انا عيشت طول عمري نفسي اعرف يعني اي حب طول فتره طفولتى كانت وحشه جدا وكنت بتعامل بقسوه من والدى ربنا يديله طوله العمر ضرب واهانه ومكنش فيه حب، اما كبرت ودخلت علاقه اديت فيها مشاعر وحب وكل حاجه حرفيا وكنت بحس انى لو بعدت عنه هموت ووالله طول م انا معاه كان مالى عيني وقلبي وعمري م جيت عليه لحد م اهلى طلبوا منه يتقدم وهو رفض علشان لسه مش جاهز فمن هنا حسيت انه مش بيحاول علشاني
وحاولت معاه كتيير بس اما حسيت انى باجى ع كرامتي بعدت لحد م اتخطبت، اتخطبت لشخص اكبر منى ب 16 سنه دكتور ف الجامعه كان بالنسبالى مثالى وعاقل وناضج جدااا وكان روحى فيه كنت باجى ع نفسي كتير اوى علشان ارضيه وكان بيتلكك ويتقمص ع اتفه الحاجات وانا اصالحه قالى ف مره انه مش بيثق ثقه كامله في الناس حتى انا وكان عنده 5 اخواته كان مقاطعهم كلهم ماعدا واحد
وحاول يقطعنى من اهلى مره يعمل مشكله مع اختى ويعملها بلوك وهكذا، مره قولتله بهزار انت فقدت الذاكره وكنت بضحك والله فضل يومين مش بيكلمنى ومقموص بسبب الكلمه دى، غير انه كان حريص اوى ع فلوسه لدرجه ان بابا كان بيعمل عمليه جه وعد اللى ف الاوضه وشاف اللى عايز عصير واللى مش عايز ونزل جاب 8 اكياس بالعدد للى كانوا عايزين بس
كنا بنزعل زعل تافه والله ويفضل زعلان وساكت باليومين والتلاته ويرد عليا رد بادر جدا ف حسيت انى مش هقدر استحمل ده، كل مره كان بيسيبنى لدماغى كنت بفضل افكر كتييير اوى لأن عندى تعلق قلق ونبهته ل ده كذا مره وهو مكنش بيستجيب لحد م فسخت الخطوبه
بعدها بشهرين حاول تانى وقالى انا اتغيرت والله ومش قادر اعيش من غيرك ف رجعتله
فضل حوالى شهر كويس اوووى ومثالى بجد
وجه في يوم لقيته بيقولى انا حلمت انك اتخطبتى لحد غيري واتقمص ع دى جدا وقعد تلت ايام مش بيكلمنى ولا يعبرني بسبب حلم حلمه ده غير انه كان بيتحكم ف لبسي وحتى صوره البروفايل كان بيتحكم فيها رغم انى الحمد لله مختمره ولبسي واسع وكل اللى بنزله عندى فيديوهات توعيه ل شغلي ول اولياء الامور وبس
قررت ابعد عنه المرادى خالص وقولتله انا مش عيزاك وابعد عنى دخل كلم اختى وحاول يستعطفها بكلامه ف انا مش عارفه اعمل ايه وهل انا ظلمته ولا لا لانى بجد مش عارفه
هو كده انا فيا مشكله؟؟
اه عندك مشكلة لكن مش في رفضك للشخص ، عندك مشكلة في البحث عن الحب في البشر ، حتى ان كانوا غير مناسبين ، حتى ان كانوا مؤذيين ، حتى بعدما يسقط قناع حلاويات البداية ، انتي تبحثين عن الحب في كل فرصة و تتمسكين بها و كأنها آخر فرصة ، فأنتي توكسيك و مؤذية لنفسك و ليس للغير مما يجعل الطرف الآخر يطمع في المزيد لسبب ضمان وجودك مهما فعل ، المشكلة الاكبر انك بتعملي كده و بتبذلي كل المجهود ده في علاقة إطارها و حدودها التعااااااارف فقط لا غير ، فأنتي بتحملي العلاقة فوق حدودها فبالتالي بتتوجعي ، و ده كارثة في حد ذاتها ، في العلاقة الأولى انتي ما صبرتيش تعرفي هو مسؤول او لأ ، ما عرفتيش يقدر يدخل بيت ولا لأ ، وبالتالي اتوجعتي من الحقيقة علشان اديتي مشاعر مش في وقتها ، العلاقة التانية ، فرق السن شاسع فبالتالي كنتي بتدوري على حنان و حب و امان الأب اللي انتي ما عيشتيهوش ، و ما اتنتيش تكتشفي كل ده ، ما صبرتيش تعرفي طباعه و تستني لما وش الانبهارات يقع ايه اللي هيبقى فاضلك ، عايزة تحبي و تتحبي من غير ما تتوجعي تبقي تشيليها لجوزك اللي توافقي عليه و تعرفيه كويس بدون اي مشاعر تماماً ، بتعرفيه زيه زي أي حد غريب و تختبريه و تختبري شخصيته و صفاته و عاداته و تدوري على كل تصرف و معناه ، علشان هو ده اللي هيبقالك لما الحب ما يبقاش كفاية انه يحافظ على العلاقة ، بالتوفيق 😊
