطول .. في الحقيقة لأ هيجي عليها وقت وطبيعي ان الغاز ده يفضى .. ف هنعوز نملاه تاني وهكذا .. هو ده الطبيعي .. احنا على مدار يومنا اصلا بيحصلنا حاجات كتير من (ملل - ضيق - عصبية .. الخ) تأثرات كتير بتحصلنا هو ده الطبيعي للانسان .. اما الانسان يكون جواه دافعيه وحماس وكلام تنمية بشرية ده يعتبر نفخ ع الفاضي وفيك. واللي هيخلينا ملتزمين قدام اي حاجه احنا بنعملها هو شئ واحد فقط الالتزام والمسؤولية .. اننا نبقى ملتزمين قصاد الشئ ده .. مش اننا يبقى جوانا حماس!
تم النشر الخميس، ٣ أغسطس ٢٠٢٣
وعليكم السلام ورحمه الله وبركاته حدد أهدافك باهتمامتك في الحياة جرب كل شئ و بالأجتهاد والإرادة القوية لحد ما توصل لهدفك إذا وصلت لهدفك أصبح عندك شغف قوي تجاه هدفك أنك عندك دافع قوي لتحقيقه وكل ما تتقدم في أهدافك هتكتشف قدراتك
تم النشر الخميس، ٣ أغسطس ٢٠٢٣
اكتبي اول أنتي عاوزه تحققي اي ...شوفي اي متاح عندك واي الصعب لتحقيق الهدف دا .. خدي بالاسباب وادعي ربنا كتير ...واعملي جدول ليومك بكره وكل حاجه ليها وقت معين حد لو هتعملي جزء صغير ف اليوم بس يخلص بإتقان ومع ايام هتلاقي نفسك حققتي حاجات كتير المهم متتيأسيش من رحمه ربنا🤍
تم النشر الخميس، ٣ أغسطس ٢٠٢٣
لعرض السؤال في فدني اضغط هنا