كيف أصلح علاقتي بأمي؟

Question

أنا بحب أمي جداااا وفي نفس الوقت أنا علاقتي بيها وحشه أوي على طول في خناق وزعيق وضيق ولوم وهي بتعاملني بمشاعر برده غير عن كل اخواتي كدا عامة الموضوع من زمان فعادي بس المهم دلوقتي انا عندي ١٨ سنة وهي ٤٨ هي يمكن حياتها مكنتش أحسن حاجه ومعاشتش احسن عيشه هي واخواتها زمان بس بعد ما تجوزت واخواتها اتجوزوا اخواتها اتحسنت حياتهم وامي مش عاجبها وضع أبويا وهم على طول في خناق وزعيق ومشاكل وانا حاسه انهم مبقيوش يحبوا بعض بمعنى الكلمة ومستحملين بعض بالاجبار وامي معندهاش رضا بعيشتها نهائي دايما شايفه انها أوحش عيشه في اخواتها وانه اولادها اوحش اولاد علشان اخويا كان شاطر ومجبش مجموع هندسه وانا دلوقتي داخله على امتحانات تالته ثانوي ومبذكراش بس هي دايما حاسه بالقله مع انه اللي حصل ده عادي ميستدعيش انها تحس بالنقص بس المشكله دلوقتي اني انا حاسه انه احنا والاسرة كاملة السبب في ضيقها دايما بلوم نفسي على زعلها خاصة انه هي بتضحي وبتتعب أوي علشانا بقول كان المفروض اساعدها واشيل الضغط من عليها كان المفروض حققت حلمها وذاكرت علشان ادخل طب واشرفها كان المفروض اشيل مسؤولية البيت عنها بجد بقيت الوم نفسي ساعات بقول هي السبب من زمان مشيلاني مسؤولية حياتها وعدم رضاها وبقول وانا مالي وبعدين ارجع اقول انا انسانه ماستهلش بعد ما هي عملت كل حاجه علشاني هل متستحقش اعمل حاجة علشانها هي حالتها النفسيه وحشه أوي عدم رضا على زعيق على ضرب اخواتي الصغيرين لأسباب تافهة ومش عوزاهم يخرجوا من الاخر تربيتها ليهم غلط كنت بتدخل الاول وبزعق معاها دلوقتي قلت مش هتدخل تاني لانه كدا بعقها ومش بيجيب معاها نتيجه الكلام غير انه علاقتنا وحشه أوي بجد مش عارفه اعمل اى معاها ولا مع لوم نفسي المشكله كمان اني بحاول أكون ام لاخواتي حاسه اني بدأت اتخنق ساعات بقول خليكي حنينه خاصة انه اخواتي اتنين أطفال وواحده كبيره اصغر مني بكام سنه وواحد كبير بس بدأت اتخنق واقول مش لازم اكون حنينه واتحملهم هم هيعانوا بس هيكبروا ويبقوا زيي وهتنتهي كل حاجه بس انا مش قادره أشوف نفسيتهم بتتئذي وافضل ساكته ومساعدهمش لاني بحط نفسي مكانهم وبقول حرام وبرضوا بلوم نفسي والله تعبت من نفسي

Accepted Answer

ازيك ياجميلة يارب تكونى بخير وف احسن حال ديما 🌸 مشاعرك جميلة جدا وحاسة بيكي وقد ايه انتى حابة تكونى بارة بمامتك وتعوضيها عن كل اللى شافته او كان نفسها تعيشه وما قدرتش ، وف نفس الوقت بتشيلى مسئولية انه اخوات الاصغر ما يعانوش واو يحسو بحاجة مش حلوة ، زى ما قولتي بتكونى ليهم ماما لحد ما انت زهقتى ، وبردو بتلومى نفسك . الحقيقة اللى حابة اقولها لك ، انه انت محتاجة تفكرى ف نفسك شوية وتشتغلى على نفسك انه ازاى تكونى انجح لنفسك قبل اى حد ،انتى قولتى انه داخلة على امتحانات ثانوية ودا تحديد مسار حياتك اللى جاية ، تعتقدى كتر شيلك حمل انه نفسية اللى حواليكي تكون احسن ، دا مش دورك ، دورك نفسك اولا ، دراستك هى مسئوليتك دينك وتنمية ذاتك ، ولو قدرتى انه تساعدى بجزء بسيط من طاقتك تمام مش بكل طاقتك ، محتاجة تفهمى انتى بتعملى كدا خوفا من الامتحانات ولا طول الوقت كدا ، لانه وارد جدا دا يكون بسبب قلق وتوتر الامتحانات وضغط المذاكرة لو اجابتك كانت انه طول الوقت كدا ، ف محتاجة تركزى بطاقتك على دراستك وفك توترك وقلقك ، وتقدرى تعملى دا بكذا طريقة لو حابة ابعتلك . بس خدى قرارك وافهمى مشاعرك صح . بالتوفيق 🌸