تم النشر السبت، ٢٨ مارس ٢٠٢٦
لا مش ظلمتيه ده شخص مريض وخرجيه من حياتك قبل ما يدمرها بزيادة ونصيحة بلاش تدخلي علاقة بعده قبل ما تعالجي مشاكل التعلق وباقي نقاط الألم عندك بحيث تتعلمي ما لك وما عليك وتعرفي تفرقي بين الحب والتعلق وتقدري تتعافي من ماضيك الأليم
تم النشر السبت، ٢٨ مارس ٢٠٢٦
يا حبيبتي، أول حاجة أقولك إنك مش توكسيك ولا مؤذية ولا غير طبيعية خالص . أنتِ بنت قوية عاشتِ صدمات طفولة قاسية (ربنا يعوضكِ خير)، وده خلق عندك تعلق قلقي طبيعي جداً في اللي زيكِ – مش عيب، ده رد فعل بشري. بس خلينا نركز على الحقيقة: أنتِ مش ظلمتيه، قراركِ صح 100% . شوفي اللي حصل بوضوح: طفولتكِ : نقص الحب خلى قلبكِ يدور على تعويض سريع، فدخلتِ علاقات بكل حماسكِ (طبيعي). الخطيب ده : مثالي في البداية؟ أيوه، بس الـ red flags واضحة زي الشمس: تحكم مفرط : يقرر لبسكِ، صوركِ، يعزلكِ عن أهلكِ (حتى أختكِ!)، يزعل أيام على هزار أو حلم. ده سيطرة مش حب . غيرة مرضية : يتقمص على أحلام وكلام تافه، ومش بيثق حتى فيكِ. بخل وعزلة : مقاطع أهله، حريص على فلوسه لدرجة تافهة، ويزعل أيام بدون كلام. ده مش نضج، ده مشاكل شخصية عنده . رجع يحاول بعد شهرين؟ كان كويس شهر واحد بس، ثم نفس الدورة. ده مش تغيير حقيقي، ده محاولة استعادة السيطرة . أنتِ حاولتِ كتير، نبهتيه لتعلقكِ، وفسختِ لما حسيتِ إن كرامتكِ مهددة – ده ذكاء مش ظلم . اللي بيحاول يدخل أختكِ دلوقتي؟ ده ضغط عاطفي، قولي لأختكِ "مترديش، ده قراري نهائي". نصائح عملية عشان تتقدمي: حددي حدودكِ دلوقتي : بلوك كل الطرق (هو وأي وسيط)، وقولي لأهلكِ "ده قراري، خلص". ربنا قال في القرآن: {وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً} – الحب الحقيقي راحة مش تعذيب. اشتغلي على نفسكِ : اكتبي يومياتكِ يومياً (5 دقايق): "إيه اللي حسيته النهاردة؟ إيه اللي هعمله غداً أحسن؟" ده هيساعد تعلقكِ القلقي يقل تدريجياً. ابحثي عن علاقة صحية : الراجل الصالح بيبني معاكِ، مش يحكم أو يعزل. صلي الاستخارة قبل أي خطوة جاية، وركزي على تطوير شغلكِ وهواياتكِ عشان قلبكِ يملأ. لو عايزة دعم أكتر : دوري في Fedni على أسئلة مشابهة عن "التعلق المرضي" أو "علاقات سامة"، هتلاقي إجابات كتير. ولو محتاجة خبير نفسي، روحي https://www.fedni.net/experts – فيه متخصصين رائعين هيساعدوكِ. أنتِ تستاهلي حب يريح بالكِ، مش يوجعه. أنتِ قوية وهتقدري، ربنا معاكِ يا قمر! 💕 ذكية 😊
تم النشر الجمعة، ٢٧ مارس ٢٠٢٦
يا بنتى بالنسبة للحب دا مبيجيش إلا بعد الزواج ما دون ذلك فهو عبط من تأثير الأفلام والمسلسلات أما اللى انتى شايفاه قدامك فى العلاقات دا اسمه اعجاب معجبة بالشكل او بالشخصية ، طريقة التفكير ، حياة الشخص ، حنية الشخص كل دا اسمه إعجاب بحاجة معينة عند الطرف الأخر ما اسموش الحب ؛؛ بالنسبة ليكى انتى ........ البنى آدم دا مريض حتى لو شعورك دلوقتى مبينلك انك بتحبيه بس دا قادر انه يخليكى بعد الجواز كارهاه وكاره نفسك وحياتك معاه قادر انه يدمرلك حياتك ودا حاجة انتى ملاحظاها أصلا بس للأسف بتبقى فية شبه غشاوة أصلا على عينك بتخليكى شايفة المميزات بس مش العيوب ولو شايفة العيوب عقلك لا إراديا بيتلاشها ابعدى واهربى نصيحة منى كغاية كلمة قاطع اخواته ديه وبيحاول يقطعك عن أهلك تخيلى بيعمل كدا دلوقتى وهو ملوش سلطة عليكى ما بالك بقى لما تبقى تحت سلطتة هيعمل فيكى ايه + انتى عندك للأسف نقص للعاطفة والحب ودا ناتج بسب والدك الله ياخده لزيارة بيته الحرام والحج فيه هو ووالدتك فاهمانى فبتحاولى تعوضى النقص دا فى العلاقات عموما سواء مع صاحباتك او اللى انتى قولتيهم + انتى مش بتتسلى يا بنت الناس العلاقات مبنية على القبول وهى فى الأول والآخر نصيب بس الحلال الحلال حافظى على قلبك لحد ما يجى حد تلقى القبول معاه وترتاحى وانتى بتكلميه ربنا يريح قلبك وعقلك ويكتبلك اللى فيه الخير
تم النشر السبت، ٢٨ مارس ٢٠٢٦
انتى طبيعية وهو مريض ابعدى عنه تماما واقطعى كل وسائل التواصل اللى ممكن يوصلك بيها ويستعطفك وكذلك أختك بحيث انك متتأثريش بالاستعطاف حاولى تركزى فى نفسك الأول ومتفكريش فى طبيعتك فى العلاقات أهم حاجة تحاولى تتعافى نفسيا الأول وبعدين تنتظرى نصيبك وهو هيشوف شخصيتك وعلى هذا الأساس بيكون القبول ومش لازم تتدى انت على طول لازم فى طبيعة العلاقات السوية تكون خد وهات لكن لما تكون من طرف واحد بتكون مسمموة + نصيحة سحرية حافظى على قرآة سورة البقرة يوميا وهتشوف الفرق السحرى اللى حصل فى حياتك ربنا يكتبلك اللى فيه الخير
تم النشر السبت، ٢٨ مارس ٢٠٢٦
أهلك مين !!! ديه حياتك انتى وانتى اللى هتحاسبى على المشاريب انتى بتختارى شخص هيكمل معاكى حياه حرفيا يعنى هياخدك من بيتك حرفيا ل نهاية رحلتك فى الحياة يبقى نختار شخص يهون علينا الرحلة ويكون فيه قبول ويكون سوى نفسيا مش مريض ومتخافيش هيجيلك اللى من سنك وهتحبيه برضه بس انتى قولى يارب واطلبيها منه ربنا كريم يا بنت الناس متدمريش نفسك ب نفسك علشان خاطر حد محدش هيشيل شيلتك
تم النشر السبت، ٢٨ مارس ٢٠٢٦
يعني ايه حب انا كل م حد يديني اهتمام بحبه اوى وبحس انى فعلا بحبه بس مقبلش حد يجي ع كرامتى هو كده غلط او كده حرام عليا او بتسلى؟
تم النشر السبت، ٢٨ مارس ٢٠٢٦
أنا مؤيد لكلام الدكتور تماماً
تم النشر السبت، ٢٨ مارس ٢٠٢٦
وهل كده انا مظلمتوش لان اهلى بيقولوا انه بيحبنى وانا ظلمته
تم النشر السبت، ٢٨ مارس ٢٠٢٦
دا انسان مريض اهربي بسرعة وانتي طبيعية جدا واوعي تيجي علي كرامتك وعلي نفسك علشان خاطر حد والعيوب اللي مش هتقدري تستحمليها من حقك انك ترفضي لانك هتعيشي مع العيوب دي حياة كاملة ف بلاش تضيعي حياتك تنفخي في بلونة مقطوعة
تم النشر السبت، ٢٨ مارس ٢٠٢٦
حقيقي بجد مهما حصل بفضل اقول لا يمكن ظلمته مع انى شايغه الغلط بعيني وعارفه انه متظلمش بس بردو مبقدرش ابطل تفكير
تم النشر السبت، ٢٨ مارس ٢٠٢٦
بجد....ربنا يعينك عشان التعلق ده...شئ مش سهل ورغم كل العيوب اللي ممكن تكون ف بني أدم معين متعلقين فيه الواحد بيفضل شايف الحلو بس حتى لو الحلو ده نقطه ف بحر من الأذى والقذارة .....
تم النشر السبت، ٢٨ مارس ٢٠٢٦
يعنى انا ابعد ومندمش على قراري ده؟ ؟
تم النشر السبت، ٢٨ مارس ٢٠٢٦
هو فين العاقل و الناضج ده، ربنا يعافينا ويعافي الطلاب من امثاله
تم النشر السبت، ٢٨ مارس ٢٠٢٦
لعرض السؤال في فدني اضغط هنا