Answer

طيب اهدي خالص متضغطيش علي نفسك بليز انتي جميله وبتعملي الي عليكي وعايزه تساعديها فعلا بس مش عارفه وحسه انو ملوش فايده عندك حق ممكن الحوارات كتير عليكي وملكيش زنب تعيشي فكل ده لوحدك واكنك اتحطيتي قدام الأمر الواقع والمسؤليه عليكي عشان الكبيره بس متتعبيش نفسك واعرفي انو اكيد ربنا معاكي ادعي ربنا يهدي الحال وصلي واقرئي قرآن حاولي تتكلمي معاها مره واتنين ممكن هي فعلا محتاجه لكلام بسيط حصن خروجه إو انها تخرج من مودها ساعات الأمهات بظروف المجتمع والحياه بيشيلوا كل الهم ف ممكن المشاكل والحياه مع باباكي عاملها خنقه وممكن هي مقدرتش تقف قدام كل دول وتصمد وبتعمل كل ده كرد فعل للغضب الي جواها والي هي بتعيشه شوفي وقت تبقي هي هاديه فيه خالص مش بتعمل حاجه حاولي تتكلمي معاها حتي لو علاقتكوا مش أحسن حاجه خلي بالك من اخواتك اشرحيلهم انو ممكن تكون الفتره دي صعبه علي مامتكوا ف هي بتتعصب اوقات عشان يشوفوها بصوره احلي خاولي انتي تدلعيهم شويه استعيني بحد بردو عشان متعشيش كل ده لوحدك دي افضل حاحه تعمليها ممكن حد كويس من خالاتك اتكلمي معاها من غير علم مامتك حتي اتكلمي مع باباكي أنو يحاول يبقي هادي شويه معاها قوليوا انها تعبانه نفسيا او لو ينفع وفي مجال اقترحي عليهم فكره البعد في اباء وامهات كتير بيعملوا كدا لو بجد وصلت حياتهم لخناقتت كتير زياده عن اللزوم ده بيبقي افضل حل ولا طلاق حتي ولا بتاع بس لو يبعدوا شويه بس يفضل يمر عليكوا عادي ومع كدا متتعبيش نفسك حاولي تريحيها معلش عشان يتردلك فاولادك ان شاء الله وصدقيني ربنا شايفك وهيعوضك متضايقنيش نفسك واهم بقي من كل دا دراستك ركزي فيها اوعي تشتتي نفسك فحاجه دي أهم فتره ف ثانويه عامه ركزي فيها الأول وهدي نفسك ♥️

Answer

انا احكي على صراحتك و قوة إرادتنا. احساسك تجاه والدتك ده طبيعي جدا و حبك ليه ده حب بالفطره. لكن انا عايزه احلل كل جزء من المشكله: اولا: علاقة والدك و والدتك ببعض دي حاجه مش بتاعتك و ملكيش يد فيها و هما اكتر اتنين اللي لازم يحددوا شكل العلاقه بس لازم يعرفوا انها بتأثر عليكي انتي و اخواتك ثانيا: علاقتك بوالدتك لازم تعرفي انها مضاربه نفسيا و غير سويه و حقيقي محتاجه مساعده من متخصص علشان كده انا مش عايزاك تيجي على نفسك دايما في محاولة إرضائها لكن طبعا تتعاملي معاها كويس و تحاولي تحتويها ثالثا: جلد الذات ده أكبر سلاح مدمر للنفسيه فلازم توقفي لومك المستمر لنفسك لان مفيش في ايدك حاجه تغيريها متضغطيش على نفسك انتي لسه صغيره و قدامك حباه طويله و لازم تفكري في مستقبلك خصوصا انتي ثانويه عامه حاولي تلحقي الوقت اللي فاضل علشان تحققي حلمك مش حلم والدتك والدتك بشر و طبيعي ليها اخطائها و خفقاتها فلازم تتقبليها لكن من غير ما تتنازلي حاولي تقربي منها بكلام حلو تساعديها تتكلمي معاها بس تاني بأكد منوغير ما تضغطي على أعصابك اما بالنسبه لاخواتك حاولي تكوني ليهم العوض خديهم في حضنك اعملي معاهم اللي انتي نفسك والدتك تعملوا معاكي المهم في كل ده متخسريش صحتك النفسيه و متخسريش نفسك ... انتي اولا و بعد كده اي حاجه تانيه تيجي

كيف أصلح علاقتي بأمي؟

نفسية

اجتماعية

أهل

سؤال من احد أعضاء فدني

تم النشر الاثنين، ٩ يونيو ٢٠٢٥

4 إجابة

12 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك